మెగా బ్రదర్ నాగేంద్రబాబు కుమార్తె నిహారిక ‘ముద్దపప్పు ఆవకాయ’ వెబ్‌సిరీస్‌తో నటిగా పరిచయమైన సంగతి తెలిసిందే. ఆ తర్వాత ఆమె "ఒక మనసు" అనే సినిమాలో కూడా హీరోయిన్‌గా నటించింది. ప్రస్తుతం "నాన్నకూచి" అనే పేరుతో ఆమె మరో వెబ్ సిరీస్‌లో కూడా నటిస్తోంది. ఇందులో స్వయానా నాగబాబే ఆమెకు తండ్రిగా నటించడం విశేషం. అక్టోబరు 29 (నాగేంద్రబాబు పుట్టినరోజు) సందర్భంగా ఈ వెబ్ సీరిస్ ట్రైలర్‌ని విడుదల చేశారు. నిహారికే ఈ సీరిస్‌కు నిర్మాతగా వ్యవహరించడం గమనార్హం. ప్రణీత్ బ్రహ్మాండపల్లి దర్శకత్వం వహించే ఈ చిత్రానికి విద్యాసాగర్ ఎడిటర్‌గా, ఛాయాగ్రహకులుగా కూడా  వ్యవహరిస్తున్నారు. పింక్ ఎలిఫాంట్స్ పతాకంపై నిర్మితమవుతున్న ఈ సిరీస్ త్వరలోనే ప్రేక్షకుల ముందుకు రానుంది. తండ్రి, కూతుళ్ళ అనుబంధానికి అద్దంపట్టే విధంగా ఈ సిరీస్‌ను రూపొందిస్తున్నట్లు గతంలో వరుణ్‌తేజ్‌ ట్వీట్‌ చేశారు.ప్రస్తుతం నిహారిక, సుమంత్‌ అశ్విన్‌ సరసన ‘హ్యాపీ వెడ్డింగ్‌’ అనే చిత్రంలో నటిస్తున్నారు.