Crime News: ചാക്കയിൽ വയോധികയെ ക്രൂരമായി ഉപദ്രവിച്ച് അധ്യാപികയായ മകൾ

തിരുവനന്തപുരം: ചാക്കയില്‍ വയോധികയായ അമ്മയ്ക്ക് മകളുടെ ക്രൂരപീഡനമെന്ന് റിപ്പോർട്ട്. ചാക്കയില്‍ താമസിക്കുന്ന അധ്യാപികയായ മകളാണ് 80 വയസ്സിലേറെ പ്രായമുള്ള അമ്മയെ ക്രൂരമായി ഉപദ്രവിച്ചത്. അധ്യാപിക അമ്മയുടെ ശരീരത്തില്‍ ചൂടുവെള്ളം ഒഴിച്ചെന്നും നിലത്തിട്ട് വലിച്ചിഴച്ചെന്നുമാണ് പരാതി. 

ഈ അധ്യാപികയുടെ മകള്‍ തന്നെയാണ് മുത്തശ്ശിയെ ഉപദ്രവിക്കുന്ന വിവരം പോലീസിനെ അറിയിച്ചത്. ഇതിന്റെ ദൃശ്യങ്ങളും പെണ്‍കുട്ടി പോലീസിന് കൈമാറിയിട്ടുണ്ട്.  ചാക്കയില്‍ അധ്യാപികയായ മകളോടൊപ്പം താമസിക്കുന്ന വയോധിക വര്‍ഷങ്ങളായി ഇവരുടെ ഉപദ്രവം നേരിടുന്നുവെന്ന് പെണ്‍കുട്ടി പരാതിയില്‍ വ്യക്തമാക്കിയിട്ടുണ്ട്. അമ്മ മുത്തശ്ശിയെ നിരന്തരം ഉപദ്രവിക്കാറുണ്ടെന്നും സ്‌ട്രോക്ക് വന്നിട്ടും അതിനുള്ള ചികിത്സയോ മരുന്നോ നല്‍കാറില്ലെന്നും പെണ്‍കുട്ടി പോലീസിനോട് പറഞ്ഞു. 

വിദേശത്തായിരുന്ന പെണ്‍കുട്ടി കഴിഞ്ഞ സെപ്റ്റംബറിലായിരുന്നു നാട്ടില്‍ തിരിച്ചെത്തിയത്. ഈ സമയത്തും അമ്മ മുത്തശ്ശിയെ ഉപദ്രവിക്കുന്നത് കണ്ട പെണ്‍കുട്ടി അമ്മയെ വിലക്കിയെങ്കിലും അവർ അത് കേട്ടില്ല. മാത്രമല്ല മുത്തശ്ശിക്കായി വാദിച്ച മകളോട് വീട്ടില്‍നിന്ന് ഇറങ്ങിപ്പോകാനും ഇവര്‍ ആവശ്യപ്പെട്ടിരുന്നു. കഴിഞ്ഞ ഒക്ടോബറില്‍ പെണ്‍കുട്ടി അമ്മയ്‌ക്കെതിരേ പേട്ട പോലീസില്‍ പരാതി നൽകിയെങ്കിലും മകൾക്ക് മാനസിക പ്രശ്നമുണ്ടെന്നും മകൾ പറയുന്നത് കാര്യമാക്കേണ്ടതില്ലെന്നും അധ്യാപിക പോലീസിനെ തെറ്റിദ്ധരിപ്പിക്കുകയായിരുന്നു.

ഇവരുടെ ഉപദ്രവം കാരണം പെൺകുട്ടിയും നിലവിൽ വീട്ടിൽ നിന്നും താമസം മാറ്റിയിരുന്നു.  ശേഷം കഴിഞ്ഞ ദിവസമാണ് അമ്മ മുത്തശ്ശിയെ ഉപദ്രവിക്കുന്ന ദൃശ്യങ്ങൾ സഹിതം പെൺകുട്ടി വീണ്ടും പോലീസിന് പരാതി നൽകിയത്. തന്റെ മുത്തശ്ശിയെ എത്രയും വേഗം ആ വീട്ടിൽ നിന്നും സുരക്ഷിതമായ ഒരിടത്തേക്ക് മാറ്റണമെന്നാണ് പെൺകുട്ടി പോലീസിൽ പരാതി നൽകിയിരിക്കുന്നത്. വനിതാ കമ്മീഷനും മനുഷ്യാവകാശ കമ്മീഷനും ഇക്കാര്യം ചൂണ്ടിക്കാട്ടി പെൺകുട്ടി പരാതി നൽകിയിട്ടുണ്ട്.