ଚିଠି ଖୋଲିବ ଗୁମର: ସୌମ୍ୟ-ବିଦ୍ୟାଙ୍କ ସମ୍ପର୍କର Hatestory

ଗଜପତି: ସୌମ୍ୟରଞ୍ଜନ ମୃତ୍ୟୁ ମିଷ୍ଟ୍ରୀରେ ପୋଲିସ କି କ୍ରାଇମବ୍ରାଞ୍ଚକୁ ଖାସ୍ କିଛି ଲିଡ୍ ମିଳୁନି । କିନ୍ତୁ ତଦନ୍ତ ବେଳେ ସବୁଦିନ କେସରେ ଦେଖିବାକୁ ମିଳୁଛି ଟୁଇଷ୍ଟ୍ ଉପରେ ଟୁଇଷ୍ଟ୍ । ସୌମ୍ୟଙ୍କ ମୃତ୍ୟୁର ୧୦ ଦିନ ପରେ ତାଙ୍କ ସରକାରୀ କ୍ୱାର୍ଟର୍ସରେ ଛାନଭିନ କରିଛି କ୍ରାଇମବ୍ରାଞ୍ଚ୍ । ଖୋଦ୍ ଦକ୍ଷିଣାଞ୍ଚଳ ଡିଆଇଜି ବି ସ୍ପଟ୍ ଭିଜିଟ୍ କରିଛନ୍ତି । ଆଉ ପାରିପାର୍ଶ୍ୱିକ ସ୍ଥିତିକୁ ଅନୁଧ୍ୟାନ କରି ଏବେ କହୁଛନ୍ତି, ସୌମ୍ୟଙ୍କ ସରକାରୀ କ୍ୱାର୍ଟର୍ସ ହିଁ ହେଉଛି କ୍ରାଇମ୍ ସ୍ପଟ୍ । ଯାହାକୁ ସୌମ୍ୟଙ୍କ ପରିବାର ଓକିଲ ଖଣ୍ଡନ କରିଛନ୍ତି । ସେପଟେ ସୌମ୍ୟଙ୍କ ପତ୍ନୀ ବିଦ୍ୟାଭାରତୀଙ୍କ ହାତ ଲେଖା ଚିଠିର ଦ୍ୱିତୀୟ ଫର୍ଦ୍ଦ ପ୍ରମାଣ କରୁଛି, ବାସ୍ତବରେ ସୌମ୍ୟଙ୍କ ପ୍ରତି ବିଦ୍ୟାଙ୍କର ଥିଲା କେତେ ଘୃଣା । ଏସବୁ ଟୁଇଷ୍ଟ ଭିତରେ କେସର ପର୍ଦ୍ଦାଫାଶ ସିନା ହୋଇନି । କିନ୍ତୁ ଦିନକୁ ଦିନ ବଦଳୁଛି ବୟାନ, ବଦଳୁଛି ସିନ୍ । ମାନେ ଯାହା ଥିଲା କାଲିର ସତ, ତାହା ସବୁ ଆଜିର ମିଛ !

ଏସିଏଫ୍ ସୌମ୍ୟରଞ୍ଜନ ମହାପାତ୍ର ମୃତ୍ୟୁ ମିଷ୍ଟ୍ରୀ (Somyaranjan Death) କୁ ଚାହୁଁ ଚାହୁଁ ବିତିଯାଇଛି ୧୦ ଦିନ । ପୋଲିସ ସହ ମିଶି କ୍ରାଇମବ୍ରାଞ୍ଚ ବି ଖୋଳତାଡ଼ ଆରମ୍ଭ କରିଛି । ହେଲେ ସୌମ୍ୟଙ୍କ ରହସ୍ୟଜନକ ମୃତ୍ୟୁର ମୂଳଫାଶ ମିଳୁନାହିଁ । ଓଲଟା ତଦନ୍ତ ଯେତେ ଆଗକୁ ବଢ଼ୁଛି, ଘଟଣାରେ ଆସୁଛି ଟୁଇଷ୍ଟ୍ ପରେ ଟୁଇଷ୍ଟ୍ । କାଲିଯାଏଁ ଯାହା ସବୁ ଥିଲା  ସତ, ତାହା ପାଲଟୁଛି ଆଜିର ମିଛ । ଆଉ ବର୍ତ୍ତମାନର ସତ, ଗଲାଦିନର ମିଛକୁ ପ୍ରଶ୍ନ ଓ ସନ୍ଦେହର କାଠଗଡ଼ାକୁ ଟାଣୁଛି । ସେବେ ପାରଳାଖେମୁଣ୍ଡି ପୋଲିସ କହୁଥିଲା, ସୌମ୍ୟଙ୍କ ସରକାରୀ କ୍ୱାର୍ଟର୍ସ (Government Quarters) ରେ ନାହିଁ ଜଳିବାର ଚିହ୍ନବର୍ଣ୍ଣ । କିନ୍ତୁ ଗୁରୁବାରର ତନାଘନା ପରେ ଉଭୟ ପୋଲିସ ଓ କ୍ରାଇମବ୍ରାଞ୍ଚର ଏକ୍ ସ୍ୱର ଯେ,ସରକାରୀ କ୍ୱାର୍ଟର୍ସ ହିଁ ହେଉଛି କ୍ରାଇମ୍ ସ୍ପଟ୍ ।

ସୌମ୍ୟଙ୍କ ମୃତ୍ୟୁପରଠାରୁ ପୋଲିସ ଯେଉଁ କ୍ୱାର୍ଟର୍ସକୁ ମୁକୁଳା ଛାଡ଼ି ଦେଇଥିଲା, ପ୍ରାୟ ୧୦ଦିନ ପରେ ସେଠି ପହଞ୍ଚିଛି କ୍ରାଇମବ୍ରାଞ୍ଚ୍ ଟିମ୍ । ୨ ଘଣ୍ଟା ଧରି ତନତନ ଯାଞ୍ଚ କରି ପାରିପାର୍ଶ୍ୱିକ ସ୍ଥିତିର ଅନୁଧ୍ୟାନ କରିଛି । ପରେ ପରେ ଦକ୍ଷିଣାଞ୍ଚଳ ଡିଆଇଜି ମଧ୍ୟ ସୌମ୍ୟଙ୍କ କ୍ୱାର୍ଟର୍ସ ବୁଲି ଦେଖିଥିଲେ । ତେବେ କ୍ରାଇମ ସ୍ପଟ୍ (Crime Spot)ବୁଲିବା ପରେ ସୌମ୍ୟ ନିଜ କ୍ୱାର୍ଟର୍ସରେ ହିଁ ଜଳିଥିବା ଦାବି କରିଛନ୍ତି କ୍ରାଇମବ୍ରାଞ୍ଚ୍ ଡିଏସପି । ଯଦି ଏହା ସତ୍ୟ, ତେବେ ବଡ଼ ପ୍ରଶ୍ନ ହେଲା, ସୌମ୍ୟଙ୍କ ଶରୀରରେ ନିଆଁ ଲାଗିବା ଦୁର୍ଘଟଣା ଥିଲା ନା କିଏ ଲଗାଇଥିଲା ? 

ସେପଟେ ସୌମ୍ୟଙ୍କ ପରିବାର ପକ୍ଷରୁ ଲଢ଼ୁଥିବା ଓକିଲ, ପୋଲିସ ଓ କ୍ରାଇମବ୍ରାଞ୍ଚ (CrimeBranch)ର ଏ ଦାବିକୁ ଖଣ୍ଡନ କରିଛନ୍ତି। କହିଛନ୍ତି, ପୋଲିସ, ମାଜିଷ୍ଟ୍ରେଟ୍ ଓ ତାଙ୍କ ଉପସ୍ଥିତିରେ କ୍ୱାର୍ଟର୍ସ ଖୋଲାଯାଇଥିଲା । ଆଉ ସେବେ ଘର ଭିତରେ କିଛି ପୋଡ଼ା ଚିହ୍ନ ନ ଥିଲା । ତେଣୁ ପ୍ରଶ୍ନ ଉଠିବା ସ୍ୱାଭାବିକ ଏବେ ଘର ଭିତରେ ପୋଡ଼ା ଚିହ୍ନ ଆସିଲା କୁଆଡ଼ୁ। 
ଏପଟେ ଛାନଭିନ୍ ଜାରି ଥିବାବେଳେ ସୌମ୍ୟଙ୍କ ସ୍ତ୍ରୀ ବିଦ୍ୟାଭାରତୀ (Somyas Wife VidyaBharati) ଙ୍କ ହାତ ଲେଖା ଚିଠିର ଆଉ ଏକ ଫର୍ଦ୍ଦ ଲିକ୍ ହୋଇଛି । ଯେଉଁଥିରେ ସ୍ୱାମୀଙ୍କ ପ୍ରତି ଥିବା ବିଦ୍ୟାଭାରତୀଙ୍କ ଘୃଣା ବାରି ହୋଇଯାଉଛି ।ବିଦ୍ୟା ଛାଡ଼ପତ୍ର ଚାହୁଁଥିବା ଲେଖିଥିବା ବେଳେ ପ୍ରଭୁଙ୍କୁ ପ୍ରାର୍ଥନା କରି ଲେଖିଛନ୍ତି, ଡିଭୋର୍ସ ହୋଇଗଲେ ପୁରୀ ଶ୍ରୀମନ୍ଦିରରେ ସେ ଦେବଦାସୀ ଭଳି ଜୀବନ କାଟିବେ। 

ଏପରି କି ସମ୍ପର୍କର ହେଟଷ୍ଟୋରୀ (HateStory) ଦର୍ଶାଇବାକୁ ବିଦ୍ୟାଭାରତୀ ପ୍ରତିଟି ତାରିଖରେ ସେ କେତେ ଘୃଣା କରନ୍ତି ତାହାକୁ ୱାନ୍ ପ୍ଲସ୍ ୱାନ୍ ଷ୍ଟାଇଲରେ ଲେଖିଛନ୍ତି । ପୂର୍ବରୁ ଏକ ଚିଠିରେ ମଧ୍ୟ ବିଦ୍ୟାଭାରତୀ I HATE YOU ଲେଖି ଦର୍ଶାଇଥିଲେ ଆଉ ତିନି ଦିନ କିପରି କଟିବ ।  ଆଉ ମୁଁ ଶାନ୍ତିରେ ରହିବି। ଯଦି ବିଦ୍ୟାଭାରତୀ ଏତେ ଘୃଣା କରୁଥିଲେ, ସେହି ଘୃଣା ସୌମ୍ୟଙ୍କ ମୃତ୍ୟୁର କାରଣ ନୁହେଁ ତ ? ଚିଠିର ଏ ଫର୍ଦ୍ଦ ଆଗକୁ ବିଦ୍ୟାଭାରତୀଙ୍କ ପାଇଁ ଫାଶ ପାଲଟିଯିବନି ତ ? ସେପଟେ ଏ କେସରେ ଛନ୍ଦି ହୋଇଥିବା ଡିଏଫଓ (DFO)ଙ୍କୁ ଜେରା କରିବାକୁ ପୋଲିସ କହିଆସୁଛି । ମାତ୍ର ଗୁରୁବାର ବି ଡିଏଫଓ ସଂଗ୍ରାମ ବେହେରାଙ୍କୁ ଡକାଯାଇନି କି ଜେରା କରିନି ପୋଲିସ । ତେଣୁ ସୌମ୍ୟଙ୍କ ପରିବାର ଲୋକଙ୍କ ଆଶା ଡିଏଫଓଙ୍କୁ ଜେରା ପରେ ଡି-କୋଡ୍ ହୋଇଯିବ ସୌମ୍ୟଙ୍କ ମୃତ୍ୟୁ ମିଷ୍ଟ୍ରୀର ସବୁ ସସପେନ୍ସ।