IND vs SL: క్లీన్‌స్వీప్‌పై భారత్ కన్ను.. చివరి వన్డేకు కీలక ఆటగాళ్లు దూరం..

Ind vs SL 3rd Odi Match Preview: ఇప్పటికే వన్డే సిరీస్‌ సొంతం చేసుకున్న టీమిండియా.. సిరీస్‌ క్లీన్ స్వీప్‌పై కన్నేసింది. భారత్-శ్రీలంక మధ్య మూడు మ్యాచ్‌ల వన్డే సిరీస్‌లో చివరి మ్యాచ్ ఆదివారం మధ్యాహ్నం 1.30 గంటలకు ప్రారంభమవుతుంది. తిరువనంతపురంలోని గ్రీన్ ఫీల్డ్ ఇంటర్నేషనల్ స్టేడియంలో ఇరు జట్లు తలపడనున్నాయి. టీమిండియా ఇప్పటికే 2-0తో తిరుగులేని ఆధిక్యంలో ఉంది. ఈ మ్యాచ్‌లో రిజర్వ్ బెంచ్ స్ట్రెంత్‌ను ప్రయత్నించే మంచి అవకాశం ఉంది. మరోవైపు ఈ వన్డేలో విజయం సాధించి.. క్లీన్ స్వీప్ నుంచి తప్పించుకోవాలని శ్రీలంక చూస్తోంది. 

తొలి మ్యాచ్‌లో టీమిండియా 67 పరుగుల తేడాతో విజయం సాధించగా.. రెండో మ్యాచ్‌లో 4 వికెట్ల తేడాతో ఘన విజయం సాధించింది. మూడో మ్యాచ్‌లో కూడా భారత జట్టుదే పైచేయి కనిపిస్తోంది. టీమిండియా బ్యాటింగ్‌లో మంచి డెప్త్ ఉంది. బౌలర్లు కూడా తమ పనిని చక్కగా నిర్వహిస్తున్నారు. ఈ నేపథ్యంలో కెప్టెన్ రోహిత్ శర్మ కొంతమంది ఆటగాళ్లకు విశ్రాంతి ఇచ్చే అవకాశం కనిపిస్తోంది.

విరాట్ కోహ్లీ, రోహిత్ శర్మ, మహ్మద్ సిరాజ్ శనివారం ప్రాక్టీస్‌లో కనిపించలేదు. ఈ మ్యాచ్‌లో  సూర్యకుమార్ యాదవ్, ఇషాన్ కిషన్‌లను తుది జట్టులోకి తీసుకునే అవకాశం ఉంది. యజువేంద్ర చాహల్‌కు అవకాశం లభిస్తుందా లేదా అనేది టాస్‌ సమయంలోనే తేలనుంది. రోహిత్ శర్మ, విరాట్ కోహ్లీ, సిరాజ్, అక్షర్ పటేల్ ఈ మ్యాచ్‌ నుంచి విశ్రాంతి తీసుకునే ఛాన్స్ ఉంది.

రోహిత్ శర్మ దూరమైతే.. హార్ధిక్ పాండ్యా తొలిసారి వన్డే టీమ్‌కు నాయకత్వం వహిస్తాడు. శుభ్‌మన్‌ గిల్‌తో కలిసి ఇషాన్ కిషన్ ఓపెనింగ్ చేస్తాడు. వన్‌డౌన్‌లో శ్రేయస్ అయ్యర్, నాలుగోస్థానంలో సూర్యకుమార్ యాదవ్ ఆడనున్నారు. ఆ తరువాత స్థానాల్లో కేఎల్ రాహుల్, పాండ్యా రానున్నారు. అక్షర్ పటేల్ స్థానంలో వాషింగ్టన్ సుందర్‌ను తీసుకునే ఛాన్స్ ఉంది. సిరాజ్ స్థానంలో అర్ష్‌దీప్‌ను పరీక్షించవచ్చు. 

తిరువనంతపురం పిచ్ పై ఇది రెండో వన్డే. ఇంతకు ముందు ఈ మైదానంలో ఒకే ఒక్క మ్యాచ్‌ జరిగింది. ఆ మ్యాచ్‌లో భారత బౌలర్లు విండీస్ జట్టును కేవలం 104 పరుగులకే ఆలౌట్ చేశారు. ఈ టార్గెట్‌ను టీమిండియా ఒక వికెట్ కోల్పోయి ఛేదించింది. ఇక్కడ పగటి ఉష్ణోగ్రత 30 డిగ్రీల సెల్సియస్ ఉంటుంది. రాత్రి ఉష్ణోగ్రతలో కచ్చితంగా కొంత తగ్గుదల ఉంటుంది. మ్యాచ్ సమయంలో వర్షం కురిసే అవకాశం లేదు.

తుది జట్లు (అంచనా):

టీమిండియా: శుభ్‌మన్ గిల్, ఇషాన్ కిషన్, శ్రేయస్ అయ్యర్, సూర్యకుమార్ యాదవ్, కేఎల్ రాహుల్, హార్దిక్ పాండ్యా (కెప్టెన్), వాషింగ్టన్ సుందర్, కుల్దీప్ యాదవ్/చాహల్‌, మహ్మద్ షమీ, ఉమ్రాన్ మాలిక్, అర్ష్‌దీప్ సింగ్.

శ్రీలంక: పాతుమ్ నిస్సాంక, అవిష్క ఫెర్నాండో, కుశాల్ మెండిస్ద, నువానిందు ఫెర్నాండో, ధనంజయ్ డిసిల్వా, దసున్ షనక (కెప్టెన్), వనిందు హసరంగా, దునిద్ వెలాల్గే, చమిక కరుణరత్నే, కసున్ రజిత, లహిరు కుమార.

స్థానికం నుంచి అంతర్జాతీయం వరకు.. క్రీడలు, వినోదం, రాజకీయాలు, విద్య, ఉద్యోగాలు, హెల్త్, లైఫ్‌స్టైల్ .. A to Z అన్నిరకాల వార్తలను తెలుగులో పొందడం కోసం ఇప్పుడే Zee తెలుగు న్యూస్ యాప్ డౌన్‌లోడ్ చేసుకోండి.