ನವದೆಹಲಿ: ಪಾಕಿಸ್ತಾನದ ಮಾಜಿ ವೇಗದ ಆಟಗಾರ ಶೋಯೆಬ್ ಅಖ್ತರ್ (Shoaib Akhtar) ಅವರು ವಿಶ್ವ ಕ್ರಿಕೆಟ್‌ನ ಕೆಲವು ಅತ್ಯುತ್ತಮ ನಾಯಕರಾದ ಸ್ಟೀವ್ ವಾ, ರಿಕಿ ಪಾಂಟಿಂಗ್, ಸೌರವ್ ಗಂಗೂಲಿ (Sourav Ganguly), ಗ್ರೇಮ್ ಸ್ಮಿತ್, ಸ್ಟೀಫನ್ ಫ್ಲೆಮಿಂಗ್, ಮತ್ತು ಎಂ.ಎಸ್. ಧೋನಿ ವಿರುದ್ಧ ಆಡಿದ್ದಾರೆ. ಸ್ವಾಭಾವಿಕವಾಗಿ, ಅವರಲ್ಲಿ ಉತ್ತಮ ನಾಯಕರನ್ನು ಆರಿಸುವುದು ನಿಜಕ್ಕೂ ಕಠಿಣ ಸಂಗತಿ.
ಆದರೆ ಈ ಕಾರ್ಯವನ್ನು ಪಾಕ್ ನ ಮಾಜಿ ದಂತಕಥೆ ಸುಲಭವಾಗಿ ನಿರ್ವಹಿಸಿದ್ದಾರೆ.ಅತ್ಯುತ್ತಮ ವಿರೋಧಿ ತಂಡದ ನಾಯಕ ಯಾರು ಎಂದು ಅವರನ್ನು ಪ್ರಶ್ನಿಸಿದಾಗ ಇದಕ್ಕೆ ಉತ್ತರಿಸಿದ ಅವರು ಭಾರತದ ಮಾಜಿ ನಾಯಕ ಮತ್ತು ಹಾಲಿ ಬಿಸಿಸಿಐ ಅಧ್ಯಕ್ಷ ಸೌರವ್ ಗಂಗೂಲಿ ಅವರನ್ನು ಹೆಸರಿಸಿದ್ದಾರೆ.
ವಿಶ್ವ ಕ್ರಿಕೆಟ್‌ನ ಇತರ ಶ್ರೇಷ್ಠ ನಾಯಕರೊಂದಿಗೆ ಅಖ್ತರ್ ನೇರವಾಗಿ ಹೋಲಿಕೆ ಮಾಡದೆ ಹೋದರು ಸಹಿತ ಅವರು ಗಂಗೂಲಿಯನ್ನು ಇದುವರೆಗಿನ ಅತ್ಯುತ್ತಮ ಭಾರತೀಯ ನಾಯಕ ಎಂದು ರೇಟ್ ಮಾಡಿದ್ದಾರೆ. ಎಂ.ಎಸ್.ಧೋನಿ ಒಬ್ಬ ಉತ್ತಮ ನಾಯಕ ಎಂದು ಸಮರ್ಥಿಸಿಕೊಂಡರೆ, ಗಂಗೂಲಿ ತಂಡವನ್ನು ನಿರ್ಮಿಸುವ ಕಲೆ ಹೊಂದಿದ್ದಾರೆ ಎಂದು ಅಖ್ತರ್ ಹೇಳಿದರು.
“ನಾನು ಭಾರತದ ಬಗ್ಗೆ ಮಾತನಾಡಿದರೆ ಅದು ಸೌರವ್ ಗಂಗೂಲಿ, ಭಾರತ ಅವರಿಗಿಂತ ಉತ್ತಮ ನಾಯಕನನ್ನು ಸೃಷ್ಟಿಸಿಲ್ಲ. ಧೋನಿ ತುಂಬಾ ಒಳ್ಳೆಯವರು, ಅವರು ಅದ್ಭುತ ನಾಯಕ, ಆದರೆ ನೀವು ತಂಡದ ನಿರ್ಮಾಣದ ಬಗ್ಗೆ ಮಾತನಾಡುವಾಗ ಗಂಗೂಲಿ ಉತ್ತಮ ಕೆಲಸ ಮಾಡಿದ್ದಾರೆ ”ಎಂದು ಹೆಲೋ ಅಪ್ಲಿಕೇಶನ್‌ನಲ್ಲಿ ನೀಡಿದ ಸಂದರ್ಶನದಲ್ಲಿ ಅಖ್ತರ್ ಹೇಳಿದ್ದಾರೆ.
ಶೋಯೆಬ್ ಅಖ್ತರ್ 46 ಟೆಸ್ಟ್, 163 ಏಕದಿನ, ಮತ್ತು 15 ಟಿ 20 ಐಗಳಲ್ಲಿ ಕ್ರಮವಾಗಿ 178, 247, ಮತ್ತು 19 ವಿಕೆಟ್ಗಳನ್ನು ಪಡೆದಿದ್ದಾರೆ. ವಿಶ್ವಕಪ್ ವೊಂದನ್ನು ಹೊರತುಪಡಿಸಿ ಬೇರೆ ಯಾವುದೇ ಪಂದ್ಯಾವಳಿಯಲ್ಲಿ ಭಾರತ ಪಾಕಿಸ್ತಾನವನ್ನು ಸೋಲಿಸಬಹುದೆಂದು ತಾವು ಭಾವಿಸಿರಲಿಲ್ಲ ಎಂದು ಹೇಳಿದರು.
"ವಿಶ್ವಕಪ್ ಆಟದ ಹೊರಗೆ ಭಾರತ ನಮ್ಮನ್ನು ಸೋಲಿಸಬಹುದೆಂದು ನಾನು ಎಂದಿಗೂ ಭಾವಿಸಿರಲಿಲ್ಲ. ನಾನು 1999 ರಲ್ಲಿ ಭಾರತ ಪ್ರವಾಸ ಮಾಡಿದ್ದೇನೆ, ನಾವು ಚೆನ್ನೈನಲ್ಲಿ ಗೆದ್ದಿದ್ದೇವೆ, ದೆಹಲಿಯಲ್ಲಿ ಸೋತಿದ್ದೇವೆ ಆದರೆ ನಾವು ಮತ್ತೆ ಕೋಲ್ಕತ್ತಾದಲ್ಲಿ ಗೆದ್ದೆವು, ನಾವು ಶಾರ್ಜಾದಲ್ಲಿ ಗೆದ್ದಿದ್ದೇವೆ ”ಎಂದು ಅಖ್ತರ್ ಹೇಳಿದರು.
ಗಂಗೂಲಿ ಭಾರತದ ನಾಯಕನಾಗಿ ಅಧಿಕಾರ ವಹಿಸಿಕೊಂಡಾಗ ಎಲ್ಲವೂ ಬದಲಾಗಿದೆ ಎಂದು ಹೇಳಿದರು."ಗಂಗೂಲಿಯ ನಾಯಕತ್ವದಲ್ಲಿ ಭಾರತ 2004 ರಲ್ಲಿ ಪಾಕಿಸ್ತಾನಕ್ಕೆ ಬಂದಾಗ ಈ ತಂಡವು ಪಾಕಿಸ್ತಾನವನ್ನು ಸೋಲಿಸಬಲ್ಲದು ಎಂಬ ಭಾವನೆ ನನ್ನಲ್ಲಿ ಮೂಡಿತು ಮತ್ತು ಅವರು ಅದನ್ನು ಮಾಡಿದರು" ಎಂದು ಅಖ್ತರ್ ಹೇಳಿದರು. 2004 ರಲ್ಲಿ ಭಾರತ ಪಾಕಿಸ್ತಾನವನ್ನು 2-1 ಮತ್ತು ಏಕದಿನ ಪಂದ್ಯಗಳಲ್ಲಿ 3-2ರಿಂದ ಸೋಲಿಸಿತ್ತು.
