రేపటికల్లా నగదు మీ ఖాతాల్లో పడుతుంది

విశాఖ: వైజాగ్ గ్యాస్ లీకేజ్ ఘటనలో ( Vizag gas leak ) తీవ్రంగా అనారోగ్యం బారిన పడిన బాధితులను చూసి తర్వాత ఇంకేం జరుగుతుందోననే ఆందోళన, భయం గ్రామస్తులను వెంటాడుతున్న నేపథ్యంలో బాధితులకు భరోసా కల్పించేందుకు మంత్రులు, అధికారులు ఇక్కడే ఉంటామని మంత్రి అవంతీ శ్రీనివాస్ అన్నారు. విశాఖలో విష వాయువు లీక్ అయిన ఘటనలో ప్రమాదం బారినపడిన బాధితులు, అక్కడి పరిసర గ్రామాల ప్రజలు ధైర్యంగా ఉండాల్సిందిగా ప్రభుత్వం తరపున మంత్రి అవంతి శ్రీనివాస్ భరోసా ఇచ్చారు. ఈ ఘటనలో మృతి చెందిన వారి కుటుంబాలకు కోటి రూపాయలు ఎక్స్‌గ్రేషియా కింద అందించనున్నట్టు సీఎం వైఎస్ ప్రకటించిన సంగతి తెలిసిందే.ఈ నేపథ్యంలో సీఎం జగన్ ఆదేశాల మేరకు నేడు మంత్రుల బృందం సంబంధిత అధికారులతో కలిసి వెళ్లి బాధితులకు చెక్కులు అందించారు. 

ఎల్జీ పాలిమర్స్ పరిశ్రమ నుంచి వెలువడిన విష వాయువులతో కాలుష్యం కోరల్లో చిక్కుకున్న అక్కడి పరిసర ప్రాంతాల గ్రామాల్లో జీవీఎంసి ( GVMC ) సిబ్బంది రోడ్లు ,ఇళ్లను పరిశుభ్రం చేస్తున్నారు. ఇవాళ సాయంత్రం 4 గంటల తర్వాత ప్రజలు ఇళ్లకు రావాల్సిందిగా అక్కడి గ్రామాల ప్రజలకు మంత్రి అవంతి విజ్ఞప్తి చేశారు. ఇ౦టికి చేరుకున్న వెంటనే ఇంటి తలుపులు, కిటికీలు తెరిచి లోపల ఉన్న గాలి బయటకి పోయేలా ఫ్యాన్ వేసి ఉంచ౦డి. ఇళ్లు పరిశుభ్రం చేసుకునేందుకు వీలుగా జీవీఎంసీ సిబ్బంది గ్రామస్తులకు రసాయనాలు అందిస్తారు. ఈ రెండు రోజుల పాటు ఎవ్వరూ ఏసీలు వాడవద్దు. అలాగే ఇప్పటికే ఇళ్లలో కొనిపెట్టుకున్న కూరగాయలు, పండ్లు వంటివి ఆహారపదార్ధాలు తినకుండా బయటే పడేయండి అని మంత్రి సూచించారు. 

నేడు గ్రామంలోకి వచ్చే వాళ్లు అందరికీ ప్రభుత్వమే భోజనాలు, మంచినీరు అందిస్తుంది. ఇంటిని శుభ్రం చేసుకోకుండా ఎవ్వరూ ఈ రోజు ఇళ్లల్లో వంటలు చేయవద్దని మంత్రి తెలిపారు. బాధితులకు జరిగిన నష్టాన్ని అంచనా వేసేందుకు జరిగే సర్వేలో భాగంగా రేపటి నుంచి వాలంటీర్లే నేరుగా మీ ఇళ్ల వద్దకు వస్తారు. ఈ ఘటనలో మీకు జరిగిన నష్టం ఏంటనే వివరాలను వాలంటీర్లకు తెలియజేయండని మంత్రి అవంతి వెల్లడించారు.\

ప్రస్తుతం ఎల్జీ పాలిమర్స్ పరిశ్రమలో, ఇక్కడి గ్రామాల్లో పరిస్థితి అంతా అదుపులోనే ఉందని.. రేపటి నుంచి యధావిధిగా మీ రోజూవారీ కార్యక్రమాలు చేసుకోవచ్చు అని మంత్రి అవంతి తెలిపారు. ప్రభుత్వం అందించే పది వేల రూపాయల ఆర్థిక సహాయం డబ్బులు రేపటికల్లా మీ బ్యాంకు ఖాతాల్లో పడతాయని మంత్రి అవంతి స్పష్టంచేశారు.