તહેવારો પર ગુજરાતમાં થઈ જશે પાણી-પાણી, અંબાલાલ પટેલ, પરેશ ગોસ્વામી અને હવામાન વિભાગની આગાહી

રાજ્યમાં ભલે અત્યારે વરસાદ ધીમો પડી ગયો હોય પરંતુ હજુ ભારે વરસાદની આગાહી છે. રાજ્યમાં આગામી 17 ઓગસ્ટથી ભારે વરસાદ પડી શકે છે. વરસાદ અંગે હવામાન વિભાગ અને અંબાલાલ પટેલે પણ આગાહી કરી છે. એટલે કે તહેવારોના સમયમાં રાજ્યમાં મેઘરાજાનો નવો રાઉન્ડ શરૂ થઈ શકે છે. રાજ્યના હવામાન વિભાગ દ્વારા આગામી 7 દિવસ વરસાદની આગાહી કરવામાં આવી છે. બીજીતરફ હવામાન નિષ્ણાંત અંબાલાલ પટેલ અને પરેશ ગોસ્વામી દ્વારા પણ વરસાદની આગાહી કરવામાં આવી છે. 

ગુજરાતમાં આગામી સાત દિવસ સાર્વત્રિક વરસાદની આગાહી કરવામં આવી છે...આગામી સાત દિવસ ગુજરાતના વિવિધ વિસ્તારમાં છૂટોછવાયો વરસાદ રહેશે...બિકાનેર પાસે મોન્સૂન ટ્રફ સિસ્ટમ સક્રિય થતાં ગુજરાતમાં વરસાદની આગાહી કરવામાં આવી છે...અમદાવાદ અને ગાંધીનગરમાં મધ્ય વરસાદ વરસવાની શક્યતા છે...ઉલ્લેખનીય છે કે 1 જૂનથી આજદિન સુધી ગુજરાતમાં 522 મિલી વરસાદ થયો છે...ગુજરાતમાં સિઝનનો સામાન્ય કરતાં 9 ટકા વધુ વરસાદ નોંધાયો છે.

હવામાન નિષ્ણાંત અંબાલાલ પટેલે કહ્યું કે રાજ્યમાં હાલમાં જે વરસાદી ઝાપટા પડી રહ્યાં છે તે આગામી દિવસોમાં વધી શકે છે. તેમણે કહ્યું કે 14 ઓગસ્ટ સુધી ગુજરાત અને સૌરાષ્ટ્રના ભાગોમાં અતિ ભારે વરસાદ થવાની શક્યતા છે. અંબાલાલ પટેલે કહ્યું કે ઉત્તર ગુજરાત, મધ્ય ગુજરાત અને કચ્છમાં પણ વરસાદ પડી શકે છે.     

પોતાની સચોટ આગાહી માટે જાણીતા અંબાલાલ પટેલે કહ્યું કે 15 ઓગસ્ટ બાદ બંગાળના ઉપસાગરમાં એક સિસ્ટમ સક્રિય થઈ રહી છે. આ સિસ્ટમ સક્રિય થતાં 17થી 24 ઓગસ્ટ દરમિયાન મેઘરાજા ગુજરાતમાં ભુક્કા બોલાવશે. આ દરમિયાન રાજ્યભરમાં સાર્વત્રિક વરસાદ થઈ શકે છે. એટલે કો ઓગસ્ટના ત્રીજા સપ્તાહમાં અતિ ભારે વરસાદ થવાને કારણે નદીઓમાં પૂર આવવાની શક્યતા છે.  

અંબાલાલની આગાહી પ્રમાણે 16થી 24 ઓગસ્ટે સારા વરસાદની સંભાવના છે. દક્ષિણ ગુજરાતમાં ભારે વરસાદને કારણે નદીઓમાં પૂર આવી શકે છે. અંબાલાલે કહ્યું કે મધ્ય પ્રદેશમાં ભારે વરસાદને કારણે નર્મદા ડેમમાં પણ પાણી આવશે. હવામાન નિષ્ણાંતે કહ્યું કે 17 ઓગસ્ટના માખીઓનું જોર વધશે. તેમણે કહ્યું કે મઘા નક્ષત્ર આવે છે એટલે માખીઓનું જોર વધી શકે છે. તો 30 ઓગસ્ટે મચ્છરોનું જોર વધશે. એટલે કે લોકોએ પોતાના સ્વાસ્થ્યનું ધ્યાન રાખવું જોઈએ.

રાજ્યમાં વરસાદ અંગે વાત કરતા હવામાન નિષ્ણાંત પરેશ ગોસ્વામીએ પણ આગાહી કરી છે. પરેશ ગોસ્વામીએ કહ્યું કે ગુજરાતમાં 17 ઓગસ્ટ બાદ વરસાદનો નવો રાઉન્ડ આવી શકે છે. એટલે કે રાજ્યમાં તહેવારોના સમયે વરસાદનો નવો રાઉન્ડ આવી શકે છે.