తెలంగాణలో చంద్రబాబు ప్రచారం; టి.టీడీపీ అభ్యర్ధులు పోటీ చేసే స్థానాల్లో పర్యటన

తెలంగాణలో మహాకూటమి తరఫున పోటీ చేయనున్న టి.టీడీపీ అభ్యర్ధుల నియోజకవర్గాల్లో ఏపీ సీఎం చంద్రబాబు ప్రచారం చేయనున్నారు. అలాగే రాహుల్ గాంధీ పాల్గొనే ఒకటి రెండు సభల్లో చంద్రబాబు పాల్గొంటారని తెలిసింది. తెలంగాణ ఎన్నికలకు చంద్రబాబు దూరంగా ఉంటారని.. ఆయన ఎన్నికల్లో ప్రచారం చేయబోరని తొలుత వార్తలు వినిపించాయి. అయితే ప్రస్తుత పరిస్థితుల్లో పార్టీ అభ్యర్ధులను గెలిచిపించే బాధ్యత చంద్రబాబుపై ఉంది. ఈ నేపథ్యంలో ఆయనే స్వయంగా రంగంలోకి దిగి ప్రచారం చేయనున్నట్లు మీడియాలో కథనాలు వెలువడుతున్నాయి. అయితే దీనికి సంబంధించిన అధికారిక ప్రకటన వెలువడ లేదు.

చంద్రబాబు పర్యటనపై భిన్నాభిప్రాయాలు

చంద్రబాబు గనుక తెలంగాణలో అడుపెడితే..దీన్నే ప్రచార అస్త్రంగా ఉపయోగించుకోవాలని టీఆర్ఎస్ భావిస్తోంది. అయితే తమ అధినేత చంద్రబాబు ప్రచారంలోకి వస్తే అది తమకు ప్లస్ పాయింట్ గా మారుతుందని టీడీపీ అభ్యర్ధులు వాదిస్తున్నారు. చంద్రబాబు టీఆర్ఎస్ కు మాత్రమే వ్యతిరేకి అని..తెలంగాణకు ఆయన ఎప్పుడూ అనుకూల వాది అని పేర్కొంటున్నారు. చంద్రబాబు లేఖ ఇవ్వడం వల్లే తెలంగాణ వచ్చిందని ఈ సందర్భంగా తెలంగాణ తెలుగు తమ్ముళ్లు గుర్తు చేస్తున్నారు. ఏది ఏమైనప్పటికీ అన్ని అంశాలు బేరీజే వేసుకొని చంద్రబాబు తెలంగాణ గడ్డపై అడుగుపెట్టనున్నట్లు తెలుస్తోంది.