Heavy Rains: మరింత బలపడిన అల్పపీడనం.. 24 గంటల్లో ఈ జిల్లాల్లో అతి భారీ వర్షాలు..

బంగాళాఖాతంలో ఏర్పడిన అల్పపీడనం వల్ల భారీ వర్షాలు కురుస్తాయని వాతావరణ శాఖ హెచ్చరించింది. ముఖ్యంగా ఇది ఆంధ్రప్రదేశ్, తమిళనాడు రాష్ట్రాలపై తీవ్రంగా ఉంటుందని తెలిపింది.  

24 గంటలపాటు ఈ బలపడిన అల్పపీడనం వల్ల భారీ వర్షాలు కురుస్తాయి. కోస్తా, ఉత్తర ఆంధ్రప్రదేశ్‌ దిగా ఈ అల్పపీడనం పయనిస్తుంది. దీని ప్రభావం వల్ల నేడు విజయనగరం, శ్రీకాకుళం జిల్లాల్లో అతి భారీ వర్షాలు కురుస్తాయి.  

ఇక ఎన్టీఆర్‌, కృష్ణ, గుంటూరు, ప్రకాశం, నెల్లూరు, చిత్తూరు, తిరుపతి జిల్లాల్లో మోస్తారు వర్షాలు కురుస్తాయని వాతావరణ శాఖ తెలిపింది. ఈ నేపథ్యంలో మత్స్యకారులను కూడా వేటకు శనివారం వరకు వెళ్లకూడదని హెచ్చరించింది.  

తమిళనాడు గుండా ఈ అల్పపీడనం తీరం దాటే అవకాశం ఉంది ఈ నేపథ్యంలో ఎల్లుండి వరకు కూడా భారీ వర్షాలు కురిసే అవకాశం ఉంది. గంటకు 55 కిలోమీటర్ల వేగంతో గాలులు కూడా వీస్తాయి. వరికోతలకు వెళ్లే రైతులు కూడా అలెర్ట్‌గా ఉండాలని సూచనలు చేశారు.  

తీర ప్రాంత ప్రజలను కూడా సురక్షిత ప్రాంతాలకు తరలించేలా ప్రభుత్వం చర్యలు కూడా తీసుకుంది. ఇక భారీ వర్షాల నేపథ్యంలో ఆయా ప్రాంతాల్లో ముందస్తు స్కూళ్లకు సెలవులు కూడా ప్రకటిస్తున్నాయి. మరోవైపు తెలంగాణలో కూడా చలి తీవ్రత విపరీతంగా పెరిగింది.  

ముఖ్యంగా సాయంత్రం త్వరగా చీకటి పడటంతోనే చలిగాలుల తీవ్రత కూడా పెరిగింది. ఉదయం కూడా మంచు మబ్బులు కమ్మేస్తున్నాయి. ఎముకలు కొరికే చలి వేధిస్తోంది. ఉదయం 8 గంటలకు దాటిన తర్వాత కూడా మబ్బులు తొలిగే పరిస్థితి లేదు. వాహనదారులు డ్రైవింగ్‌ చేసేటప్పుడు జాగ్రత్తలు తీసుకోవాలి.  

ముఖ్యంగా పిల్లలు, వృద్ధులు ఈ చలిగాలుల సమయంలో ఆరోగ్యంపై జాగ్రత్తలు తగిన విధంగా తీసుకోవాలని భారత వాతావరణ శాఖ హెచ్చరించింది. కేవలం వేడిగా వండిన ఆహారం మాత్రమే తీసుకోవాలి. సీజనల్‌ జబ్బులు రాకుండా తగిన ఆరోగ్య జాగ్రత్తలు కూడా తీసుకోవాలని ఇప్పటికే వాతావరణ శాఖ హెచ్చరించింది.