తెలంగాణలో Coronavirus లేటెస్ట్ అప్‌డేట్స్

హైదరాబాద్‌ : తెలంగాణలో నేడు కొత్తగా మరో 10 కరోనా వైరస్‌ పాజిటివ్‌ కేసులు నమోదయ్యాయి. దీంతో రాష్ట్ర వ్యాప్తంగా నమోదైన కరోనా పాజిటివ్ కేసుల సంఖ్య 1,132 కి చేరింది. కరోనా వైరస్‌ కారణంగా ఇప్పటి వరకు రాష్ట్రవ్యాప్తంగా 29 ​మంది మృతి చెందారు. 722 మంది కోలుకుని డిశ్చార్జ్‌ కాగా ప్రస్తుతం 376 మందికి రాష్ట్రంలోని వేర్వేరు ఆస్పత్రులలో చికిత్స జరుగుతోంది. ఈ మేరకు రాష్ట్ర వైద్య, ఆరోగ్యశాఖ మంత్రి ఈటల రాజేంద​ర్‌ కొద్దిసేపటి క్రితం ఓ హెల్త్‌ బులిటిన్‌ను విడుదల చేశారు. 

ఈ సందర్భంగా మంత్రి ఈటల రాజేందర్ మీడియాతో మాట్లాడుతూ.. పాజిటివ్ వ్యక్తులతో నేరుగా కాంటాక్ట్‌లోకి వచ్చిన వారికి లేదా కరోనా వైరస్‌ లక్షణాలు ఉన్న వారికి మాత్రమే కోవిడ్-19 టెస్ట్స్ నిర్వహించాలని కేంద్రం సూచించినట్లు తెలిపారు. తెలంగాణలో సరైన సంఖ్యలో కరోనా పరీక్షలు చేయడంలేదనే ఆరోపణలకు సమాధానంగా మంత్రి ఈటల ఈ వ్యాఖ్యలు చేశారు. గత 20 రోజులుగా ఒక్క కరోనా వైరస్‌ పాజిటివ్ కేసు కూడా నమోదు కాని 14 ఆరెంజ్ జోన్స్‌ని గ్రీన్ జోన్స్‌గా ప్రకటించాలని కేంద్రాన్ని కోరామని అన్నారు. అలాగే మరో 3 రెడ్ జోన్స్‌లో కరోనా పాజిటివ్ కేసులు నమోదు కావడంలేదని.. వాటిని కూడా ఆరెంజ్ జోన్స్‌గా మార్చాల్సిందిగా కేంద్రాన్ని విజ్ఞప్తి చేశామని పేర్కొన్నారు. సోమవారం దీనిపై కేంద్రం నుంచి ఓ అధికారిక ప్రకటన వెలువడే అవకాశం ఉందని మంత్రి ఈటల ఆశాభావం వ్యక్తంచేశారు.