ಯು ಟರ್ನ್ 2 : ಪಿಜ್ಜಾ ಹುಡುಗರ ಹಾರರ್ ಕಥೆಯ ಟ್ರೈಲರ್ ರಿಲೀಸ್‌..!

Uturn 2 : ಹಾರರ್, ಕಾಮಿಡಿ ಡ್ರಾಮಾ ಕಥಾಹಂದರ ಹೊಂದಿರುವ "ಯೂ ಟರ್ನ್ -2 "ಚಿತ್ರದ ಟ್ರೈಲರ್ ನ್ನು ಇತ್ತೀಚಿಗೆ ಶಾಸಕ ಸತೀಶ್ ರೆಡ್ಡಿ ಅವರು ಬಿಡುಗಡೆ ಮಾಡಿದರು. ಈ ಸಂದರ್ಭದಲ್ಲಿ ವಿಧಾನ ಪರಿಷತ್ ಮಾಜಿ ಸದಸ್ಯ ಲಕ್ಷ್ಮಿ ನಾರಾಯಣ, ಶ್ರೀನಿವಾಸ ರೆಡ್ಡಿ, ನಟ ಮಯೂರ್ ಸೇರಿದಂತೆ ಅನೇಕರು  ಮುಖ್ಯ ಅತಿಥಿಗಳಾಗಿ ಪಾಲ್ಗೊಂಡು ಚಿತ್ರಕ್ಕೆ ಶುಭ ಕೋರಿದರು. ನಿರ್ಮಾಪಕ ಆನಂದ್, ಚಂದ್ರು ಇಬ್ಬರೂ ನನ್ನ ಸ್ನೇಹಿತರು. ಈ ಸಿನಿಮಾ ಯಶಸ್ವಿಯಾಗಲಿ, ಕೋವಿಡ್ ಟೈಂ ನಲ್ಲಿ ಅನೇಕ ನಿರ್ಮಾಪಕರು ಸಂಕಷ್ಟ ಅನುಭವಿಸಿದರು. ಈಗ ಒಳ್ಳೆಯ ಕಾಲ ಬಂದಿದೆ ಎಂದು ಹೇಳಿದರು.

ಚಿತ್ರರಂಗದಲ್ಲಿ  ಹಲವಾರು ವರ್ಷಗಳಿಂದ ಸಂಗೀತ ನಿರ್ದೇಶಕನಾಗಿ ಕೆಲಸ ಮಾಡುತ್ತಿರುವ ಚಂದು ಓಬಯ್ಯ‌‌ ಮೊದಲಬಾರಿಗೆ ಆಕ್ಷನ್ ಕಟ್ ಹೇಳುವುದರೊಂದಿಗೆ ನಾಯಕನಾಗಿಯೂ ಕಾಣಿಸಿಕೊಂಡಿರುವ ಈ ಚಿತ್ರದಲ್ಲಿ ತಿಥಿ ಪೂಜಾ, ಸ್ನೇಹಾ ಭಟ್, ಮಂಜು ಪಾವಗಡ, ಚಿಲ್ಲರ್ ಮಂಜು, ಡಿಂಗ್ರಿ ನಾಗರಾಜ್ ಸೇರಿದಂತೆ  ಅನೇಕ ಹಿರಿ ಕಿರಿಯ ಕಲಾವಿದರು ನಟಿಸಿದ್ದಾರೆ. ಪಿಜ್ಜಾ ಡಿಲವರಿ ಹುಡುಗನೊಬ್ಬನ ಸುತ್ತ ನಡೆಯುವ ಹಾರರ್ ಕಥೆಯಿದು. ನಿರ್ಮಾಪಕ ಆನಂದ್ ಸಂಪಂಗಿ ಈ ಚಿತ್ರದಲ್ಲಿ ಖಳನಟನಾಗಿಯೂ ಕಾಣಿಸಿಕೊಂಡಿದ್ದಾರೆ. ಅವರು ಮಾತನಾಡಿ ಚಿತ್ರದಲ್ಲಿ ನನ್ನ ಪಾತ್ರಕ್ಕೆ 2 ಶೇಡ್ಸ್ ಇದೆ. ಸಮಾಜಸೇವಕ ಹಾಗೂ ವಿಲನ್ ಆಗಿಯೂ ಕಾಣಿಸಿಕೊಂಡಿದ್ದೇನೆ. ಹೊಸ ತಂಡವನ್ನು ಬೆಂಬಲಿಸಿ ಎಂದರು.

ಇದನ್ನೂ ಓದಿ: ಶಿವಾಜಿ ಕಾಲದಲ್ಲಿ ವಿದ್ಯುತ್‌ ಬಲ್ಬ್‌ ಹೇಗೆ ಬಂತು ಗುಟ್ಕಾ ರಾಜ..?

ನಟ, ನಿರ್ದೇಶಕ ಚಂದು ಓಬಯ್ಯ ಮಾತನಾಡಿ ವಿಶೇಷವಾಗಿ ಏನಾದರೂ ಮಾಡೋಣವೆಂದು ಒಳ್ಳೆಯ ತಂಡ ಕಟ್ಟಿಕೊಂಡು ಈ ಸಿನಿಮಾ ಮಾಡಿದ್ದೇವೆ. ನಾನು ಒಮ್ಮೆ ಚೆನ್ನೈಗೆ ಹೋಗಿದ್ದಾಗ ಅಲ್ಲಿ ಆದಂಥ ಅನುಭವ ಇಟ್ಟುಕೊಂಡು ಈ ಸ್ಕ್ರಿಪ್ಟ್ ಮಾಡಿದ್ದೇನೆ. ಹೊನ್ನಾವರ, ಬೆಂಗಳೂರು, ಬಿಡದಿಯಲ್ಲಿ 40 ದಿನಗಳ ಕಾಲ ಚಿತ್ರೀಕರಣ ಮಾಡಲಾಗಿದೆ. ಹಾರರ್ ಕಥೆಯ ಜೊತೆಗೊಂದು ಸಾಮಾಜಿಕ ಸಂದೇಶ ಈ ಚಿತ್ರದಲ್ಲಿದೆ. ಕಮರ್ಷಿಯಲ್ ಅಂಶಗಳೂ ಇವೆ. ಚಿತ್ರದ ಸೌಂಡ್ ವರ್ಕ್ ತುಂಬಾ ಚೆನ್ನಾಗಿದೆ. ನಾನು ನಾಯಕನಾಗುತ್ತೇನೆ ಅಂತ ಅಂದುಕೊಂಡಿದ್ದಿಲ್ಲ‌, ಹಳ್ಳಿಯಿಂದ ಹೊಟ್ಟೆ ಪಾಡಿಗೆಂದು ಬಂದವರು ನಾಯಕನಾಗಿದ್ದೇನೆ ಎಂದರು.

ಲಕ್ಷ್ಮಿ ನಾರಾಯಣ, ಪಾಯಲ್ ಚೆಂಗಪ್ಪ ಚಿತ್ರಕ್ಕೆ ಶುಭ ಕೋರಿದರು. ಸ್ನೇಹಾ ಭಟ್ ಮಾತನಾಡಿ ಈ ಸಿನಿಮಾದಿಂದ ನನ್ನ ಜರ್ನಿ ಆರಂಭವಾಯಿತು. ಈಗಾಗಲೇ ನಾಲ್ಕೈದು ಚಿತ್ರದಲ್ಲಿ ನಟಿಸಿದ್ದೇನೆ. ನನ್ನ ಪಾತ್ರದ ಹೆಸರು ಚೈತ್ರಾ ಸಮಾಜ ಸೇವಕರ ಕಾರ್ಯದರ್ಶಿಯಾಗಿ ಕಾಣಿಸಿಕೊಂಡಿದ್ದೇನೆ ಎಂದರು. ರಘು ರಮಣಕೊಪ್ಪ, ಮಂಜು ಪಾವಗಡ,  ಚಿಲ್ಲರ್ ಮಂಜು, ಡಿಂಗ್ರಿ ನಾಗರಾಜ್ ಚಿತ್ರದ ಕುರಿತಂತೆ ಹೇಳಿಕೊಂಡರು.