Nursing Student Death: പത്തനംതിട്ടയിലെ നഴ്സിങ് വിദ്യാർഥിയുടെ മരണം; മൂന്ന് സഹപാഠികൾ കസ്റ്റഡിയിൽ

Nursing Student Death Case: നവംബർ 15ന് ആണ് തിരുവനന്തപുരം അയിരൂപ്പാറ സ്വദേശി അമ്മു എസ് സജീവ് (23) മരിച്ചത്. വൈകിട്ട് കോളേജിൽ നിന്ന് തിരികെയെത്തിയ അമ്മുവിനെ കെട്ടിടത്തിന് മുകളിൽ നിന്ന് വീണ് മരിച്ച നിലയിൽ കണ്ടെത്തുകയായിരുന്നു.

പത്തനംതിട്ട: പത്തനംതിട്ടയിലെ നഴ്സിങ് വിദ്യാർഥിനിയുടെ മരണത്തിൽ സഹപാഠികളായ മൂന്ന് പേർ കസ്റ്റഡിയിൽ. സഹപാഠികൾക്കെതിരെ മരിച്ച വിദ്യാർഥിയുടെ കുടുംബം ആരോപണം ഉയർത്തിയിരുന്നു. ഇവരെയാണ് കസ്റ്റിഡിയിൽ എടുത്തത്. ഇവർക്കെതിരെ ആത്മഹത്യാ പ്രേരണക്കുറ്റം ചുമത്തും.

നവംബർ 15ന് ആണ് തിരുവനന്തപുരം അയിരൂപ്പാറ സ്വദേശി അമ്മു എസ് സജീവ് (23) മരിച്ചത്. പത്തനംതിട്ട ചുട്ടിപ്പാറ നഴ്സിങ് കോളേജിലെ നാലാംവർഷ വിദ്യാർഥിനിയായിരുന്ന അമ്മു താഴെവെട്ടിപ്രത്തെ ഹോസ്റ്റൽ കെട്ടിടത്തിന് മുകളിൽ നിന്ന് ചാടി മരിക്കുകയായിരുന്നു. വൈകിട്ട് കോളേജിൽ നിന്ന് തിരികെയെത്തിയ അമ്മുവിനെ കെട്ടിടത്തിന് മുകളിൽ നിന്ന് വീണ് മരിച്ച നിലയിൽ കണ്ടെത്തുകയായിരുന്നു.

വീഴ്ചയിൽ ​നട്ടെല്ലിനും വാരിയെല്ലിനും ​ഗുരുതരമായി പരിക്കേറ്റ പെൺകുട്ടിയെ ആശുപത്രിയിൽ എത്തിച്ചെങ്കിലും ചികിത്സയിലിരിക്കെ മരണം സംഭവിച്ചു. നാല് വർഷത്തോളമായി അമ്മു താഴെവെട്ടിപ്രത്തെ ഹോസ്റ്റലിലാണ് താമസിച്ചിരുന്നത്. മരണത്തിൽ ദുരൂഹതയുണ്ടെന്ന് കുടുംബം ആരോപിച്ചിരുന്നു.

സഹപാഠികളിൽ നിന്ന് അമ്മുവിന് മാനസിക പീഡനം ഏൽക്കേണ്ടി വന്നുവെന്നും ക്ലാസിലും ഹോസ്റ്റലിലും ഇവർ ശല്യം ചെയ്തിരുന്നുവെന്നും കുടുംബം ആരോപിച്ചിരുന്നു. സംഭവത്തിൽ പ്രിൻസിപ്പൽ ഉൾപ്പെടെയുള്ളവരുടെ മൊഴി രേഖപ്പെടുത്തിയിരുന്നു. അമ്മുവിന്റെ മൊബൈൽ ഫോൺ പോലീസ് ശാസ്ത്രീയ പരിശോധനയ്ക്ക് വിധേയമാക്കിയിരുന്നു.