సురేష్ రైనా టాలెంట్‌పై రోహిత్ శర్మ ఆసక్తికర వ్యాఖ్యలు

సురేష్ రైనా క్రికెట్ కెరీర్‌పై, అతడి టాలెంట్‌పై రోహిత్ శర్మ ఆసక్తికరమైన వ్యాఖ్యలు చేశాడు ( Rohit sharma`s interesting comments on Suresh Raina ). సురేష్ రైనాతో రోహిత్ శర్మ మాట్లాడుతూ.. దేశం కోసం చాలా ఏళ్ల పాటు ఆడిన తర్వాత జట్టుకు దూరంగా ఉండాలంటే ఎంత ఇబ్బందిగా ఉంటుందో తనకు తెలుసని.. ఆ బాధను తాను అర్థం చేసుకోగలను అని వ్యాఖ్యానించాడు. అంతేకాకుండా, ఏదో ఒక విధంగా నువ్వు జట్టులో ఉంటే బాగుంటుందనిపిస్తోంది అని రైనాకు చెప్పాడు. '' బౌలింగ్, ఫీల్డింగ్‌లో నీకు మంచి అనుభవం ఉంది. అన్నింటికి మించి నీలో క్రికెట్ టాలెంట్ ఇంకా మిగిలి ఉంది. కాకపోతే మన చేతుల్లో ఏమీ లేదు కదా'' అని రోహిత్ శర్మ చేసిన వ్యాఖ్యలు క్రికెట్ ప్రియుల్లో ఆసక్తిరేకెత్తిస్తున్నాయి. రోహిత్ శర్మ, సురేష్ రైనా ఇన్‌స్టాగ్రామ్ లైవ్ చాట్‌లో ఈ ఆసక్తికరమైన చర్చ జరిగింది.

అయితే, రోహిత్ శర్మ చేసిన ఈ వ్యాఖ్యలపై సురేష్ రైనా సానుకూలంగా స్పందించాడు. టీమిండియా జట్టులో తనకు చోటు లభిస్తుందనే ఆశతోనే ఉన్నట్టు సురేష్ రైనా చెప్పుకొచ్చాడు. తనకు ఓ గాయం కావడం, ఆ తర్వాత ఓ సర్జరీ కూడా జరగడమే టీమిండియాలో తాను చోటు కోల్పోవడానికి పెద్ద కారణమైందని రైనా పేర్కొన్నాడు. తనలో ఇంకా ఎంతో టాలెంట్ మిగిలి ఉందని అభిప్రాయపడిన రైనా.. పర్ ఫార్మెన్స్ ఒక్కటే మన చేతుల్లో ఉంటుంది కానీ టీమిండియా సెలెక్షన్ కాదు కదా అని బదులిచ్చాడు. 

తాను క్రికెట్ కెరీర్‌ని ఎంతో ఎంజాయ్ చేశానన్న రైనా.. మనం జట్టులోకి వచ్చిన కొత్తలో పెద్ద ఆటగాళ్లు మనల్ని బాగా ఎంకరేజ్ చేశారని, అలాంటి మద్దతే ఇప్పుడు కూడా కావాలని రైనా వ్యాఖ్యానించాడు.