Liquor sales : మద్యం ప్రియులకు మళ్లీ నిరాశే

హైద‌రాబాద్‌: లాక్ డౌన్ నేపథ్యంలో సాధారణ దుకాణాలు, అన్ని వ్యాపారాలతో పాటే బార్ అండ్ రెస్టారెంట్స్, మద్యం దుకాణాలు కూడా మూత పడిన నేపథ్యంలో లాక్ డౌన్ ఎప్పుడెప్పుడు ఎత్తేస్తారా ? ఎప్పుడెప్పుడు మళ్లీ గొంతు తడిచేసుకోవచ్చా అన్న చందంగా మద్యం ప్రియులు ఎదురుచూశారు. లాక్ డౌన్ ఎత్తేయగానే మళ్లీ ఎప్పుడు ఎటువంటి ఉపద్రవం ముంచుకొస్తుందో కనుక ఈసారి ముందస్తు జాగ్రత్తగా స్టాక్ కొని పెట్టుకోవాలని భావించిన వాళ్లూ కూడా లేకపోలేదు. ఇదే విషయమై సోషల్ మీడియాలో భారీ సంఖ్యలో దర్శనమిచ్చిన పోస్టులే అందుకు నిదర్శనం. అంతేకాదు.. ఇంకొందరైతే.. మద్యం దూరమయ్యాకా పిచ్చి పట్టినట్టుగా ప్రవర్తించిన ఘటనలు కూడా అనేకం వెలుగుచూశాయి. అలా లాక్ డౌన్ కారణంగా మద్యం దొరక్క జీవితంలో ఏదో కోల్పోయినట్టుగా ఫీలవుతున్న వాళ్లంతా లాక్ డౌన్ ఎప్పుడు ఎత్తేస్తారా అనే ఎదురుచూస్తున్నారు. ఇంకా ఎదురుచూస్తూనే ఉన్నారు. అయితే, వారి ఎదురుచూపులకు ఎప్పుడు ఫుల్‌స్టాప్ పడుతుందా అంటే అందుకు సమాధానం చెప్పడం కష్టమేనని తెలుస్తోంది. అందుకు ఓ కారణం లేకపోలేదు.

కేంద్ర ప్ర‌భుత్వం తాజాగా  లాక్ డౌన్‌పై కొన్ని ఆంక్షలను సడలించింది. కొన్ని రకాల వ్యాపారాలు, దుకాణాలు తిరిగి తెరుచుకునేందుకు వెస‌ులుబాటు క‌ల్పించింది. అయితే మరి మద్యం దుకాణాలు కూడా తిరిగి ప్రారంభిస్తారా ? మద్యం అమ్మకాలకు వీలు కల్పిస్తారా అనే సందేహాలు కూడా వ్యక్తమయ్యాయి. ఈ నేపథ్యంలో కేంద్ర హోంశాఖ సంయుక్త కార్య‌ద‌ర్శి పుణ్య స‌లిలా శ్రీవాత్స‌వ్ ఈ విషయంపై స్పందిస్తూ.. తాము ఇచ్చిన ఆదేశాలు కేవ‌లం నిత్యవసరాలు, ఇతర వ‌స్తువుల‌ను అమ్మే దుకాణాలకు మాత్ర‌మే వర్తిస్తుందని అన్నారు. గ్రామీణ ప్రాంతాలు, రద్దీ లేని చోట్ల దుకాణాలు తెరుచుకోవ‌చ్చు అని తెలిపారు. హెయిర్ సెలూన్స్, షాపింగ్ మాల్స్‌కి ప్ర‌స్తుతం ఎటువంటి మినహాయింపు లేద‌న్నారు. అలాగే మ‌ద్యం దుకాణాలు కూడా తెరిచేందుకు ఇంకా ఆదేశాలు వెలువడలేదని పుణ్య స‌లిలా శ్రీవాత్స‌వ్ స్ప‌ష్టం చేశారు.