Maha Kumbh Mela 2025: పాపాలు తొలగించే పవిత్ర సమయం.. తప్పక తెలుసుకోండి..

హిందూ సంప్రదాయంలో కుంభమేళాకు ఎంతో విశిష్టమైన స్థానం ఉంది. కుంభమేళాలో పుణ్యస్నానం చేస్తే పాపాలు తొలగిపోతాయని, మోక్షం లభిస్తుందని నమ్మకం. 2025 జనవరి 14 నుంచి ఫిబ్రవరి 26 వరకు ఉత్తరప్రదేశ్‌లోని ప్రయాగ్‌రాజ్‌లో జరిగే ఈ మహా కుంభమేళా అనేక శతాబ్దాలుగా ఆధ్యాత్మిక శక్తికి ప్రతీకగా నిలుస్తోంది. గంగ, యమునా, సరస్వతీ నదుల సంగమం అయిన త్రివేణి సంగమంలో పుణ్యస్నానం చేస్తే పునర్జన్మల చక్రం నుంచి విముక్తి పొందుతారనే విశ్వాసం ఉంది.

మొదటి పుణ్యస్నానం జనవరి 14న మకర సంక్రాంతి రోజున జరుగుతుంది. రెండో పుణ్యస్నానం జనవరి 29న మౌనీ అమావాస్య, మూడో స్నానం ఫిబ్రవరి 3న వసంత పంచమి రోజున జరగనుంది. జనవరి 13న పౌష పూర్ణిమ, ఫిబ్రవరి 4న అచల సప్తమి, ఫిబ్రవరి 12న మాఘ పూర్ణిమ, ఫిబ్రవరి 26న మహాశివరాత్రి రోజున అంతిమ పుణ్యస్నానం జరుగుతుంది. ఈ రోజుల్లో కుంభమేళా ప్రదేశంలో వందలాది మంది భక్తులు తమ పాపాలనుండి స్నానం ద్వారా విముక్తులు అవుతారు.

కుంభమేళా వెనుక పురాణ కథలు కుంభమేళా గురించి తెలియాలి అంటే ఆది పురాణాల్లోని సముద్ర మంథనం కథ గురించి తెలియాలి. దేవతలు, అసురులు అమృతం కోసం సముద్రాన్ని మథనం చేయగా, అమృత కుంభం బయటపడింది. ఆ కుంభంలో అమృతం భూమిపై నాలుగు ప్రదేశాల్లో పడింది – ప్రయాగ్‌రాజ్, హరిద్వార్, ఉజ్జయిని, నాసిక్. ఈ ప్రదేశాల్లో ప్రతి 12 ఏళ్లకోసారి కుంభమేళా జరుగుతుంది. మహా కుంభమేళా మాత్రం 144 ఏళ్లకోసారి ప్రయాగ్‌రాజ్‌లో మాత్రమే జరుగుతుంది. ఇది అత్యంత పవిత్రమైన సమయంగా పరిగణించబడుతుంది.

పాపాలు తొలగించే పుణ్యస్నానం కుంభమేళాలో ప్రధాన ఆకర్షణ పుణ్యస్నానం. త్రివేణి సంగమం వద్ద గంగ, యమునా, సరస్వతీ నదుల్లో స్నానం చేయడం పాపాలు తొలగించడమే కాకుండా ఆధ్యాత్మిక శక్తిని పొందడంలో సహాయపడుతుంది. ఈ పవిత్ర స్నానం ద్వారా భక్తులు మోక్షం సాధిస్తారని విశ్వాసం. మకర సంక్రాంతి, మౌనీ అమావాస్య, వసంత్ పంచమి వంటి రోజుల్లో లక్షల మంది భక్తులు త్రివేణి సంగమంలో స్నానం చేసి, ఆధ్యాత్మిక శుభ్రత పొందుతారు.  

మహా కుంభమేళా ఆధ్యాత్మికత మాత్రమే కాదు, సాంస్కృతిక ఉత్సవం కూడా. కుంభమేళా కేవలం ఆధ్యాత్మిక స్నానం కోసం మాత్రమే కాదు, భక్తుల నమ్మకాలకు ప్రతీక. పండితులు, సాధువులు, భక్తులు కలిసి ఈ పండుగను జరుపుకుంటారు. ఎంతో వైభవంగా జరిగే ఈ ఉత్సవం ప్రపంచవ్యాప్తంగా హిందువులను ఏకం చేస్తుంది. మహా కుంభమేళా 2025 ప్రత్యేకత ఏమిటంటే, ఇది అనేక శతాబ్దాల క్రితం జరిగిన శాసనాల ప్రకారం నిర్వహించే అరుదైన పండుగ.