സിനിമാപ്രേമികൾ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് 'മാമന്നൻ'. നീണ്ട ഇടവേളയ്ക്ക് ശേഷം മാരി സെൽവരാജ് ഒരുക്കുന്ന ചിത്രമെന്ന പ്രത്യേകതയും ഇതിനുണ്ട്. ഉദയനിധി സ്റ്റാലിൻ അഭിനയിക്കുന്ന അവസാനത്തെ ചിത്രംകൂടിയാണ് 'മാമന്നൻ'. എ.ആർ. റഹ്‌മാൻ സംഗീതസംവിധാനം നിർവഹിച്ച ഗാനങ്ങളുടെ ലോഞ്ച് നാളുകൾക്കു മുന്നെയായിരുന്നു നടന്നത്. ഈ ചടങ്ങിൽ നടന്ന ഒരു സംഭവമാണ് ഇപ്പോൾ ശ്രദ്ധ നേടുന്നത്.
രാസാക്കണ്ണ് എന്ന ഗാനമായിരുന്നു 'മാമന്നനി'ലേതായി ആദ്യം പുറത്തു വന്നത്. 'മാമന്നൻ' ഓഡിയോ ലോഞ്ച് ചടങ്ങിലെ പ്രത്യേക അതിഥിയായിരുന്നു കമൽഹാസൻ. വടിവേലു ആലപിച്ച നാടൻപാട്ട് ശൈലിയിലുള്ള ഗാനം ആരാധകർ ആവേശത്തോടെയാണ് ഏറ്റെടുത്തത്. ഈ ഗാനം വടിവേലുവും എ.ആർ. റഹ്‌മാനും ഓഡിയോ ലോഞ്ചിനിടെ ചേർന്ന് വേദിയിൽ ആലപിച്ചു. ചടങ്ങിൽ ഉണ്ടായിരുന്ന കമൽഹാസൻ ഇതു കേട്ട് കരഞ്ഞു. എ.ആർ. റഹ്‌മാന്റെ സോഷ്യൽ മീഡിയ ഫാൻസ് ഗ്രൂപ്പുകളിലൂടെ പ്രചരിക്കുകയാണ് ഇതിന്റെ വീഡിയോ.
Highlight of the day !!! @arrahman #Vadivelu #MAAMANNANpic.twitter.com/0QiF6t5VfY
— A.R.Rahman News (@ARRahman_News) June 1, 2023
കമൽ നേരത്തേ സംവിധായകൻ മാരി സെൽവരാജിനൊപ്പം 'മാമന്നൻ' കണ്ടിരുന്നു. ചിത്രത്തെയും സംവിധായകനേയും പുകഴ്ത്തി ഓഡിയോ ലോഞ്ച് വേദിയിൽവെച്ച് സംസാരിക്കുകയും ചെയ്തു അദ്ദേഹം. കോടിക്കണക്കായ ജനങ്ങളുടെ ശബ്ദം ഈ ചിത്രത്തിലൂടെ പുറംലോകമറിയും എന്നായിരുന്നു ഉലകനായകന്റെ വാക്കുകൾ. വടിവേലു, ഫഹദ് ഫാസിൽ, കീർത്തി സുരേഷ് എന്നിവരാണ് മറ്റു പ്രധാന വേഷങ്ങളിൽ. ചിത്രം ഈ മാസം തിയേറ്ററുകളിലെത്തും.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEE MALAYALAM App ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...
