मातोश्री, कृष्णकुंजमुळे प्रश्न वाढतात - अजित पवार

www.24taas.com, झी मीडिया, मुंबई
राष्ट्रवादीचे नेते आणि उपमुख्यमंत्री अजित पवार यांनी शिवसेना आणि महाराष्ट्र नवनिर्माण सेनेनेला चिमटा काढलाय. अजित पवार यांनी पुन्हा सेना-मनसेला अंगावर घेतलेय. मातोश्री, कृष्णकुंजमुळे प्रश्न सुटण्याऐवजी वाढतात, अशी टीका केली.
कै. गोविंद बल्लाळ देवल यांच्या स्मृतिदिनानिमित्त अखिल भारतीय मराठी नाट्य परिषदेने आयोजित केलेल्या बक्षीस वितरण सोहळ्यात ते बोलत होते. जलसंपदा मंत्री सुनील तटकरे, नाट्य परिषदेचे अध्यक्ष मोहन जोशी, कार्यवाह दीपक करंजीकर, कोषाध्यक्ष लता नार्वेकर, मुंबई क्रिकेट असोसिएशनचे अध्यक्ष रवी सावंत आदी या वेळी उपस्थित होते. नाट्य परिषदेच्या बोधचिन्हाचे याप्रसंगी अनावरण करण्यात आले.
मराठी नाट्य-चित्रसृष्टी दोन गटांत विभागली आहे. फावल्या वेळेत कुणी मातोश्रीवर तर कोणी कृष्णकुंजवर धाव घेतो. कामापुरते वापरून घेणारे पक्ष देशात कमी नाहीत; मात्र केवळ तेथे जाऊन प्रश्न सुटण्याऐवजी वाढण्याचीही शक्यता नाकारता येत नाही. त्यामुळे योग्य काय ते ज्याचे त्याने ठरवावे, असा सल्ला पवार यांनी काल येथे दिला.