ಪಾಕ್ ವಾಯು ಪ್ರದೇಶವನ್ನು ಅತಿಕ್ರಮಿಸಿ ಹಾರಾಡುವ, ಅಮೆರಿಕ ಸಹಿತ, ಎಲ್ಲ ವಿದೇಶೀ ಡ್ರೋನ್‌ಗಳನ್ನು ಕಂಡ ಕೂಡಲೇ ಹೊಡೆದುರುಳಿಸುವಂತೆ ಪಾಕ್ ವಾಯು ಪಡೆ ಮುಖ್ಯಸ್ಥ ತನ್ನ ಯೋಧರಿಗೆ ಖಡಕ್‌ ಸೂಚನೆ ಕೊಟ್ಟಿರುವುದಾಗಿ ವರದಿಯಾಗಿದೆ.
ಅಮೆರಿಕದ ಡ್ರೋನ್‌ಗಳು ಆಫ್ಘಾನ್‌ - ಪಾಕ್ ಗಡಿಯಲ್ಲಿ ಕಾರ್ಯಾಚರಣೆಯಲ್ಲಿ ತೊಡಗಿರುವ ಹಿನ್ನೆಲೆಯಲ್ಲಿ ಈ ಆದೇಶವನ್ನು 'ಅಮೆರಿಕವನ್ನು ಗುರಿ ಇರಿಸಿಕೊಂಡೇ ಹೊರಡಿಸಲಾಗಿದೆ' ಎಂದು ಪ್ರಾಥಮಿಕವಾಗಿ ತಿಳಿದುಬಂದಿದೆ.
ಈ ಕುರಿತು ಆದೇಶ ನೀಡಿರುವ ಪಾಕ್ ವಾಯು ಪಡೆ ಮುಖ್ಯಸ್ಥ, ಸೊಹೇಲ್‌ ಅಮನ್‌ ಅವರು "ಯಾರೂ ನಮ್ಮ ವಾಯು ಪ್ರದೇಶವನ್ನು ಅತಿಕ್ರಮಿಸುವುದನ್ನು ನಾವು ಸಹಿಸುವುದಿಲ್ಲ. ಅದಕ್ಕೆ ಅವಕಾಶವನ್ನೂ ಕೊಡುವುದಿಲ್ಲ; ಆ ಪ್ರಕಾರ ನಾನು ಪಿಎಎಫ್ ಗೆ "ಅಮೆರಿಕ ಸಹಿತ ಯಾವುದೇ ವಿದೇಶೀ ಡ್ರೋನ್‌ಗಳು ಪಾಕ್ ವಾಯು ಪ್ರದೇಶವನ್ನು ಅತಿಕ್ರಮಿಸಿ ಒಳಬಂದರೆ ಅವುಗಳನ್ನು ಹೊಡೆದುರುಳಿಸಬೇಕು' ಎಂಬ ಕಟ್ಟುನಿಟ್ಟಿನ ಸೂಚನೆಯನ್ನು ಕೊಟ್ಟಿದ್ದೇನೆ' ಎಂದು ಹೇಳಿದ್ದಾರೆ.
ಈ ಹಿಂದೆ ಅಮೆರಿಕ ವಾಯುಪಡೆ ಡ್ರೋನ್‌ಗಳ ತೀರ ಈಚಿನ ದಾಳಿಗೆ ಪಾಕ್ - ಅಫ್ಘಾನ್‌ ಗಡಿಯಲ್ಲಿ ಮೂವರು ಉಗ್ರರು ಹತರಾಗಿದ್ದರು. ಅಲ್ಲದೆ, ಅಮೆರಿಕದೊಂದಿಗಿನ ಪಾಕ್ ಸಂಬಂಧ ಹಳಸಿರುವುದು ಮತ್ತು ಇಸ್ಲಾಮಾಬಾದ್‌ ಚೀನಕ್ಕೆ ನಿಕಟವಾಗುತ್ತಿರುವ ಹಿನ್ನೆಲೆಯಲ್ಲಿ ಈ ಡ್ರೋನ್‌ ದಾಳಿ ಸಂಬಂಧ ಮಹತ್ವದ ಆದೇಶ ನೀಡಲಾಗಿದೆ ಎನ್ನಲಾಗಿದೆ.
