హస్తిన అతలాకుతలం.. ఒక్క రోజే 61 మరణాలు..

న్యూఢిల్లీ: దేశ రాజ‌ధాని ఢిల్లీని క‌రోనా మహమ్మారి గ‌జ‌గ‌జ వ‌ణికిస్తోంది. ఢిల్లీలో అన్ని జోన్లలో క‌రోనా విల‌య‌తాండ‌వం ప్రదర్శిస్తోంది. గురువారం ఒక్క‌రోజే క‌రోనాతో 61 మంది ప్రాణాలు కోల్పోయారని, కొత్త‌గా 2373 పాజిటివ్ కేసులు న‌మోదైన‌ట్లు ఢిల్లీ ఆరోగ్య శాఖ అధికారికంగా వెల్లడించింది. ఇదిలాఉండగా క‌రోనా బారిన పడి కోలుకుంటున్నవారి సంఖ్య మెరుగ్గా ఉండడం ఆశాజనకంగా ఉందని బావిస్తున్నారు. కాగా కరోనా నుండి కోలుకున్న 3015 మంది గురువారం డిశ్చార్జి అయ్యారు. దేశ రాజ‌ధానిలో మొత్తం క‌రోనా పాజిటివ్ కేసుల సంఖ్య 92,175కు చేరింది. దీని బారిన పడి మరణించినవారి సంఖ్య 2,864కు చేరుకుంది. గురువారం రోజు 20,822 మందికి క‌రోనా ప‌రీక్ష‌లు నిర్వ‌హించిన‌ట్లు ఆరోగ్య శాఖ తెలిపింది. ఇందులో 10,978 ఆర్టీపీసీఆర్ టెస్టులు కాగా, 9,844 ర్యాపిడ్ యాంటీజెన్ టెస్టులని పేర్కొంది.