బైక్ చక్రంలోకి చీర కొంగు.. యాదాద్రి భువనగిరిలో విషాదం

భువనగిరి: యాదాద్రి భువనగిరిలో విషాదం చోటుచేసుకుంది. పని నిమిత్తం భర్తతో కలిసి సొంతూరుకి వెళ్తున్న మహిళ మార్గం మధ్యలోనే ప్రాణాలు కోల్పోయింది. బైకు మీద వెళ్లేటప్పుడు తీసుకొని ఓ చిన్న జాగ్రత్తనే ఆమె ప్రాణాలు బలితీసుకుంది. పోలీసుల కథనం ప్రకారం.. యాదాద్రి భువనగిరి జిల్లా పొడుచేడు గ్రామానికి చెందిన పిట్టల సైదులు ముదిరాజ్ కుటుంబం జీవనోపాధి కోసం కొన్నేళ్ల కిందట హైదరాబాద్‌కి వచ్చింది.

ఈ క్రమంలో సోమవారం తమ సొంత గ్రామంలో పని ఉందని భార్య దుర్గను తన బైకు మీద ఎక్కించుకుని బయలుదేరాడు. ప్రమాదవశాత్తూ దుర్గ కట్టుకున్న చీర కొంగు బైకు చక్రంలోకి వెళ్లి ఇరుక్కుపోయింది. ఆత్మకూరు (ఎం)లో ఓ ఫంక్షన్ హాల్ వద్దకు రాగానే అమాంతం రోడ్డుపై పడిపోయింది దుర్గ. చీర కొంగు బైక్ చక్రంలో ఇరుక్కుపోవడంతో రోడ్డుపై పడిపోయిన దుర్గ తలకు బలమైన గాయాలయ్యాయి.

108 అంబులెన్స్‌కు సమాచారం ఇచ్చినా అందుబాటులో లేదని చూస్తుండగా పోలీస్ పెట్రోలింగ్ వాహనం ఆ మహిళ ప్రాణాలు కాపాడాలని చూశారు. కానీ ప్రయోజనం లేకపోయింది. చికిత్స కోసం పెట్రోలింగ్ వాహనంలో తరలిస్తుండగానే మార్గం మధ్యలోనే దుర్గ చనిపోయింది. దీంతో పొడుచేడులో విషాదఛాయలు అలుముకున్నాయి. మరికొన్ని గంటల్లో చూస్తామనుకున్న దుర్గ మరణవార్త విన్న కుటుంబం శోకసంద్రంలో మునిగింది.