ನವದೆಹಲಿ: ಕೇಂದ್ರೀಯ ತನಿಖಾ ದಳ (ಸಿಬಿಐ) ಬುಧವಾರ ಉತ್ತರ ಪ್ರದೇಶದ ಹಲವಾರು ಪ್ರದೇಶಗಳಲ್ಲಿ ಅಧಿಕಾರಿಗಳ ಮನೆ, ಕಚೇರಿಯಲ್ಲಿ ದಾಳಿ ನಡೆಸಿದ್ದಾರೆ. ವಿಶೇಷ ವಿಷಯವೆಂದರೆ ಈ ದಾಳಿ ಉತ್ತರ ಪ್ರದೇಶದ ಇಬ್ಬರು ಜಿಲ್ಲಾಧಿಕಾರಿಗಳ ನೆಲೆಗಳ ಮೇಲೆ ನಡೆದಿವೆ. ಸಿಬಿಐ ಅಧಿಕಾರಿಗಳು ಬುಲಂದ್ಶಹರ್ ಡಿಎಂ ಅಂಬಾದ್ ಮತ್ತು ಡಿಯೋರಿಯಾದ ಮಾಜಿ ಡಿಎಂ ವಿವೇಕ್ ಕುಮಾರ್ ಅವರ ಮನೆಗಳು ಮತ್ತು ಕಚೇರಿಗಳ ಮೇಲೆ ದಾಳಿ ನಡೆಸಿದ್ದಾರೆ.
ಬುಲಂದ್ಶಹರ್, ಲಕ್ನೋ, ಫತೇಪುರ್, ಅಜಮ್‌ಗಢ, ಅಲಹಾಬಾದ್, ನೋಯ್ಡಾ, ಗೋರಖ್‌ಪುರ ಮತ್ತು ಡಿಯೋರಿಯಾ ಸೇರಿದಂತೆ 12 ಸ್ಥಳಗಳಲ್ಲಿ ಸಿಬಿಐ ಬುಧವಾರ ದಾಳಿ ನಡೆಸಿದೆ. ಎರಡು ಪ್ರತ್ಯೇಕ ಅಕ್ರಮ ಗಣಿಗಾರಿಕೆ ಪ್ರಕರಣಗಳಿಗೆ ಸಂಬಂಧಿಸಿದಂತೆ ಈ ಕ್ರಮ ಕೈಗೊಳ್ಳಲಾಗಿದೆ.
ಮಾಹಿತಿಯ ಪ್ರಕಾರ, ಬುಧವಾರ ಬೆಳಿಗ್ಗೆ ಸಿಬಿಐ, ಬುಲಂದ್ಶಹರ್ ಜಿಲ್ಲಾಧಿಕಾರಿ ಅಭಯ್ ಸಿಂಗ್ ಅವರ ಮನೆ ಕಚೇರಿಯಲ್ಲಿ ದಾಳಿ ನಡೆಸಿದೆ. ನಿವಾಸದ ಬಳಿ ಮಾಧ್ಯಮಗಳ ಪ್ರವೇಶವನ್ನು ತಡೆಯಲಾಗಿದೆ. ಬೆಳಿಗ್ಗೆ 9 ಗಂಟೆಯಿಂದ ದಾಳಿಯ ಕಾರ್ಯಾಚರಣೆ ಪ್ರಾರಂಭವಾಗಿದ್ದು, ತನಿಖಾ ಸಂಸ್ಥೆ ಹಣ ಎಣಿಸುವ ಯಂತ್ರವನ್ನೂ ವಶಪಡಿಸಿಕೊಂಡಿರುವುದಾಗಿ ತಿಳಿದುಬಂದಿದೆ. (ಅಭಯ್ ಸಿಂಗ್ ಬುಲಂದ್ಶಹರ್ ಜಿಲ್ಲಾಧಿಕಾರಿಯಾಗುವ ಮೊದಲುಅಖಿಲೇಶ್ ಯಾದವ್ ಅವರ ಅಧಿಕಾರಾವಧಿಯಲ್ಲಿ ಫತೇಪುರದ ಡಿಎಂ ಆಗಿದ್ದರು.)
ಅದೇ ಸಮಯದಲ್ಲಿ, ತನಿಖಾ ಸಂಸ್ಥೆ ದೇವರಿಯ ಮಾಜಿ ಡಿಎಂ ವಿವೇಕ್ ಕುಮಾರ್ ಅವರ ಮನೆ ಮೇಲೂ ದಾಳಿ ನಡೆಸಿದೆ. ಮಾಹಿತಿಯ ಪ್ರಕಾರ ಸಿಬಿಐ ಬುಲಂದ್ಶಹರ್ ಜಿಲ್ಲಾಧಿಕಾರಿ ಅಭಯ್ ಸಿಂಗ್ ಅವರ ಮನೆ ಮತ್ತು ಕಚೇರಿ ಮೇಲೆ ದಾಳಿ ನಡೆಸಿದ ಸಂದರ್ಭದಲ್ಲಿ 47 ಲಕ್ಷ ರೂಪಾಯಿಗಳನ್ನು ವಶಪಡಿಸಿಕೊಂಡಿದೆ. ಅದೇ ಸಮಯದಲ್ಲಿ, ಡಿಯೋರಿಯಾದ ಎಡಿಎಂ ದೇವಿ ಶರಣ್ ಉಪಾಧ್ಯಾಯ ಅವರ ನಿವಾಸದ ಮೇಲೆ ನಡೆದ ದಾಳಿಯಲ್ಲಿ 10 ಲಕ್ಷ ನಗದು ವಶಪಡಿಸಿಕೊಳ್ಳಲಾಗಿದೆ. ಇದಲ್ಲದೆ, ಡಿಯೋರಿಯಾದ ಮಾಜಿ ಡಿಎಂ ಮತ್ತು ಪ್ರಸ್ತುತ ನಿರ್ದೇಶಕ (ತರಬೇತಿ ಮತ್ತು ಉದ್ಯೋಗ) ಲಕ್ನೋ ವಿವೇಕ್ ಕುಮಾರ್ ಅವರಿಂದ ಆಸ್ತಿಗೆ ಸಂಬಂಧಿಸಿದ ದಾಖಲೆಗಳನ್ನು ಸಿಬಿಐ ಅಧಿಕಾರಿಗಳು ವಶಪಡಿಸಿಕೊಂಡಿದ್ದಾರೆ.
