`భరత్‌ అనే నేను` సినిమా అద్భుతం :జూ.ఎన్టీఆర్

'భరత్ అనే నేను' సినిమా మహేష్ కెరీర్‌లోనే బిగ్గెస్ట్ హిట్‌గా నిలిచింది. ఏప్రిల్ 20వ తేదీ విడుదలైన ఈ సినిమా రికార్డు కలెక్షన్లను సాధిస్తోంది. విడుదలైన రెండు రోజులకే 100కోట్ల మైలురాయికి చేరుకుంది. ఈ సినిమా ఘన విజయం సాధిస్తుండటంతో పలువురు సినీప్రముఖులు ఈ చిత్రంపై ప్రశంసల జల్లులు కురిపిస్తున్నారు. తాజాగా జూనియర్ ఎన్టీఆర్ కూడా ఈ చిత్రంపై స్పందించారు.

'సామాజిక బాధ్యతలను కమర్షియల్‌ అంశాలతో మిళితం చేసి సినిమాగా రూపొందించడం అంత సులువు కాదు. ఈ రెండింటినీ భరత్‌ అనే నేను చిత్రంలో ఎంతో గొప్పగా చూపించిన కొరటాల శివకు, చక్కటి నటనను ప్రదర్శించిన మహేష్‌బాబుకు శుభాకాంక్షలు' అంటూ సోషల్‌ మీడియాలో హీరో జూ.ఎన్టీఆర్‌ ట్వీట్‌ చేశారు. మరో ట్వీట్ లో ఎన్టీఆర్‌ స్పందిస్తూ, 'నిజాయితీ కలిగిన అద్భుతమైన సినిమా ఇది. దీనిని రూపొందించిన చిత్ర బృందం అంతటికీ నా అభినందనలు తెలియజేస్తున్నా' అని అన్నారు.

ఎస్‌.ఎస్‌.రాజమౌళి, కల్యాణ్‌రామ్‌, రకుల్‌ప్రీత్‌సింగ్‌, హరీష్‌శంకర్‌, వంశీ పైడిపల్లి, సుధీర్‌బాబు, రాజ్‌తరుణ్‌, నిఖిల్‌, మెహరీన్‌ తదితరులు కూడా భరత్‌ అనే నేను చిత్రబృందాన్ని ప్రశంసించారు.