Nirbhaya Mother Asha Devi: రేపిస్టులను విడిచిపెట్టాలన్న ఇందిరా జైసింగ్‌పై నిర్భయ తల్లి ఆగ్రహం

న్యూఢిల్లీ: నిర్భయ గ్యాంగ్ రేప్, హత్య కేసు దోషులకు క్షమాభిక్ష పెట్టాలని సీనియర్ న్యాయవాది ఇందిరా జైసింగ్ కోరడం వివాదానికి కేంద్ర బిందువు అవుతోంది. దివంగత ప్రధాని రాజీవ్ గాంధీ దోషులను సోనియా గాంధీ క్షమించినట్లుగానే.. నిర్భయ తల్లి నలుగురు దోషులను క్షమించాలని సీనియర్ న్యాయవాది కోరారు. ఇందిరా జైసింగ్ కామెంట్లపై నిర్భయ తల్లి ఆశా దేవి తీవ్ర స్థాయిలో మండిపడ్డారు. ఇందిరా లాంటి వారి వల్లే అత్యాచార కేసులో దోషులకు శిక్ష పడటం లేదన్నారు.

తనకు అలాంటి సలహా ఇచ్చేందుకు ఇందిరా జైసింగ్ ఎవరు, ఆమెకు ఎంత ధైర్యమని నిర్భయ తల్లి ప్రశ్నించారు. మహిళా న్యాయవాది వ్యాఖ్యలకు స్ట్రాంగ్‌గా బదులిచ్చారు. తాను సుప్రీంకోర్టులో పలు పర్యాయాలు ఇందిరను కలిశానని, అయితే ఒక్కసారి కూడా తన యోగక్షేమాలు అడగలేదని ఆశా దేవి వెల్లడించారు. కానీ నిర్భయ కేసు దోషుల గురించి ఆమె మాట్లాడుతుంది. రేపిస్టులకు మద్దతు తెలుపుతూ పబ్బం గడుపుతోంది. ఆమె లాంటి వ్యక్తుల వల్లే అత్యాచార ఘటనలు ఇంకా కొనసాగుతున్నాయని’ నిర్భయ తల్లి ఆందోళన వ్యక్తం చేశారు.