ತೆಲಂಗಾಣದಲ್ಲಿ 8900 ಕೆಜಿ ಸ್ಫೋಟಕ ವಸ್ತು ವಶ, ಇಬ್ಬರ ಬಂಧನ

ಸ್ಫೋಟಕ ಕಾಯ್ದೆಯ ಸೆಕ್ಷನ್ 9 (ಬಿ) (1) (ಸಿ) ಅಡಿಯಲ್ಲಿ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ.

Representational image

ಹೈದರಾಬಾದ್: 8,900 ಕೆಜಿ ಸ್ಫೋಟಕ ವಸ್ತುಗಳನ್ನು (376 ಬೂಸ್ಟರ್ ಮತ್ತು 165 ವಿದ್ಯುತ್ ರಹಿತ ಡಿಟೋನೇಟರ್‌) ವಶಪಡಿಸಿಕೊಂಡಿರುವ ಪೊಲೀಸರು ಪ್ರಕರಣಕ್ಕೆ ಸಂಬಂಧಿಸಿದಂತೆ ಇಬ್ಬರನ್ನು ಬಂಧಿಸಿದ್ದಾರೆ.

"ಶನಿವಾರ ತಡರಾತ್ರಿ ಕೀಸರ ಪೊಲೀಸ್ ಮತ್ತು ವಿಶೇಷ ಕಾರ್ಯಾಚರಣೆ ತಂಡ ಸ್ಫೋಟಕ ವಸ್ತುಗಳನ್ನು ಹೊಂದಿರುವ ಎರಡು ವಾಹನಗಳನ್ನು ವಶಪಡಿಸಿಕೊಂಡಿದ್ದು, ಇಬ್ಬರು ವ್ಯಕ್ತಿಗಳನ್ನು ವಶಕ್ಕೆ ತೆಗೆದುಕೊಳ್ಳಲಾಗಿದೆ" ಎಂದು ರಾಚಕೊಂಡ ಪೊಲೀಸರು ಭಾನುವಾರ ತಿಳಿಸಿದ್ದಾರೆ.

ಅಕ್ಟೋಬರ್ 12 ರಂದು ವಾಹನದ ಚಾಲಕ ಟಿ.ವೆಂಕಟೇಶಂ ಅವರು ಸ್ಫೋಟಕ ವಸ್ತುಗಳನ್ನು ಲೋಡ್ ಮಾಡಿದ ನಂತರ ಸಂಜೆ 7 ಗಂಟೆಗೆ ಬೊಮ್ಮಲರಾಮರಂನಿಂದ ಹೊರಟು ಕೀಸರಾದಲ್ಲಿ ಅವರು ಶ್ರವಣ್ ರೆಡ್ಡಿ ಅವರನ್ನು ಭೇಟಿಯಾದರು. ಅವರ ಸೂಚನೆಯ ಮೇರೆಗೆ ಅವರು ಕಿಸರಾದ ವನ್ನಿಗುಡೆಮ್ನಲ್ಲಿರುವ ಹರ್ಷ ಸ್ಟೋನ್ ಇಂಡಸ್ಟ್ರಿಯಲ್ಲಿ ಸಂಪೂರ್ಣ ಸ್ಫೋಟಕ ವಸ್ತುಗಳನ್ನು ಇಳಿಸಿದರು.

ಏತನ್ಮಧ್ಯೆ, ನಿರ್ದಿಷ್ಟ ಮಾಹಿತಿಯ ಮೇರೆಗೆ, ಎಸ್‌ಒಟಿ ರಾಚಕೊಂಡ ಮತ್ತು ಸಿಬ್ಬಂದಿಗಳೊಂದಿಗೆ ದಾಳಿ ನಡೆಸಿದ ಕಿಸಾರ ಪೊಲೀಸ್ ಇನ್ಸ್‌ಪೆಕ್ಟರ್ ಜೆ.ನರೇಂದರ್ ಗೌಡ್ ಮತ್ತು ನವೀನ್ ಕುಮಾರ್  ವಾಹನಗಳ ಜೊತೆಗೆ ವಸ್ತುಗಳನ್ನು ವಶಪಡಿಸಿಕೊಂಡಿದ್ದಾರೆ. ಚಾಲಕ ವೆಂಕಟೇಶಂ ಮತ್ತು ಶ್ರವಣ್ ರೆಡ್ಡಿ ಅವರನ್ನು ವಶಕ್ಕೆ ತೆಗೆದುಕೊಳ್ಳಲಾಗಿದೆ.

ಸ್ಫೋಟಕ ಕಾಯ್ದೆಯ ಸೆಕ್ಷನ್ 9 (ಬಿ) (1) (ಸಿ) ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ. ಹೆಚ್ಚಿನ ತನಿಖೆ ನಡೆಸಲಾಗುತ್ತಿದೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.