యంగ్ టైగర్ ఎన్టీఆర్ మొదటిసారిగా మాటల మాంత్రికుడు త్రివిక్రమ్ దర్శకత్వంలో నటించిన సినిమా అరవింద సమేత ఈ అక్టోబర్ 11న అభిమానుల ముందుకు రానుంది. అయితే, అంతకన్నా ముందుగా అక్టోబర్ 2న హైదరాబాద్‌లో అరవింద సమేత ప్రీ రిలీజ్ ఈవెంట్‌ను వేడుకగా జరుపుకునేందుకు నిర్మాతలు ప్లాన్ చేశారు. సాయంత్రం 6 గంటల నుంచి ప్రారంభం కానున్న ఈ ఫంక్షన్‌కి హైటెక్స్‌లోని నోవోటెల్ హోటల్ వేదిక కానుంది. అరవింద సమేత ప్రీ రిలీజ్ ఈవెంట్‌ జరగనుందనే సమాచారం అయితే ఉంది కానీ ఈ వేడుకకు ముఖ్య అతిథులుగా ఎవరు వస్తున్నారా అనే సందేహాలకు మాత్రం క్లారిటీ లేకపోవడం ఎన్టీఆర్ అభిమానులను సస్పెన్స్‌కు గురిచేస్తోంది. అయితే, తాజాగా టాలీవుడ్ సినీవర్గాలు చెప్పుకుంటున్న సమాచారం ప్రకారం ఈ సినిమా ఫంక్షన్‌కు ఏపీ ముఖ్యమంత్రి నారా చంద్రబాబు నాయుడు, బాలకృష్ణ ఇద్దరూ స్పెషల్ గెస్ట్‌లుగా విచ్చేయనున్నారని తెలుస్తోంది. 


టాలీవుడ్ సినీవర్గాల్లో జరుగుతున్న ఈ ప్రచారంపై ఇంకా ఎటువంటి అధికారిక ప్రకటన లేనప్పటికీ.. అటు నిర్మాతల నుంచి కూడా ఈ వార్తలను ఖండిస్తూ ఎటువంటి ప్రకటన చేయకపోవడం గమనార్హం.