గడగడలాడిస్తున్న కరోనా వైరస్

ప్రపంచాన్ని గడగడ వణికిస్తూ..కంటి మీద కునుకు లేకుండా చేస్తున్న మరో వైరస్  కరోనా. ఇది చైనాలోని హూవాన్ సిటీలో వెలుగు చూసింది. ఇప్పటి వరకు ఈ  వైరస్ ధాటికి 17 మంది మృతి చెందారు. మరో 440 మంది తీవ్ర అస్వస్థతతో ఆస్పత్రిలో చికిత్స పొందుతున్నారు. వేగంగా విస్తరిస్తున్న ఈ కరోనా వైరస్. .  ప్రపంచాన్ని గడగడలాడిస్తోంది. ఇప్పటికే చైనాలో హెల్త్ ఎమర్జెన్సీ విధించారు.  చైనా నుంచి ఇతర దేశాలకు ఈ వైరస్ విస్తరించే అవకాశం ఉండడంతో అన్ని విమానాశ్రయాల్లో ప్రత్యేక ఏర్పాట్లు చేశారు.  

హెల్త్ ఎమర్జెన్సీపై చర్చలు

గ్లోబల్ ఎమర్జెన్సీ విధించేందు కోసం ప్రపంచ ఆరోగ్య సంస్థ..WHO చర్చలు ప్రారంభించింది. ఇవాళ జరిగిన చర్చలు రేపు కూడా కొనసాగనున్నాయి. దీనిపై పూర్తి స్థాయిలో రేపు  WHO అధికారికంగా ప్రకటించే అవకాశం ఉంది. మరోవైపు హైదరాబాద్ అంతర్జాతీయ విమానాశ్రయం నుంచి చైనాకు పలు విమానాల రాకపోకలు ఉన్నాయి. దీంతో ఈ వైరస్ హైదరాబాద్ లో వ్యాప్తి చెందే అవకాశం ఉందని ప్రభుత్వం అప్రమత్తమైంది. ఇప్పటికే హైదరాబాద్ లో స్వైన్ ఫ్లూ విజృంభిస్తోంది. కరోనా వైరస్ కూడా దాదాపు ఫ్లూ లాంటి లక్షణాలతోనే వస్తుంది. కాబట్టి అప్రమత్తంగా ఉండాలని వైద్య సిబ్బందిని వైద్య ఆరోగ్య శాఖ అప్రమత్తం చేసింది.