રાંધણ ગેસના ભાવ, UPI, EPFO, લોન લિમિટ.....આજથી આ ધરખમ ફેરફારો થયા, જાણો કયો તમારા કામનો છે?

 1 જાન્યુઆરી, 2025થી ઘરેલુ અને કોમર્શિયલ એલપીજી સિલિન્ડરની કિંમતમાં ફેરફાર થયા છે. નવા વર્ષ નિમિત્તે દેશવાસીઓને મોટી રાહત મળી છે. એલપીજી સિલિન્ડરની કિંમતમાં 14.50 રૂપિયાનો ઘટાડો કરવામાં આવ્યો છે. જો કે, આ રાહત માત્ર કોમર્શિયલ સિલિન્ડરો એટલે કે 19Kg LPG સિલિન્ડર માટે છે. જ્યારે ઘરેલુ ગેસ સિલિન્ડર એટલે કે 14 કિલોના ભાવમાં કોઈ ફેરફાર કરવામાં આવ્યો નથી. 

1 જાન્યુઆરી, 2025થી સેન્સેક્સ, સેન્સેક્સ-50 અને બેન્કોની એક્સપાયરી ડેટ્સ પર મોટા ફેરફારો લાગુ કરવામાં આવશે. અત્યાર સુધી આ સૂચકાંકોની એક્સપાયરી શુક્રવારે થતી હતી, હવે તે મંગળવારે થશે. વધુમાં, ત્રિમાસિક અને અર્ધવાર્ષિક કરાર હવે સંબંધિત મહિનાના છેલ્લા મંગળવારે સમાપ્ત થશે. જ્યારે નિફ્ટી 50ના માસિક કોન્ટ્રાક્ટની મુદત ગુરુવારે પૂરી થશે.  

કૃષિ ક્ષેત્રને પ્રોત્સાહન આપવા માટે, ખેડૂતો હવે 1 જાન્યુઆરી, 2025 થી કોઈપણ ગેરંટી વિના 2 લાખ રૂપિયા સુધીની લોન માટે પાત્ર બનશે. પહેલા આ મર્યાદા 1.6 લાખ રૂપિયા હતી. આ મર્યાદા વધારવાથી ખેડૂતો કૃષિ પ્રવૃત્તિઓ માટે પહેલા કરતાં વધુ નાણાં મેળવી શકશે, જેનાથી ઉત્પાદકતા અને આજીવિકા બંનેમાં સુધારો થશે.

EPFO સંબંધિત નિયમો 1 જાન્યુઆરી, 2025થી બદલાઈ રહ્યા છે. નવા નિયમ હેઠળ, EPFO ​​પેન્શનરો દેશભરની કોઈપણ બેંકમાંથી તેમનું પેન્શન ઉપાડી શકશે. આ પેન્શન ઉપાડને વધુ અનુકૂળ અને સરળ બનાવશે, કારણ કે હવે કોઈ વધારાની ચકાસણીની જરૂર રહેશે નહીં, જે પેન્શનરો માટે પ્રક્રિયાને સરળ બનાવશે. મીડિયા રિપોર્ટ મુજબ ઈપીએફઓ જલદી એક એટીએમ કાર્ડ બહાર પાડશે જેનાથી મેમ્બરો 24 કલાક પૈસા કાઢી શકાશે. આ સિવાય આ વર્ષે ઈપીએફ કન્ટ્રીબ્યુશનની લિમિટ હટાવાય એવી પણ અપેક્ષા છે.   

જાન્યુઆરી 2025 થી, વ્યવસાયોએ GST પોર્ટલને ઍક્સેસ કરવા માટે મલ્ટિ-ફેક્ટર ઓથેન્ટિકેશન (MFA) અપનાવવાની જરૂર પડશે. સુરક્ષાના આ વધારાના સ્તરને OTP જેવા વધારાના પ્રમાણીકરણ ચકાસણીની જરૂર પડશે. આ સિવાય, છેલ્લા 180 દિવસમાં જારી કરાયેલા દસ્તાવેજો માટે જ ઈ-વે બિલ જનરેટ કરી શકાય છે.

1 જાન્યુઆરી, 2025 થી, ફીચર ફોન વપરાશકર્તાઓ માટે UPI 123Pay માટેની ટ્રાન્ઝેક્શન મર્યાદા વધશે. તમને જણાવી દઈએ કે UPI 123Pay બેઝિક ફોન પર ઓનલાઈન પેમેન્ટની મંજૂરી આપે છે. ટ્રાન્ઝેક્શન લિમિટ 5,000 રૂપિયાથી વધારીને 10,000 રૂપિયા કરવામાં આવશે. આ પછી, ફીચર ફોન પર UPI દ્વારા મોટા ટ્રાન્ઝેક્શન કરવાનું સરળ બનશે.