విమాన ప్రయాణం చేయాలనుకొనే వారికోసం ఇండిగో భారీ ఆఫర్లను ప్రకటించింది. రూ.999 నుండి టికెట్ ధరలను అందిస్తున్న ఇండిగో.. నేటి నుండి సెప్టెంబర్ 6 వరకు ఈ ఆఫర్‌ను వినియోగదారులకు అందుబాటులోకి తెచ్చింది. 10 లక్షల విమాన సీట్లను ఈ ఆఫర్ కింద అందుబాటులో ఉంచనుంది. కాగా ఇలా బుక్ చేసుకున్న టికెట్లతో సెప్టెంబర్ 18 నుండి మార్చి 30, 2019 వరకు ప్రయాణించవచ్చు. కాగా ఇంటర్నేషనల్ టికెట్లను కంపెనీ రూ.3199కు అందుబాటులో ఉంచింది.


COMMERCIAL BREAK
SCROLL TO CONTINUE READING

ఈ ఆఫర్‌ కింద మొబైల్‌ వ్యాలెట్‌ మొబిక్విక్‌ ద్వారా టికెట్లను బుక్‌ చేసుకునేవారికి రూ. 600 సూపర్‌ క్యాష్‌ అమౌంట్‌ను ఇండిగో ఆఫర్‌ చేస్తోంది. సోమవారం (సెప్టెంబర్‌ 3) నుంచి నాలుగురోజుల పాటు (సెప్టెంబర్ 6) తాము ప్రకటించిన నాలుగు రోజుల 'ఫెస్టివ్‌ సేల్‌' ఆఫర్‌లో రూ. 999 నుంచి విమాన చార్జీలు అందుబాటులో ఉంటాయని, కస్టమర్లకు ఇది మంచి అవకాశమని ఇండిగో చీఫ్‌ కమర్షియల్‌ ఆఫీసర్‌ విలియం బౌల్టర్‌ చెప్పారు.


కాగా ఇండిగో ఇలాంటి ప్రకటన చేయడం ఇది రెండోసారి. ఈ ఏడాది జులైలో తన 12వ వార్షికోత్సవం సందర్భంగా 12లక్షల సీట్లను కారుచౌకగా ప్రయాణికులకు అందించేందుకు నాలుగు రోజుల మెగాసేల్‌ను ప్రారంభించింది. ప్రారంభ టికెట్ ధర రూ.1,212గా నిర్ణయించింది.


అంతర్జాతీయంగా ముడిచమురు ధరల పెరుగుదలతో ఇబ్బందులు ఎదుర్కొంటున్న ఇండిగో ఈ తరహా ఆఫర్లతో ఆదాయాన్ని సమకూర్చుకునేందుకు ప్రయత్నిస్తోంది. 1,100 విమానాలను కలిగి ఉన్న ఇండిగో రోజుకు ఎనిమిది అంతర్జాతీయ, 52 దేశీయ గమ్యస్ధానాలకు ప్రయాణీకులను చేరవేస్తోంది.