ఆ స్కూలులో తల్లిదండ్రుల చేత కూడా ప్రాజెక్టు వర్క్ చేయిస్తారట..!

చెన్నైలోని అన్నాల్ వయోలెట్ మెట్రిక్యులేషన్ స్కూల్ ఒక వినూత్న విధానానికి నాంది పలికింది. పిల్లలకు వేసవి సెలవులు ఇచ్చేటప్పుడు.. పిల్లల తల్లిదండ్రులకు వారి బాధ్యతలను తెలియజేయడానికి ఒక నవీన పద్ధతికి శ్రీకారం చుట్టింది. ఆ కొత్త పద్ధతిలో భాగంగా సెలవుల్లో పిల్లల తల్లిదండ్రులు పాఠశాల ఇచ్చిన ప్రాజెక్టు వర్కు  పూర్తి చేయాలని తెలిపింది. "హాలీడే అసైన్‌మెంట్‌" పేరుతో ఆ ప్రాజెక్టు వర్కును తల్లిదండ్రులు తప్పనిసరిగా చేసి.. సెలవులయ్యాక స్కూలుకి తీసుకొచ్చి ఇవ్వాలని పాఠశాల యాజమాన్యం తెలిపింది. ఆ ప్రాజెక్టు వర్కులో ఒక జాబితాని విడుదల చేసింది. ఆ జాబితాలో ఉన్న పనుల్లో కనీసం సగమైనా తల్లిదండ్రులు పూర్తిచేస్తే సంతోషిస్తామని.. ఆ పనులు కచ్చితంగా చేశామని చెప్పడానికి ఆధారాలుగా ఫోటోలను తీసి పంపిస్తే సరిపోతుందని పాఠశాల యాజమాన్యం పేర్కొంది

పిల్లల పట్ల తల్లిదండ్రులకు ఎంతవరకు అక్కర ఉందో తెలుసుకోవడానికే ఈ ప్రాజెక్టు అని.. తల్లిదండ్రులకు వారి బాధ్యతను గుర్తుచేసి.. వారి బిడ్డల బంగారు భవిష్యత్తుకు బాటలు వేయడానికి ఈ ప్రాజెక్టు ఎంతగానో ఉపయోగపడుతుందని పాఠశాల యాజమాన్యం పేర్కొంది

ఈ ప్రాజెక్టు వర్కులో భాగంగా ఈ క్రింది పేర్కొన్న జాబితాలోని పనుల్లో కనీసం సగమైనా తల్లిదండ్రులు కచ్చితంగా సెలవుల్లో చేయాల్సి ఉంటుంది 

* తల్లిదండ్రులు ప్రతీ రోజు పిల్లలతో కలిసి కనీసం రెండు పూటలైనా భోజనం చేయాలి. అలా భోజనం చేసేటప్పుడు పిల్లలకు ఆహారానికి సంబంధించిన ప్రాధాన్యాన్ని తెలపాలి. రైతన్నలు పంట పండించడం కోసం ఎంత కష్టపడుతున్నారో పిల్లలకు వివరించాలి. 
*తల్లిదండ్రులు పిల్లలకు తమ ప్లేట్లను తామే కడుక్కొనేలా అలవాటు చేయాలి. అలా అలవాటు చేసేటప్పుడు తమ పనులు తాము చేసుకోవడం వల్ల ఆత్మవిశ్వాసం పెరుగుతుందని చెప్పాలి
*తల్లిదండ్రులు వీలైతే పిల్లలకు ఏదో ఒక వంటకం స్వయంగా తయారుచేయడం నేర్పించాలి. కనీసం వారికి వారు ఫ్రూట్ సలాడ్ చేసుకొని తినేలాగైనా శిక్షణ ఇవ్వాలి.
*తల్లిదండ్రులు కనీసం రోజుకి 5 కొత్త ఆంగ్ల పదాలు నేర్చుకొని వాటిని ఒక నోటు పుస్తకంలో రాయాలి. వాటిని పిల్లలకు చెప్పాలి
*తల్లిదండ్రులు తమ పొరుగింటివారితో కలిసి మాట్లాడాలి. వారిని నవ్వుతూ పలకరించాలి. వారికి పిల్లలు ఉంటే వారితో కూడా స్నేహపూర్వకంగా మెలగమని తమ పిల్లలకు తెలపాలి.
*తల్లిదండ్రులు తమ పిల్లలను వారి తాతయ్య, అమ్మమ్మలకు చేరువ చేయాలి. వారి జీవితంలో జరిగిన ముఖ్యమైన సంఘటనలకు పిల్లలకు చెప్పాలి
*తల్లిదండ్రులు ఉద్యోస్తులైతే వారికి ఈ ప్రాజెక్టు గురించి తమ కంపెనీ వారికి చెప్పి.. పిల్లలతో కలిసి ఓ రోజు ఆఫీసు చూసేందుకు పర్మిషన్ తీసుకోవాలి. పరిష్మన్ వచ్చినట్లయితే పిల్లలను తమ పనిప్రదేశానికి తీసుకెళ్లి.. తాము ఎలాంటి పని చేస్తున్నారో వారికి విశదీకరించి చెప్పాలి
*తల్లిదండ్రులు పిల్లలను మార్కెట్‌కు తీసుకెళ్లాలి.. వారికి కూరగాయల పట్టిక, ధరల గురించి తెలియజేయాలి
*తల్లిదండ్రులు పిల్లలకు ఏవైనా తిరునాళ్లకు, జాతరలకు తీసుకెళ్లాలి. వాటి ప్రాధాన్యాన్ని వివరించాలి
*తల్లిదండ్రులు పిల్లలకు పూలమొక్కలు పెంచేలా శిక్షణ ఇవ్వాలి. 
*తల్లిదండ్రులు పిల్లలకు తమ చిన్నతనంలో జరిగిన ఆసక్తికరమైన విషయాల గురించి తెలియజేయాలి
*తల్లిదండ్రులు పిల్లలకు మూగజీవాల పట్ల ప్రేమతో ఉండాలని తెలిపాలి. వారికి ఇష్టమైన పెంపుడు జంతువు గురించి తెలుసుకొని.. దాని బాధ్యతను అప్పగించాలి. 
*తల్లిదండ్రులు పిల్లలకు జానపద గీతాలను పాడడం నేర్పించాలి
*తల్లిదండ్రులు పిల్లలకు కథల పుస్తకాలను కానుకగా ఇవ్వాలి. 

తల్లిదండ్రులు ఈ పనుల్లో కనీసం సగం వాటినైనా పూర్తి చేసి.. ఈ పనులు చేసినట్లు ఫోటోలను ఆధారాలుగా చూపిస్తూ ప్రాజెక్టు స్కూలుకి అందివ్వాలి. ఉత్తమమైన ప్రాజెక్టు చేసిన తల్లిదండ్రులకు స్కూలు ప్రోత్సాహక బహుమతి కూడా ఇస్తుందట.