ന്യൂഡല്‍ഹി: ഔഷധ ആവശ്യങ്ങൾക്കായി രാജ്യത്തു കഞ്ചാവ് നിയമവിധേയമാക്കാമെന്നു കേന്ദ്ര മന്ത്രി മേനക ഗാന്ധി. കാൻസർ രോഗ ചികിത്സയ്ക്ക് കഞ്ചാവ് ഉപയോഗപ്പെടുന്നു എന്നതിനാൽ ഔഷധ ആവശ്യങ്ങൾക്കായി രാജ്യത്തു കഞ്ചാവ് നിയമവിധേയമാക്കാമെന്നു കേന്ദ്രമന്ത്രി മേനക ഗാന്ധി പറഞ്ഞു.
രാജ്യത്തെ ലഹരി മുക്തമാക്കുന്നതിനായി നാഷണൽ ഡ്രഗ് ഡിമാൻഡ് റിഡക‌്ഷൻ നയത്തിൽ മാറ്റങ്ങൾ നിർദ്ദേശിക്കാനായി ആഭ്യന്തര മന്ത്രി രാജ് നാഥ് സിംഗിന്‍റെ അധ്യക്ഷതയിൽ ചേര്‍ന്ന ഉന്നതതല യോഗത്തിലാണ് മേനക ഗാന്ധി ഇങ്ങനെ പറഞ്ഞത്.
അമേരിക്ക പോലുള്ള വികസിതരാജ്യങ്ങളില്‍ കഞ്ചാവ് നിയമവിധേയമാണ്. ഇത് അവിടെ മയക്കുമരുന്ന് ഉപയോഗം കുറയ്ക്കാനും ഇടയാക്കി. ഈ സാധ്യത ഇന്ത്യയിലും പരിശോധിക്കണം. ഔഷധ നിര്‍മ്മാണത്തിനായി കഞ്ചാവ് നിയമവിധേയമാക്കണം. പ്രത്യേകിച്ച് കഞ്ചാവ് ക്യാന്‍സര്‍ ചികിത്സയ്ക്ക് പ്രയോജനകരം കൂടിയാകുമ്പോള്‍ എന്നാണ് മേനകാ ഗാന്ധി അഭിപ്രായപ്പെട്ടത്.
സാമൂഹ്യ നീതി മന്ത്രാലയവും ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസും ചേർന്ന് ലഹരി മരുന്ന് ഉപയോഗത്തെക്കുറിച്ച് ഒരു ദേശീയ സർവേയെ നടത്തിയിരുന്നു. അതിനെ അടിസ്ഥാനമാക്കി ലഹരി മരുന്ന് ഉപയോഗം കുറച്ചു കൊണ്ടുവരാനുള്ള നടപടികൾ സ്വീകരിക്കാൻ യോഗം നിർദേശങ്ങൾ മുന്നോട്ടുവച്ചിട്ടുണ്ട്. ലഹരി വിരുദ്ധ നയത്തിന്‍റെ നടത്തിപ്പിനായി പ്രതിവർഷം 125 കോടി രൂപ വിനിയോഗിക്കണമെന്നു മന്ത്രി തല യോഗം നിർദേശിച്ചു.
