ఆదాయపు పన్ను శాఖకు సుప్రీంకోర్టు జరిమానా

ఆదాయపు పన్ను శాఖకు భారత అత్యున్నత న్యాయస్థానం సుప్రీంకోర్టు జరిమానా విధించింది. ఓ కేసు విషయంలో ఆలస్యంగా పిటీషన్ ఫైల్ చేయడంతో పాటు.. తప్పుడు ప్రకటనలు చేసినందుకు కోర్టు ఈ శిక్షను విధించింది. ఆదాయపు పన్ను అప్పిలేట్‌ ట్రైబ్యునల్‌ వారి ఆదేశాలను బేఖాతరు చేస్తూ ఐటి శాఖ వేసిన పిటిషన్‌ను 2016లో అలహాబాద్‌ హైకోర్టు రద్దు చేసింది. అయితే ఇదే అంశాన్ని సవాలు చేస్తూ ఆదాయపు పన్ను శాఖ సుప్రీంకోర్టులో కేసు వేసింది. అయితే దీనిని ఓ తప్పుడు కేసుగా భావించిన కోర్టు... సుప్రీంకోర్టును మీరు ఇష్టం వచ్చినట్లు ఆడుకోవడానికి అది ఓ పిక్నిక్ స్పాట్ కాదని.. కోర్టు సమయం వృధా చేసినందుకు జరిమానా చెల్లించాలని తెలిపింది. ఎప్పుడో దాఖలు చేయాల్సిన పిటీషనును 596 రోజుల ఆలస్యంగా దాఖలు చేయడంతో పాటు అసంబద్ధమైన వివరణలు ఇవ్వడంతో ఆగ్రహించిన కోర్టు, ఘజియాబాద్ ఆదాయపు పన్ను శాఖ అధికారికి చీవాట్లు పెట్టింది. అలాగే ఇలాంటి విషయాలను కేంద్ర ప్రభుత్వం కూడా తేలికగా ఎలా తీసుకుంటుందని కోర్టు ప్రశ్నించింది. 

సుప్రీంకోర్టును తేలికగా తీసుకోకూడదని తెలియజేసేందుకు ఈ జరిమానా విధిస్తున్నామని..  రూ.10 లక్షల రూపాయలను నాలుగు వారాల లోపు సుప్రీంకోర్టు లీగల్ సర్వీసెస్ కమిటీలో జమా చేయాలని కోర్టు తెలిపింది. ఆ డబ్బును జువైనల్ జస్టిస్ విభాగం కోసం వినియోగిస్తామని తెలిపిన కోర్టు.. ఇలాంటి పొరపాటు మళ్లీ జరగకుండా చూడాలని తెలిపింది.

యూపీ అర్బన్ ప్లానింగ్ అండ్ డెవలప్ మెంట్ యాక్ట్, 1973 ప్రకారం హపుల్ పిల్కువా డెవలప్ మెంట్ అథారిటీ (హెచ్పీడీఏ) ఆదాయపు పన్ను రిజిస్ట్రేషనుకి దరఖాస్తు చేస్తూ.. సంస్థకు పన్ను నుండి మినహాయింపు కోరింది. అయితే హెచ్పీడీఏ సంస్థ ఛారిటబుల్ ట్రస్ట్ కాదని.. అందుకే మినహాయంపు ఇవ్వలేమని శాఖ తెలియజేసింది. ఈ విషయాన్ని సవాలు చేస్తూ హెచ్పీడీఏ అప్పిలేట్‌ ట్రైబ్యునల్‌‌ను ఆశ్రయించగా.. వారు హెచ్పీడీఏకి అనుకూలంగానే తీర్పు ఇచ్చారు. ఆ తీర్పును సవాలు చేస్తూ పిటీషన్ వేయాల్సిన ఆదాయపు పన్ను శాఖ ఆలస్యం చేయడంతో పాటు నిబంధనలను తుంగలో తొక్కడంతో ఆగ్రహించిన సుప్రీంకోర్టు జరిమానా విధించింది.