19 બોલ પહેલા જ જીતી ગયું ભારત, તેમ છતાં બોલિંગ કરતા રહ્યા બોલરો, ઓસ્ટ્રેલિયામાં આ શું થયું?

India vs Prime Minister-11: ભારતીય ટીમ ઓસ્ટ્રેલિયામાં પાંચ ટેસ્ટ મેચોની બોર્ડર ગાવસ્કર ટ્રોફી રમી રહી છે. ભારતે પોતાની પ્રથમ મેચ જીતીને 1-0ની લીડ મેળવી લીધી છે. બીજી મેચ એડિલેડ ઓવલમાં પિંક બોલ ડે-નાઈટ ટેસ્ટ છે. 6 ડિસેમ્બરે યોજાનારી આ મેચ પહેલા ભારતે પ્રાઈમ મિનિસ્ટર-11 સાથે બે દિવસીય વોર્મ-અપ મેચ રમી હતી. આ મેચમાં ટીમ ઈન્ડિયાએ 19 બોલ બાકી રહેતા જીત મેળવી હતી, પરંતુ તેના પછી પણ બેટ્સમેનોએ આખી ઓવર રમી હતી. ફેન્સને આ જોઈને આશ્ચર્ય થયું કારણ કે સામાન્ય રીતે કોઈપણ મેચ જીત સાથે સમાપ્ત થાય છે. પણ આવું કેમ થયું? ચાલો તમને જણાવીએ...

હર્ષિત-ગિલ રહ્યા ટોપ પરફોર્મર
ભારતની જીતમાં ફાસ્ટ બોલર હર્ષિત રાણા અને યુવા બેટ્સમેન શુભમન ગીલે શ્રેષ્ઠ પ્રદર્શન કર્યું હતું. પ્રાઈમ મિનિસ્ટર-11ને 240 રનમાં આઉટ કરવામાં હર્ષિત રાણાએ મોટી ભૂમિકા ભજવી હતી. તેમણે ચાર વિકેટ લઈને બેટિંગ ઓર્ડરને પવેલિયનમાં મોકલી દીધા હતા. આ પછી ભારતીય ટીમ બેટિંગ કરવા આવી અને શુભમન ગિલના 50 રનની મદદથી 6 વિકેટે મેચ જીતી લીધી. નીતિશ રેડ્ડી અને વોશિંગ્ટન સુંદરે શાનદાર બેટિંગ કરી અને 42-42 રન ઉમેર્યા.

જીત પછી પણ કેમ ચાલતી રહી મેચ?
પ્રથમ દિવસની રમત વરસાદના કારણે ધોવાઈ ગઈ હતી. જ્યારે બીજા દિવસે વરસાદના વિક્ષેપને કારણે મેચ 46-46 ઓવરની કરવામાં આવી હતી. પ્રાઈમ મિનિસ્ટર-11ના 240 રનના જવાબમાં ભારતે 42.5 ઓવરમાં 241 રન બનાવીને ટાર્ગેટ પૂરો કર્યો હતો. આ પછી પણ ભારતીય બેટ્સમેનોએ સમગ્ર 46 ઓવર સુધી બેટિંગ ચાલુ રાખી હતી. આ એક વોર્મ અપ મેચ હતી. ભારતની પણ વિકેટો બાકી હતી. આવી સ્થિતિમાં ટીમ ઈન્ડિયાએ 46 ઓવર પૂરી થઈ ત્યાં સુધી બેટિંગ ચાલુ રાખી હતી. ભારતે આખી ઓવર રમીને 5 વિકેટ ગુમાવીને કુલ 257 રન બનાવ્યા હતા.

2-0ની લીડ પર ભારતની નજર
જસપ્રિત બુમરાહના કેપ્ટન્સીમાં ભારતે પર્થ ટેસ્ટ મેચ જીતીને સિરીઝમાં 1-0ની લીડ મેળવી હતી. હવે ટીમની નજર એડિલેડ ટેસ્ટમાં જીત નોંધાવીને આ લીડને મજબૂત કરવા પર રહેશે. કેપ્ટન રોહિત શર્મા પણ ટીમ સાથે જોડાયો છે, જે પ્રથમ ટેસ્ટનો ભાગ નહોતો. ટીમમાં તેના આગમન સાથે એ જોવાનું રસપ્રદ રહેશે કે આગામી મેચના પ્લેઇંગ-11માંથી કોણ બહાર થશે? પિંક બોલ ટેસ્ટમાં રોહિત કયા નંબર પર બેટિંગ કરવા આવે છે તે જોવું પણ રસપ્રદ રહેશે.