ଭଡ଼ାରେ ଲାଗିଛି ସରକାରଙ୍କ ଫାଇଲିନ ସହାୟତା ପକ୍କା ଘର, ଚୁପ ବସିଛନ୍ତି ବଡିଓ

ଅବହେଳା କାରଣରୁ ଦୀର୍ଘ ବର୍ଷ ହେଲା ବାସଗୃହ ପାଇ ପାରୁନାହାନ୍ତି ଖୋର୍ଦ୍ଧା ଜିଲ୍ଳା ଟାଙ୍ଗୀ ବ୍ଲକ୍ ମଙ୍ଗଳାଯୋଡ଼ିର ହିତାଧିକାରୀ

ଭଡ଼ାରେ ଲାଗିଛି ସରକାରଙ୍କ ଫାଇଲିନ ସହାୟତା ପକ୍କା ଘର, ଚୁପ ବସିଛନ୍ତି ବଡିଓ
ସୌଜନ୍ୟ: ସୋସିଆଲ ମିଡିଆ

ସୂର୍ଯ୍ୟନାରାୟଣ ମହାନ୍ତି, ଖୋର୍ଦ୍ଧା: ଅବହେଳା କାରଣରୁ ଦୀର୍ଘ ବର୍ଷ ହେଲା ବାସଗୃହ ପାଇ ପାରୁନାହାନ୍ତି ଖୋର୍ଦ୍ଧା ଜିଲ୍ଳା ଟାଙ୍ଗୀ ବ୍ଲକ୍ ମଙ୍ଗଳାଯୋଡ଼ିର ହିତାଧିକାରୀ । ଫାଇଲିନରେ ସର୍ବସ୍ୱ ହରାଇଥିବା ଲୋକଙ୍କ ପାଇଁ ବିଶ୍ୱ ବ୍ୟାଙ୍କ୍ ପକ୍ଷରୁ ୩ ଲକ୍ଷ ଟଙ୍କା ବ୍ୟୟରେ ନିର୍ମିତ ହୋଇଥିବା ୧୩ଟି କୋଠା ମଧ୍ୟରୁ ୧୦ ପକ୍କାଘର ଏବେ ଭୂତକୋଠି ପାଲଟିବାକୁ ବସିଲାଣି । କଲୋନୀରେ ମାତ୍ର ୩ଟି କୋଠାରେ ହିତାଧିକାରୀ ରହୁଥିବା ବେଳେ, ଅନ୍ୟ କେତୋଟି ଗୃହକୁ ଚଞ୍ଚକତା କରି ନେଇଥିବା ଲୋକେ ଏବେ ଭଡ଼ାରେ ଲଗାଇଥିବା ଅଭିଯୋଗ ହୋଇଛି, ଯାହାକୁ ନେଇ ପ୍ରକୃତ ହିତାଧିକାରୀ ଅସନ୍ତୋଷ ବ୍ୟକ୍ତ କରିଛନ୍ତି ।

ଖୋର୍ଦ୍ଧା ଜିଲ୍ଲା ମଙ୍ଗଳାଯୋଡ଼ି ଗ୍ରାମପଞ୍ଚାୟତରେ ବିଶ୍ୱବ୍ୟାଙ୍କ ସହାୟତାରେ ନିର୍ମାଣ ହୋଇଥିବା ଘର । ବାତ୍ୟା ଫାଇଲିନରେ ଚିଲିକା କୂଳବର୍ତ୍ତୀ ମଙ୍ଗଳାଯୋଡ଼ି ଗ୍ରାମପଞ୍ଚାୟତର ଅନେକ ପରିବାର କ୍ଷତିଗ୍ରସ୍ତ ହୋଇ ସର୍ବହରା ହୋଇଥିଲେ । ସେହି ସମୟରେ ବିଶ୍ୱବ୍ୟାଙ୍କ ସହାୟତାର ହାତ ବଢାଇଥିଲା । ପରିବାର ପିଛା ୩ଲକ୍ଷ ୨୦ହଜାର ଟଙ୍କା ସହ ଜାଗା ଯୋଗାଇ ଘର କରିଥିଲା । ସରକାର ବିପନ୍ନଙ୍କ ପରିବାରକୁ ଚିହ୍ନଟ କରି ୧୩ଜଣଙ୍କୁ ଘର ଦେଇଥିଲେ । ମାତ୍ର ଏଠାରେ ୩ଟି ପରିବାର ରହୁଥିବା ବେଳେ, ଅନ୍ୟମାନେ ଘର ଗୁଡ଼ିକ ଭଡ଼ାରେ ଦେଇଥିବା ଦେଖିବାକୁ ମିଳିଛି । ଏହି କଲୋନୀକୁ ଯିବାପାଇଁ ସ୍ଥାୟୀ ରାସ୍ତାଟିଏ ନାହିଁ କି ପାନୀୟ ଜଳର ସୁବିଧା ବି ନାହିଁ । ଏପରିକି ବିପନ୍ନଙ୍କ ପରିବାରକୁ ସ୍ଥାୟୀ ଜମିପଟ୍ଟା ମଧ୍ୟ ମିଳିନାହିଁ, ଯାହାକୁ ନେଇ ହିତାଧିକାରୀମାନେ ଅସନ୍ତୋଷ ବ୍ୟକ୍ତ କରିଛନ୍ତି ।

ବାତ୍ୟା ଫାଇଲିନ ଭଳି ହୁଡ଼ହୁଡ଼, ତିତିଲି ଓ ଫନି ଭଳି ପ୍ରାକୃତିକ ବିପର୍ଯ୍ୟୟର ସାମ୍ନା କରିଛନ୍ତି ମଙ୍ଗଳାଯୋଡ଼ି ଗ୍ରାମବାସୀ । ଏଠାରେ ନିର୍ମାଣ ହୋଇଥିବା ଘରକୁ କେତେକ ବିପନ୍ନ, ମାସିକ ଭଡ଼ା ଏକ ହଜାର ଟଙ୍କା ଦରରେ ରହିଥିବା କହିଛନ୍ତି । ଏପରିକି ରାଜନୈତିକ ଚାପରେ କେତେକ ଲୋକେ ଏହି ଘରକୁ ହାତେଇ ଥିବା ବେଳେ, ଅନେକ ହିତାଧିକାରୀ ଏବେବି ଅଧାଭଙ୍ଗା ଘରେ ଅତ୍ୟନ୍ତ ଦୟନୀୟ ଅବସ୍ଥାରେ ରହୁଥିବା ଅଭିଯୋଗ କରିଛନ୍ତି । ଏନେଇ ଜୀ ଓଡ଼ିଶା ଟିମ ଟାଙ୍ଗୀ ବିଡ଼ିଓଙ୍କୁ ପଚାରିବାରୁ ସେ କ୍ୟାମେରା ସମ୍ମୁଖରେ କିଛି କହି ନ ଥିଲେ ।