సుభాష్ చంద్రకు ఎంటర్‌ప్రెన్యుయర్ ఆఫ్ ది డికేడ్ అవార్డ్

రాజ్యసభ సభ్యుడు సుభాష్ చంద్రను 'ఎంటర్‌ప్రెన్యుయర్ ఆఫ్ ది డికేడ్ అవార్డ్‌'తో ఘనంగా సత్కరించింది బాంబే మేనేజ్‌మెంట్ అసోసియేషన్ (బీఎంఏ). 60 ఏళ్లకు పైగా నేపథ్యం వున్న బాంబే మేనేజ్‌మెంట్ అసోసియేషన్‌కు దేశంలోనే 6 దశాబ్ధాలకు పైగా చరిత్ర కలిగిన పురాతన మేనేజ్‌మెంట్ అసోసియేషన్‌గా గుర్తింపు సొంతం చేసుకుంది. బుధవారం ముంబైలో జరిగిన 39వ బీఎంఏ అవార్డ్స్ ప్రదానోత్సవానికి వివిధ కారణాలతో సుభాష్ చంద్ర హాజరు కాలేకపోవడంతో ఆయన తరపున జీ ఎంటర్‌టైన్‌మెంట్ ఎంటర్ ప్రైజెస్ లిమిటెడ్ ( జీఈఈఎల్) మేనేజింగ్ డైరెక్టర్, సీఈఓ పునీత్ గోయెంక ఆ అవార్డుని స్వీకరించారు.

అయితే, ఈ అవార్డ్ షోకు సుభాష్ చంద్ర హాజరు కాలేకపోయినప్పటికీ, ఆయన మాట్లాడిన ఓ వీడియో సందేశాన్ని బీఎంఏ అవార్డ్స్ వేదికపై ప్రదర్శించారు. ఈ సందర్భంగా యువ పారిశ్రామికవేత్తలకు తన అభినందనలు తెలిపారు. ఇదే వేదికపై లైఫ్ టైమ్ అచీవ్‌మెంట్ అవార్డ్ అందుకున్న ఏ. ఎం. నాయక్‌కి కంగ్రాట్స్ చెప్పారు. 

''తాను ఈ అవార్డ్ అందుకోవడానికి తొలుత సుముఖత వ్యక్తంచేయనప్పటికీ.. దేశంలో ప్రస్తుతం 5 మిలియన్ల మందికి ఉపాధి కల్పంచే విధంగా పరిశ్రమలను నెలకొల్పిన మీరు ఈ అవార్డ్ స్వీకరించాల్సిందే'' అని జ్యూరీ సభ్యులు తనకి విజ్ఞప్తి చేసిన విషయాన్ని సుభాష్ చంద్ర ఈ వీడియో ద్వారా పంచుకున్నారు. గడిచిన ఆరు దశాబ్ధాల్లో బీఎంఏ కేవలం ఐదుసార్లు మాత్రమే ఎంటర్ ప్రెన్యుయర్ ఆఫ్ ది డికేడ్ అవార్డుని ప్రకటించగా అందులో ఈ అవార్డ్ అందుకున్న 5వ ఎంటర్ ప్రెన్యుయర్ సుభాష్ చంద్ర కావడం విశేషం.