ఇటలీలో రణ్‌వీర్ సింగ్-దీపిక పదుకొణె పెళ్లి

బాలీవుడ్‌లో మరో ప్రేమ జంట పెళ్లికి రెడీ అయ్యారు. గతకొంతకాలంగా బాలీవుడ్ నటులు రణ్‌వీర్ సింగ్, దీపిక పదుకొణెలు ప్రేమించుకుంటున్న సంగతి తెలిసిందే. వీరి వివాహం ఈ ఏడాది నవంబర్ 12-16 తేదీల్లో జరగనుందని సమాచారం. ఈ విషయాన్ని ప్రముఖ దినపత్రిక డీఎన్ఏ తన కథనంలో పేర్కొంది. డెస్టినేషన్ వెడ్డింగ్ ప్లాన్ చేసిన ఈ జంట.. ఇటలీలో పెళ్లి చేసుకోనుంది. మీడియాకి దూరంగా.. పరిమిత సంఖ్యలో కుటుంబీకులతో పాటు షారుఖ్ ఖాన్, అర్జున్ కపూర్ సహా కొందరు బాలీవుడ్ ప్రముఖులు మాత్రమే ఈ వేడుకలో పాల్గొంటారు. ఇక బంధువులు, స్నేహితుల కోసం ముంబైలో గ్రాండ్‌గా రిసెప్షన్ ఏర్పాటు చేశారని సమాచారం.

గతంలో ఇదే తరహాలో రహస్యంగా క్రికెటర్ విరాట్ కోహ్లి, అనుష్క శర్మలు మీడియాకి దూరంగా ఇటలీలో వివాహం చేసుకున్న విషయం తెలిసిందే. రణ్‌వీర్-దీపికల నిశ్చితార్థం రహస్యంగా మాల్దీవుల్లో జరిగిందని బాలీవుడ్ మీడియా కోడై కూసింది. కానీ ఈ వార్తని అటు దీపక ఫ్యామిలీ గానీ, రణ్ వీర్ ఫ్యామిలీ కానీ ఖండించలేదు. ఆ తర్వాత పెళ్లి గురించి బోలెడన్ని వార్తలు వచ్చాయి. అయినా దీపిక గానీ, అటు రణ్‌వీర్ గానీ పెళ్లిపై స్పందించలేదు.