Atishi Marlena: ഡൽഹി മുഖ്യമന്ത്രിയായി സത്യപ്രതിജ്ഞ ചെയ്ത് അതിഷി മർലേന; മന്ത്രിസഭയിൽ ആറുപേർ

Atishi Marlena Oath taking Ceremony: സുഷമ സ്വരാജിനും ഷീല ദീക്ഷിതിനും ശേഷം രാജ്യതലസ്ഥാനം ഭരിക്കുന്ന മൂന്നാമത്തെ വനിതാ മുഖ്യമന്ത്രിയാണ് അതിഷി മർലേന.

ന്യൂഡൽഹി: അതിഷി മർലേന ഡൽഹി മുഖ്യമന്ത്രിയായി സത്യപ്രതിജ്ഞ ചെയ്തു. ഡൽഹി രാജ്ഭവനിൽ നടന്ന ചടങ്ങിലാണ് അതിഷി സത്യപ്രതിജ്ഞ ചെയ്തത്. ഗോപാൽ റായി, കൈലാഷ് ​ഗഹ്ലോട്ട്, സൗരഭ് ഭരദ്വാജ്, ഇമ്രാൻ ഹുസൈൻ, മുകേഷ് അഹ്ലാവത് എന്നിവരും മന്ത്രിമാരായി സത്യപ്രതിജ്ഞ ചെയ്തു.

മദ്യനയ അഴിമതിക്കേസിൽ ജാമ്യം ലഭിച്ച് പുറത്തിറങ്ങിയ ഉടൻ തന്നെ അരവിന്ദ് കേജ്രിവാൾ രാജി പ്രഖ്യാപിച്ചിരുന്നു. അരവിന്ദ് കേജ്രിവാളാണ് മുഖ്യമന്ത്രി സ്ഥാനത്തേക്ക് അതിഷിയുടെ പേര് നിർദേശിച്ചത്. ആം ആദ്മി പാർട്ടിയുടെ മുതിർന്ന നേതാവ് മനീഷ് സിസോദിയ ഉൾപ്പെടെയുള്ളവർ പിന്തുണച്ചതോടെ അതിഷിയെ മുഖ്യമന്ത്രി സ്ഥാനത്തേക്ക് ഔദ്യോ​ഗികമായി പ്രഖ്യാപിച്ചു.

സുഷമ സ്വരാജിനും ഷീല ദീക്ഷിതിനും ശേഷം രാജ്യതലസ്ഥാനം ഭരിക്കുന്ന മൂന്നാമത്തെ വനിതാ മുഖ്യമന്ത്രിയാണ് അതിഷി മർലേന. ചുരുങ്ങിയ കാലം കൊണ്ട് ജനങ്ങളുടെ ഹൃദയം കീഴടക്കിയ നേതാവാണ് അതിഷി. ഡൽഹിയിലെ ജനപ്രിയ പദ്ധതികൾക്ക് പിന്നിലും അതിഷിയുണ്ടായിരുന്നു.

പക്വമായ പെരുമാറ്റമാണ് അതിഷിയെ വ്യത്യസ്തയാക്കുന്നത്. മദ്യനയക്കേസിൽ അരവിന്ദ് കേജ്രിവാളിനെ അറസ്റ്റ് ചെയ്തതോടെ പാർട്ടിയുടെ പ്രധാന മുഖം അതിഷിയായിരുന്നു. ഡോ. തൃപ്ത വാഹിയുടെയും ഡോ. വിജയ് സിം​ഗിന്റെയും മകളായി 1981 ജൂൺ എട്ടിനാണ് അതിഷിയുടെ ജനനം.