చిక్కుల్లో నిత్యానంద.. ఆచూకీ తెలపాలని ఇంటర్ పోల్ నోటీసులు

న్యూఢిల్లీ: వివాదాస్పద ఆధ్యాత్మిక గురువు నిత్యానందకు ఉచ్చు బిగుసుకుంటోంది. నిత్యానంద ఆచూకీ చెప్పాలని ప్రపంచ దేశాలను కోరుతూ ఇంటర్ పోల్ ఏజెన్సీ బ్లూ కార్నర్ నోటీసులు జారీ చేసింది. భారత్‌లో నిత్యానందపై అత్యాచారం, అపహరణ కేసులున్నాయని నకిలీ పాస్‌పోర్ట్‌పై విదేశాలకు పారిపోయి తలదాచుకుంటున్నాడని తమ నోటీసులలో ఇంటర్ పోల్ పేర్కొంది. గుజరాత్ పోలీసుల విజ్ఞప్తి మేరకు దైవాంశ సంభూతుడిగా ప్రచారం చేసుకునే నిత్యానందపై నోటీసులు జారీ అయ్యాయి.  నకిలీ పాస్‌పోర్టుపై విదేశాలకు చెక్కేశాడని కర్ణాటకలో కేసు నమోదైంది.

వాస్తవానికి నిత్యానందకు 2008లో 10ఏళ్ల వ్యాలిడిటీతో పాస్ పార్ట్ జారీ చేశారు. 2018లో పాస్ పోర్ట్ గడువు ముగిసింది. అయితే అత్యాచారం, అహ్మదాబాద్ లోని యోగిని సర్వజ్ఞపీఠం ఆశ్రమంలో బాలికలను లైంగికంగా వేధించాడని, ఇద్దరు బాలికలు అదృశ్యం కావడం కేసులు నమోదయ్యాయి. కేసులకు భయపడి నిత్యానంద నకిలీ పాస్‌పోర్టుతో విదేశాలకు పారిపోయాడు. నిత్యానందర తమ దేశంలో లేడని, అతడికి ఆశ్రయం ఇవ్వడానికి నిరాకరించినట్లు ఈక్వెడార్ అధికారులు తెలిపారు. మరోవైపు కైలాస అనే ద్వీపాన్ని (దేశాన్ని) నిత్యానంద ఏర్పాటు చేసినట్లు కథనాలు వెలుగుచూశాయి.