`ఎన్టీఆర్‌` బయోపిక్: 1984లో ఎన్టీఆర్‌, చంద్రబాబు..

వినాయక చవితిని పురస్కరించుకొని 'యన్‌.టి.ఆర్‌' చిత్ర బృందం అభిమానులకు మరో సర్‌ప్రైజ్ ఇచ్చింది. బాలయ్య, రానాల 'యన్‌టీఆర్‌' కొత్త పోస్టర్‌ను విడుదల చేసింది. ఈసారి మామా అల్లుళ్లు ఇద్దరూ కలిసే వచ్చారు. ఈ పోస్టర్‌లో ఎన్టీఆర్ .. తన అల్లుడు చంద్రబాబుపై ప్రేమగా చేయివేసి మాట్లాడుతున్నట్లుగా చూపించారు.

ఈ సినిమాకు సంబంధించి ఇప్పటివరకు ఎన్టీఆర్‌గా బాలకృష్ణ, ఆయన అల్లుడు, ఆంధ్రప్రదేశ్‌ ముఖ్యమంత్రి చంద్రబాబు నాయుడుగా రానా దగ్గుబాటి ఫస్ట్‌లుక్స్‌ మాత్రమే బయటకి వచ్చాయి. అయితే, ఆ లుక్స్ కంటే ఈ పోస్టరే అభిమానులను తెగ ఆకట్టుకొంటోంది. వినాయక చవితి శుభాకాంక్షలు తెలుపుతూ.. 1984లో ఎన్టీఆర్, చంద్రబాబు అంటూ ఈ పోస్టర్‌ను ట్విట్టర్ ద్వారా రానా పంచుకున్నారు.

క్రిష్ జాగర్లమూడి దర్శకత్వం వహిస్తున్న ఈ మూవీ ఎన్‌బీకే ఫిలిమ్స్ బ్యానర్‌పై బాలకృష్ణ నిర్మిస్తున్నారు. ఎన్టీఆర్‌ సతీమణి బసవతారకం పాత్రలో బాలీవుడ్‌ నటి విద్యాబాలన్‌, ఏఎన్నార్ పాత్రలో ఆయన మనవడు సుమంత్‌ నటిస్తున్నారు. తెలుగుతో పాటు తమిళం, హిందీలోనూ విడుదలవుతున్న ఈ సినిమాను వచ్చే ఏడాది సంక్రాంతి కానుకగా ప్రేక్షకుల ముందుకు తీసుకురానున్నారు.