నిదహాస్ ట్రైసిరీస్ ఫైనల్‌లో బంగ్లాదేశ్ పై భారత్ ఘన విజయం..!
ఆఖరి వరకు ఎంతో ఉత్కంఠతతో సాగిన ఫైనల్ మ్యాచ్‌లో భారత ఘన విజయం సాధించింది.
ఆఖరి వరకు ఎంతో ఉత్కంఠతతో సాగిన ఫైనల్ మ్యాచ్‌లో భారత్ ఘన విజయం సాధించింది. బంగ్లాదేశ్ నిర్దేశించిన 167 పరుగుల టార్గెట్‌ను భారత్ చివరి ఓవరులో దినేష్ కార్తిక్ చూపిన డేరింగ్ షాట్ల వల్ల పూర్తి చేసింది. ఈ మ్యాచ్ ద్వితీయార్థంలో భారత బ్యాట్స్‌మన్ రెచ్చిపోయి ఆడడంతో టీమిండియా నాలుగు వికెట్ల తేడాతో మ్యాచ్‌ను కైవసం చేసుకుంది. వికెట్ కీపర్ దినేశ్ కార్తిక్ 29 పరుగులు చేసి 8 బంతుల్లో నాలుగు ఫోర్లు, 3 సిక్సర్లు బాదడంతో మ్యాచ్ స్వరూపమే మారిపోయింది. భారత్ ముంగిట్లో సందడి చోటు చేసుకుంది. అంతకు ముందు కెప్టెన్ రోహిత్ శర్మ 42 బంతుల్లో 4 ఫోర్లు, 3 సిక్సర్లతో హాఫ్ సెంచరీ చేశాడు.
అయితే మ్యాచ్ మొత్తం చివరి ఓవరులో దినేశ్ కార్తిక్ చూపిన పోరాట పటిమ వల్లే మలుపు తిరిగిందని ఘంటాపథంగా చెప్పవచ్చు. ఇక బంగ్లాదేశ్ బౌలర్లలో రుబేల్ 2 వికెట్లు తీసి ఫరవాలేదనిపించుకున్నాడు ప్రథమార్థంలో మొత్తం భారత్ బౌలర్ల హవాయే కొనసాగింది. భారత బౌలర్లలో యజువేంద్ర చాహెల్ 3 వికెట్లు తీయగా, ఉన్కదత్ 2 వికెట్లు, వాషింగ్టన్ సుందర్ 1 వికెట్ తీశాడు. బంగ్లాదేశ్ తరఫున వారి బ్యాట్స్‌మన్లు షబ్బిర్ రెహ్మాన్ (77), మహ్మదుల్లా (21) మాత్రమే రాణించారు. ముఖ్యంగా మిడిల్ ఆర్డర్ విఫలమవ్వడం బంగ్లాదేశ్ కష్టాలకు కారణమైంది