International Women’s Day 2024: ഈ വനിതാ ദിനത്തിൽ ആരോ​ഗ്യത്തിന് പ്രാധാന്യം നൽകാം; പിഎസ്ഒഎസിനെ എങ്ങനെ നേരിടാമെന്നറിയാം

PCOS Diet: ലോകമെമ്പാടുമുള്ള ദശലക്ഷക്കണക്കിന് സ്ത്രീകളെ ബാധിക്കുന്ന ഒരു ആരോ​ഗ്യപ്രശ്നമാണ് പോളിസിസ്റ്റിക് ഓവറി സിൻഡ്രോം (പിസിഒഎസ്).

അന്താരാഷ്ട്ര വനിതാ ദിനം സ്ത്രീകളുടെ നേട്ടങ്ങളുടെ ആഘോഷം മാത്രമല്ല, സ്ത്രീകൾ നേരിടുന്ന ആരോഗ്യ വെല്ലുവിളികളെക്കുറിച്ച് സംസാരിക്കാനും പ്രശ്നപരിഹാരം കാണാനുമുള്ള സമയം കൂടിയാണ്. ലോകമെമ്പാടുമുള്ള ദശലക്ഷക്കണക്കിന് സ്ത്രീകളെ ബാധിക്കുന്ന ഒരു ആരോ​ഗ്യപ്രശ്നമാണ് പോളിസിസ്റ്റിക് ഓവറി സിൻഡ്രോം (പിസിഒഎസ്).

പിസിഒഎസ് ഒരു ഹോർമോൺ ഡിസോർഡർ ആണ്. പ്രത്യുൽപാദന ഹോർമോണുകളുടെ അസന്തുലിതാവസ്ഥ, ക്രമരഹിതമായ ആർത്തവം, അമിത രോമവളർച്ച, മുഖക്കുരു, ശരീരഭാരം തുടങ്ങിയവയാണ് പിസിഒഎസിന്റെ ലക്ഷണങ്ങൾ. പിസിഒഎസ് നിയന്ത്രിക്കാൻ മരുന്നുകളും ജീവിതശൈലി മാറ്റങ്ങളും നിർദേശിക്കപ്പെടുന്നു.

പലപ്പോഴും സ്ത്രീകൾ പിസിഒഎസിന്റെ രോഗലക്ഷണങ്ങൾ ലഘൂകരിക്കാൻ പ്രകൃതിദത്ത മാർ​ഗങ്ങളും ഉപയോ​ഗിക്കാറുണ്ട്. പിസിഒഎസിന്റെ ലക്ഷണങ്ങൾ ലഘൂകരിക്കുന്നതിന് സഹായിക്കുന്ന പ്രകൃതിദത്ത വസ്തുക്കൾ എന്തെല്ലാമാണെന്ന് നോക്കാം.

ഉലുവ: ഉലുവയ്ക്ക് ആർത്തവചക്രം നിയന്ത്രിക്കാനും ഇൻസുലിൻ സംവേദനക്ഷമത മെച്ചപ്പെടുത്താനുമുള്ള കഴിവുണ്ട്. ഇത് പിസിഒഎസുമായി ബന്ധപ്പെട്ടുണ്ടാകുന്ന ക്രമരഹിതമായ ആർത്തവ കാലയളവുകളും ഇൻസുലിൻ പ്രതിരോധവും നിയന്ത്രിക്കുന്നു.

തുളസി: തുളസിയില ചായ കുടിക്കുന്നത് പിസിഒഎസിന്റെ ഭാ​ഗമായി ഉണ്ടാകുന്ന മുടിവളർച്ച കുറയ്ക്കുന്നതിന് സഹായിക്കുന്നു. തുളസിയില ചായ കുടിക്കുന്നത് മൊത്തത്തിലുള്ള ആരോ​ഗ്യത്തിനും ​ഗുണം ചെയ്യും.

കറുവപ്പട്ട: കറുവപ്പട്ട ആർത്തവചക്രം നിയന്ത്രിക്കാനും ഇൻസുലിൻ സംവേദനക്ഷമത മെച്ചപ്പെടുത്താനും സഹായിക്കും. പിസിഒഎസ് സംബന്ധമായ ക്രമരഹിതമായ ആർത്തവചക്രവും ഇൻസുലിൻ പ്രതിരോധവും നിയന്ത്രിക്കാൻ സഹായിക്കുന്നു.

ലൈക്കോറൈസ് റൂട്ട്: പിസിഒഎസ് ഉള്ള സ്ത്രീകളിൽ ടെസ്റ്റോസ്റ്റിറോൺ അളവ് കുറയ്ക്കാനും മുഖക്കുരു, അമിത രോമവളർച്ച തുടങ്ങിയ ലക്ഷണങ്ങൾ പരിഹരിക്കാനും ലൈക്കോറൈസ് റൂട്ട് സഹായിക്കും. ഇത് ഹോർമോൺ ബാലൻസിനും ​ഗുണം ചെയ്യുന്നു.

പിപ്പലി: പിപ്പലി ഫ്രീ റാഡിക്കൽ നാശത്തെ ചെറുക്കുന്നു. ശരീരഭാരം നിയന്ത്രിക്കാനും ഇൻസുലിൻ പ്രതിരോധം മെച്ചപ്പെടുത്താനും ഹോർമോണുകളുടെ അളവ് സന്തുലിതമാക്കാനും ഇത് മികച്ചതാണ്.