ದಕ್ಷಿಣ ಭಾರತದ ಮೊದಲ ಕಿಸಾನ್ ರೈಲು, ಆಂಧ್ರ ಪ್ರದೇಶದಿಂದ ನೇರವಾಗಿ ದೆಹಲಿ ತಲುಪಲಿರುವ ಹಣ್ಣು-ತರಕಾರಿಗಳು

ರೈತರ ಆರ್ಥಿಕ ಸ್ಥಿತಿಯನ್ನು ಸುಧಾರಿಸುವ ಸಲುವಾಗಿ ಪ್ರಧಾನಿ ನರೇಂದ್ರ ಮೋದಿ ಕಿಸಾನ್ ರೈಲು ಚಲಾಯಿಸುವುದಾಗಿ ಭರವಸೆ ನೀಡಿದರು. ಅದು ಈಗ ನಿಜವಾಗುತ್ತಿದೆ. ದಕ್ಷಿಣ ಭಾರತದಿಂದ ದೇಶದ ಎರಡನೇ ಮತ್ತು ದಕ್ಷಿಣ ಭಾರತದ ಮೊದಲ ಕಿಸಾನ್ ರೈಲು ಪ್ರಾರಂಭವಾಗಿದೆ.

ನವದೆಹಲಿ: ರೈತರ ಆರ್ಥಿಕ ಸ್ಥಿತಿ ಸುಧಾರಿಸಲು ಪ್ರಧಾನಿ ನರೇಂದ್ರ ಮೋದಿ (Narendra Modi) ಕಿಸಾನ್ ರೈಲು ಓಡಿಸುವುದಾಗಿ ಭರವಸೆ ನೀಡಿದ್ದು ಇದೀಗ ಅದು ನಿಜವಾಗುತ್ತಿದೆ. ದೇಶದಿಂದ ಎರಡನೇ ಕಿಸಾನ್ ರೈಲು ಮತ್ತು ದಕ್ಷಿಣ ಭಾರತದಿಂದ ಮೊದಲನೆಯ ಕಿಸಾನ್ ರೈಲು ಪ್ರಾರಂಭವಾಗಿದೆ. ಈ ರೈತ ರೈಲನ್ನು ಆಂಧ್ರಪ್ರದೇಶದ ಅನಂತ್‌ಪುರದಿಂದ ನವದೆಹಲಿಯ ಆಜಾದ್‌ಪುರ ಮಂಡಿಗೆ ಕಳುಹಿಸಲಾಗಿದೆ.  ಆಂಧ್ರಪ್ರದೇಶದ ಮುಖ್ಯಮಂತ್ರಿ ವೈ.ಎಸ್.ಜಗನ್ ಮೋಹನ್ ರೆಡ್ಡಿ ಮತ್ತು ರೈಲ್ವೆ ರಾಜ್ಯ ಸಚಿವ ಸುರೇಶ್ ಅಂಗಡಿ ಮತ್ತು ಕೃಷಿ ಸಚಿವ ನರೇಂದ್ರ ಸಿಂಗ್ ತೋಮರ್ ಅವರು ಈ ರೈಲಿಗೆ ಹಸಿರು ನಿಶಾನೆ ತೋರಿಸಿದರು.

ಕೊಳೆಯುವುದಿಲ್ಲ ರೈತರ ಹಣ್ಣುಗಳು ಮತ್ತು ತರಕಾರಿಗಳು :
ಇದಕ್ಕಾಗಿ ಮುಖ್ಯಮಂತ್ರಿ ವೈ.ಎಸ್.ಜಗನ್ ಮೋಹನ್ ರೆಡ್ಡಿ (YS Jagan Mohan Reddy) ಅವರು ಪ್ರಧಾನಿ ಮೋದಿ ಅವರಿಗೆ ಧನ್ಯವಾದ ಅರ್ಪಿಸಿದರು. ಅನಂತಪುರದಿಂದ ದೆಹಲಿಗೆ ಹೊರಟ ರೈತರ ರೈಲಿನಲ್ಲಿ 214 ಟನ್ ಟೊಮ್ಯಾಟೊ, 138 ಟನ್ ಬಾಳೆಹಣ್ಣು, 32 ಟನ್ ಕಿತ್ತಳೆ, 11 ಟನ್ ಪಪ್ಪಾಯಿ, 8 ಟನ್ ಕಲ್ಲಂಗಡಿ ಮತ್ತು 3 ಟನ್ ಮಾವಿನಕಾಯಿ ತುಂಬಿತ್ತು. 14 ಪಾರ್ಸೆಲ್ ವ್ಯಾನ್‌ಗಳನ್ನು ಹೊಂದಿರುವ ಈ ರೈಲು 40 ಗಂಟೆಗಳಲ್ಲಿ 2150 ಕಿ.ಮೀ ದೂರವನ್ನು ಕ್ರಮಿಸಲಿದ್ದು, ಅದರಲ್ಲಿ ನಾಗ್ಪುರಕ್ಕೆ 4 ವ್ಯಾನ್ ಲೋಡ್ ಮತ್ತು ಆದರ್ಶ್ ನಗರಕ್ಕೆ 10 ವ್ಯಾನ್ಗಳಿವೆ. ರಸ್ತೆಯ ಮೂಲಕ ಈ ದೂರವನ್ನು ಕ್ರಮಿಸಲು ಇದೀಗ ಮೂರರಿಂದ ನಾಲ್ಕು ದಿನಗಳು ಬೇಕಾಗುತ್ತದೆ. ಅಂತಹ ಪರಿಸ್ಥಿತಿಯಲ್ಲಿ ಹಣ್ಣುಗಳು ಮತ್ತು ತರಕಾರಿಗಳು ಕೊಳೆತು ಹೋಗುತ್ತವೆ.

ವಾರಕ್ಕೊಮ್ಮೆ ಕಿಸಾನ್ ರೈಲು (Kisan Rail) ಓಡಿಸುವ ಯೋಜನೆ ಇದೆ. ಆದರೆ ಅಕ್ಟೋಬರ್ ನಂತರ ಕೊಯ್ಲು ಮುಗಿದ ಕೂಡಲೇ, ಜನವರಿಯ ಬೇಡಿಕೆಗೆ ಅನುಗುಣವಾಗಿ ರೈಲುಗಳನ್ನು ಹೆಚ್ಚಿಸಬಹುದು. ಆಗಸ್ಟ್ 7 ರಂದು ಮಹಾರಾಷ್ಟ್ರದ ದೇವಲಾಲಿಯಿಂದ ಬಿಹಾರದ ದಾನಾಪುರಕ್ಕೆ ಮೊದಲ ರೈತ ರೈಲು ಪ್ರಾರಂಭಿಸಲಾಯಿತು. ಈ ಮೊದಲು ಇದನ್ನು ವಾರಕ್ಕೊಮ್ಮೆ ಮಾತ್ರ ನಡೆಸಬೇಕಾಗಿತ್ತು, ಆದರೆ ಬೇಡಿಕೆ ಹೆಚ್ಚಿದ ನಂತರ ವಾರಕ್ಕೆ ಎರಡು ಬಾರಿ ಈ ರೈಲು ಚಲಿಸಲಿದೆ.

ರೈತರು ಬೆಳೆಗೆ ಸರಿಯಾದ ಬೆಲೆ ಪಡೆಯುತ್ತಾರೆ:
ತೋಟಗಾರಿಕೆಗೆ ಸಂಬಂಧಿಸಿದ ಜನರು ಕಿಸಾನ್ ರೈಲಿನಿಂದ ಪ್ರಯೋಜನ ಪಡೆಯುತ್ತಾರೆ. ಅವರ ಬೆಳೆ ಅಲ್ಪಾವಧಿಯಲ್ಲಿಯೇ ಮಾರುಕಟ್ಟೆಯನ್ನು ತಲುಪಲು ಸಾಧ್ಯವಾಗುತ್ತದೆ. ಪ್ರಸ್ತುತ ಟ್ರಕ್‌ಗಳ ಮೂಲಕ ಸಾಗಿಸುವುದರಿಂದ ರೈತರಿಗೆ (Farmers) ವಾರ್ಷಿಕವಾಗಿ ಶೇಕಡಾ 25 ಅಥವಾ 300 ಕೋಟಿ ರೂ. ನಷ್ಟವಾಗುತ್ತದೆ. 

ಕೇಂದ್ರದ ಕೃಷಿ ಸಚಿವ ನರೇಂದ್ರ ತೋಮರ್ ಮಾತನಾಡಿ ದೇಶದ ಆರ್ಥಿಕತೆಯ ಅಭಿವೃದ್ಧಿಯಲ್ಲಿ ಕಿಸಾನ್ ರೈಲು ಅರ್ಥಪೂರ್ಣ ಪಾತ್ರ ವಹಿಸುತ್ತದೆ. ಕಿಸಾನ್ ರೈಲು ಚಾಲನೆಯೊಂದಿಗೆ ರೈತರು ದೇಶದ ಒಂದು ಸ್ಥಳದಿಂದ ಮತ್ತೊಂದು ಸ್ಥಳಕ್ಕೆ ಉತ್ಪನ್ನಗಳನ್ನು ಸುಲಭವಾಗಿ ಸಾಗಿಸಲು ಸಾಧ್ಯವಾಗುತ್ತದೆ ಮತ್ತು ರೈತರು ತಮ್ಮ ಬೆಳೆಗೆ ಉತ್ತಮ ಬೆಲೆ ಪಡೆಯುತ್ತಾರೆ ಎಂದರು.

ಅನಂತಪುರಂನಲ್ಲಿ ಎರಡು ಲಕ್ಷ ಹೆಕ್ಟೇರ್ ಪ್ರದೇಶದಲ್ಲಿ ಹಣ್ಣುಗಳು ಮತ್ತು ತರಕಾರಿಗಳನ್ನು ಬೆಳೆಯಲಾಗುತ್ತದೆ. ಆದ್ದರಿಂದ ಕಿಸಾನ್ ರೈಲಿನಿಂದ ಅಪಾರ ಪ್ರಯೋಜನವನ್ನು ಪಡೆಯುತ್ತಾರೆ. ಜಿಲ್ಲೆಯ 58 ಲಕ್ಷ ಮೆಟ್ರಿಕ್ ಟನ್ ಹಣ್ಣುಗಳು ಮತ್ತು ತರಕಾರಿಗಳಲ್ಲಿ 80 ಪ್ರತಿಶತಕ್ಕೂ ಹೆಚ್ಚು ರಾಜ್ಯದ ಹೊರಗೆ ಮಾರಾಟವಾಗುತ್ತವೆ. ವಿಶೇಷವಾಗಿ ಉತ್ತರ ಭಾರತದ ರಾಜ್ಯಗಳಾದ ದೆಹಲಿ, ಉತ್ತರ ಪ್ರದೇಶ, ಪಂಜಾಬ್ ಮತ್ತು ಹರಿಯಾಣಗಳಲ್ಲಿ ಶೀಘ್ರದಲ್ಲೇ ಕಿಸಾನ್ ಉಡಾನ್ ಸೇವೆಯನ್ನೂ ಪ್ರಾರಂಭಿಸಲಾಗುವುದು ಎಂದು ಕೃಷಿ ಸಚಿವರು ಹೇಳಿದರು.