ನಟ ದುನಿಯಾ ವಿಜಯ್ ಜೈಲಿನಿಂದ ಬಿಡಿಸಿದ್ದ ಆರೋಪಿ ಮತ್ತೆ ಜೋಡಿ ಕೊಲೆಯಲ್ಲಿ ಬಂಧನ

ಬೆಂಗಳೂರು: ಸ್ಯಾಂಡಲ್‌ವುಡ್‌ ನಟ ದುನಿಯಾ ವಿಜಯ್ ಹಣ ಕೊಟ್ಟು ಜೈಲಿಂದ ಬಿಡುಗಡೆ ಮಾಡಿಸಿದ್ದ ಆರೋಪಿಯೊಬ್ಬ ಮತ್ತೆ ಜೋಡಿ ಕೊಲೆ ಪ್ರಕರಣದಲ್ಲಿ ಜೈಲು ಪಾಲಾಗಿದ್ದಾನೆ. ಈ ಮೊದಲು ಡಬಲ್ ಮರ್ಡರ್ ಒಂದರಲ್ಲಿ ಜೈಲು ಸೇರಿದ್ದ. ಸಾಲದಕ್ಕೆ ಆತನ ಮೇಲೆ ಒಂದು ರೇಪ್ ಕೇಸ್ ಸಹ ಇತ್ತು. 

ಹತ್ತು ವರ್ಷ ಶಿಕ್ಷೆ ಅನುಭವಿಸಿದ್ದ ಅಪರಾಧಿಗೆ ಶ್ಯೂರಿಟಿ ಹಣ ನೀಡಲು ಯಾರು ಮುಂದೆ ಬಂದಿರಲಿಲ್ಲ. ಆದರೆ ಒಂದಷ್ಟು ಜನಕ್ಕೆ ನಟ  ದುನಿಯಾ ವಿಜಯ್ ಸಹಾಯ ಮಾಡಿ ಒಬ್ಬರಿಗೆ ಮೂರು ಲಕ್ಷದಂತೆ ಹಣ ಕಟ್ಟಿ ಜೈಲಿನಿಂದ ಬಿಡುಗಡೆ ಮಾಡಿಸಿದ್ದರು. ಆದರೆ ಅದರಲ್ಲಿ ಒಬ್ಬ ದುನಿಯಾ ವಿಜಯ್ ಆಶಯಕ್ಕೆ ಮಣ್ಣೆರೆಚಿ ಮತ್ತೆ ಜೋಡಿ ಕೊಲೆ ಕೇಸಲ್ಲಿ ಅರೆಸ್ಟ್ ಆಗಿದ್ದಾನೆ. 

ಇದನ್ನೂ ಓದಿ: kolar breaking: ಮದುವೆಯಾದ ದಿನವೇ ಹೊಡೆದಾಡಿಕೊಂಡು ಮಸಣ ಸೇರಿದ ಮದುಮಕ್ಕಳು !

ಕಳೆದ ಶುಕ್ರವಾರ ಬಾಗಲೂರು ಠಾಣಾ ವ್ಯಾಪ್ತಿಯಲ್ಲಿ ಜೊಡಿ ಕೊಲೆ ನಡೆದಿತ್ತು. ಎಸ್ ಆರ್ ಎಸ್ ಬಸ್ ಡಿಪೋದಲ್ಲಿ ನಾಗೇಶ್ ( 55 ) ಮತ್ತು ಮಂಜುನಾಥ್ ( 50 ) ಎಂಬುವರನ್ನ ರಾಡ್ ನಿಂದ ಹೊಡೆದು ಕೊಲೆ ಮಾಡಿ ಪರಾರಿಯಾಗಿದ್ದ ಆರೋಪಿ ಸುರೇಶ್ @ ನಾಲ್ಕಾಣಿಯನ್ನ ಪೊಲೀಸರು ಬಂಧಿಸಿದ್ದಾರೆ. ಈ ಸುರೇಶ್ @ ನಾಲ್ಕಾಣಿ ಜೋಡಿ ಕೊಲೆಯಲ್ಲಿ ಈ ಹಿಂದೆ ಜೈಲು ಸೇರಿದ್ದ. ಹತ್ತು ವರ್ಷ ಶಿಕ್ಷೆ ಅನುಭವಿಸಿದ್ದ ಸುರೇಶ್ ಗೆ  ಶ್ಯೂರಿಟಿ ಹಣ ನೀಡಿ ಹೊಸ ಜೀವನ ಪ್ರಾರಂಭಿಸಿ ಅಂತಾ ದುನಿಯಾ ವಿಜಯ್ ಹೇಳಿ ಬಿಡಿಸಿದ್ರು. ಬಿಡುಗಡೆಯಾದ ನಂತರ ಸುರೇಶ್ ಕೆ ಆರ್ ಮಾರ್ಕೆಟ್ ನಲ್ಲಿ ಸೊಪ್ಪು ಮಾರಾಟ ಮಾಡಿಕೊಂಡಿದ್ದ.

ಸುರೇಶ್ ಸಂಬಂಧಿ ಬಸ್ ಶೆಡ್ ನಲ್ಲಿ ಕೆಲಸ ಕೊಡಿಸಿದ್ದರು. ಆದರೆ ಈ ಸುರೇಶ ಶೆಡ್ ನಲ್ಲಿ ಗುಜರಿ ಕಬ್ಬಿಣ ಮಾರುವ ವಿಚಾರಕ್ಕೆ ಗಲಾಟೆ ಮಾಡಿಕೊಂಡು ಮತ್ತೆ ಡಬಲ್ ಮರ್ಡರ್ ಮಾಡಿ ಪೊಲೀಸರ ಅತಿಥಿಯಾಗಿದ್ದಾನೆ. ಸುರೇಶ್ ಗೆ ಕೊಲೆಯಾದ  ನಾಗೇಶ್ ಮತ್ತು ಮಂಜುನಾಥ್ ಮೊದಲಿಗೆ ಬೈದು ನೀನು ಕಳ್ಳ, ನಿನ್ನ ಮೇಲೆ ಕೇಸ್ ಗಳಿವೆ ಎಂದು ಹಿಯಾಳಿಸಿ ಹಲ್ಲೆ ನಡೆಸಿದ್ದರಂತೆ. ಶುಕ್ರವಾರ ರಾತ್ರಿ ಸಹ ಕುಡಿದು ನಿಂದಿಸಿದ್ದರಂತೆ‌. ಇದರಿಂದ ಬೇಸತ್ತು ಇಬ್ಬರನ್ನ ರಾಡ್ ನಿಂದ ಹೊಡೆದು ಕೊಲೆ ಮಾಡಿ ಪರಾರಿಯಾಗಿದ್ದ ಆರೋಪಿ ಸುರೇಶ್ ನನ್ನ ಸದ್ಯ ಬಾಗಲೂರು ಪೊಲೀಸ್ರು ಬಂಧಿಸಿದ್ದಾರೆ.