జర్నలిస్టుపై ఆర్‌ఎస్‌ఎస్ సభ్యులు దాడి
కేరళలోని మల్లప్పురం ప్రాంతంలో ఓ ఫోటో జర్నలిస్టులో పై ఇద్దరు ఆర్‌ఎస్‌ఎస్ కార్యకర్తలు దాడి చేశారు.
కేరళలోని మల్లప్పురం ప్రాంతంలో ఓ ఫోటో జర్నలిస్టు పై ఇద్దరు ఆర్‌ఎస్‌ఎస్ కార్యకర్తలు దాడి చేశారు. వివరాల్లోకి వెళితే నిన్న సాయంత్రం నడిరోడ్డుపై ధర్నాకి దిగిన దాదాపు 100 మంది ఆర్‌ఎస్‌ఎస్ కార్యకర్తలు వాహనాలను అటకాయించారు. ఇటీవలే కేరళలోని ఆర్‌ఎస్‌ఎస్ కార్యాలయంపై జరిగిన దాడిని ఖండిస్తూ ఈ నిరసనను చేపట్టారు.
అయితే అలా నిరసన చేస్తున్నప్పుడు ఇద్దరు ఆర్‌ఎస్‌ఎస్ కార్యకర్తలు ఓ వాహన చోదకుడిని కొట్టారు. ఆ ఘటనను ఓ జర్నలిస్టు వీడియో తీశారు. ఈ విషయాన్ని గమనించిన ఆ ఇద్దరు యువకులు మల్లప్పురం ప్రెస్ క్లబ్బుకి వచ్చి మరీ జర్నలిస్టు మీద చేయి చేసుకున్నారు. ఆయనను తీవ్రంగా గాయపరిచారు. ఈ విషయాన్ని సీరియస్‌గా తీసుకున్న జర్నలిస్టు సంఘాలు తీవ్రంగా స్పందించాయి. పోలీస్ స్టేషనులో ఫిర్యాదు కూడా చేశాయి.
ఈ కేసులో ప్రస్తుతం జర్నలిస్టుపై దాడికి పాల్పడిన ఇద్దరు ఆర్‌ఎస్‌ఎస్ కార్యకర్తలను పోలీసులు అరెస్టు చేశారు. అలాగే పర్మిషన్ లేకుండా రోడ్డు బ్లాక్ చేసి వాహన చోదకులను ఇబ్బందులకు గురిచేసినందుకు మరో 10 మంది కార్యకర్తలపై పోలీసులు కేసులు నమోదు చేశారు.