షాకింగ్.. కరోనాతో యువ కోచ్ ఆకస్మిక మృతి

మాడ్రిడ్‌ : కరోనా వైరస్‌ (coronavirus) సోకితే వయసు పైబడిన వారే చనిపోతున్నారని ఇప్పటివరకూ వైద్య నిపుణులు చెబుతూ వచ్చారు. కానీ ప్రాణాంతక కోవిడ్19 (COVID-19) వైరస్  సోకడంతో పుట్‌బాల్‌ టీమ్ యువ కోచ్‌ మృతి చెందాడు. దీంతో స్పెయిన్‌లో విషాదం చోటుచేసుకుంది. 21ఏళ్ల ఫ్రాన్సిస్కో గార్సియా అనే యువకుడు మలాగ క్లబ్‌కు చెందిన అథ్లెటికో పోర్టాడా అల్టా జట్టుకు కోచ్‌గా వ్యవహరిస్తున్నాడు.

శ్వాసతీసుకోవడంలో సమస్య ఉందని యువ కోచ్ గార్సియా ఇటీవల ఆసుపత్రిలో చేరాడు. గత కొంతకాలం నుంచి ల్యుకేమియా సమస్యతోనూ బాధపడుతున్న కోచ్‌కు కోవిడ్19 టెస్టులు నిర్వహించగా పాజిటీవ్‌గా తేలింది. చికిత్స పొందుతూనే ఫ్రాన్సిస్కో గార్సియా మరణించాడు. దీంతో ఫుట్ బాల్‌ క్రీడలో పెను విషాదం నెలకొంది.స్పెయిన్‌లో కరోనా బారిన పడి ఇప్పటి వరకు 345 మంది మృతి చెందారు. పాజిటీవ్ కేసుల సంఖ్య పదివేలకు చేరడం స్పెయిన్ ప్రజలను ఆందోళనకు గురిచేస్తోంది. పాతికేళ్లు కూడా లేని యువకుడు కరోనాతో చనిపోయాడన్న వార్త స్పెయిన్‌లో చర్చనీయాంశమైంది.

కాగా, కరోనా వ్యాప్తి చెందకుండా చూడటంలో భాగంగా ఇటీవల పలు మ్యాచ్‌లు రద్దయిన విషయం తెలిసిందే. మార్చి 29న ప్రారంభం కావాల్సిన ఇండియన్ ప్రీమియర్ లీగ్‌ను సైతం వాయిదా వేశారు. దక్షిణాఫ్రికా, భారత్ వన్డే సిరీస్‌ను మధ్యలోనే రద్దయింది. న్యూజిలాండ్, ఆస్ట్రేలియా జట్ల మధ్య సిరీస్‌లను రద్దు చేస్తూ ముందస్తు జాగ్రత్తలు పాటించారు.