మగతనం అంటే.. తాగి ఉన్న అమ్మాయితో కూడా మిస్‌ బిహేవ్‌ చేయకుండా ఉండటం! ఊర మాస్‌ ట్రైలర్‌

Kiran Abbavaram's Nenu Meeku Baga Kavalsinavadini Trailer released: కిరణ్‌ అబ్బవరం హీరోగా తెరకెక్కిన తాజా చిత్రం 'నేను మీకు బాగా కావాల్సినవాడిని'. 'యస్ఆర్ కల్యాణ మండపం' దర్శకుడు శ్రీధర్ గాదె దర్శకత్వంలో వస్తున్న ఈ సినిమాను కోడి రామకృష్ణ ప్రథమ కుమార్తె కోడి దివ్య దీప్తి నిర్మిస్తున్నారు. కిరణ్‌ సరసన సంజనా ఆనంద్‌, సోనూ ఠాకూర్‌ కథానాయికలుగా నటించారు. కామెడీ, యాక్షన్‌ ఎంటర్‌టైన్‌గా తెరకెక్కిన 'నేను మీకు బాగా కావాల్సినవాడిని' సినిమా సెప్టెంబర్ 16 ప్రేక్షకుల ముందుకురానుంది. 

పవర్ స్టార్ పవన్‌ కల్యాణ్‌ 'నేను మీకు బాగా కావాల్సినవాడిని' సినిమా ట్రైలర్‌ను గురువారం విడుదల చేసి.. చిత్ర బృందానికి శుభాకాంక్షలు తెలిపారు. రెండు నిమిషాల 25 సెకండ్ల నిడివిగల ఈ సినిమా ట్రైలర్‌.. నాలాంటి చాలామంది తల్లిదండ్రులు కూతురు పుడితే ఏమనుకుంటారో తెలుసా? అనే సన్నివేశంతో ప్రారంభమైంది. 'మామా నీ కూతురు ప్రేమించినోడు మెతక అనుకుంటున్నావేమో.. కాస్ట్యూమ్, కళ్ళజోడు చూస్తే అర్ధమవడంలే.. మాస్ ఊర మాస్‌' అంటూ హీరో కిరణ్‌ అబ్బవరం ఎంట్రీ ఇస్తాడు. 

'నేను అబ్బాయిల ముందు నడవను.. మేము అమ్మాయిల ముందు నడవం', 'అమ్మాయిలు అంటే నీకెందుకురా అంత పిచ్చి', 'మగతనం అంటే మామూలుగా ఉన్న అమ్మాయితో మంచిగా ఉండటం కాదు.. తాగి ఉన్న అమ్మాయితో కూడా మిస్‌ బిహేవ్‌ చేయకుండా ఉండటం', 'అబ్బాయిలు ఇంతగా తాగాలంటే.. పెద్ద కారణం ఉండాల్సిన అవసరం లేదు. కానీ ఓ అమ్మాయి ఇంతలా తాగుతుందంటే..  ఏదో బలమైన కారణమే ఉండాలి' అనే డైలాగ్స్ ఆకట్టుకుంటున్నాయి. 

'నేను మీకు బాగా కావాల్సినవాడిని' ట్రైలర్‌ చూస్తే.. డ్రైవర్‌, సాఫ్ట్‌వేర్‌ ఇంజినీర్‌ల ప్రేమకథగా ఈ చిత్రం తెరకెక్కినట్టు తెలుస్తోంది. కామెడీ, యాక్షన్‌, ఎమోషన్‌.. అన్ని అంశాలతో ఈ సినిమా రూపొందినట్టు ట్రైలర్‌ చూస్తే ఇట్టే అర్థమవుతోంది. ఈ సినిమాలో గెటప్‌ శ్రీను, బాబా భాస్కర్‌, సిధ్ధార్ద్ మీన‌న్‌, ఎస్వి కృష్ణారెడ్డి, భరత్ రొంగలి కీలక పాత్రలో నటించారు. ఈ సినిమాకు మెలోడీ బ్ర‌హ్మ మ‌ణిశ‌ర్మ సంగీతాన్ని అందించారు. 

స్థానికం నుంచి అంతర్జాతీయం వరకు.. క్రీడలు, వినోదం, రాజకీయాలు, విద్య, ఉద్యోగాలు, హెల్త్, లైఫ్‌స్టైల్ .. A to Z అన్నిరకాల వార్తలను తెలుగులో పొందడం కోసం ఇప్పుడే Zee తెలుగు న్యూస్ యాప్ డౌన్‌లోడ్ చేసుకోండి.