ഉത്തർപ്രദേശിൽ 73 കൊവിഡ് രോ​ഗികൾക്ക് ബ്ലാക്ക് ഫം​ഗസ് റിപ്പോർട്ട് ചെയ്തു; മൂന്ന് മരണം

ലഖ്നൗ: കൊവിഡ് രണ്ടാം തരം​ഗം രൂക്ഷമാകുന്നതിനിടെ ആശങ്കയുയർത്തി കൊവിഡ് രോ​ഗികളിൽ ബ്ലാക്ക് ഫം​ഗസും (Black Fungus) വ്യാപിക്കുന്നു. ഉത്തർപ്രദേശിൽ 73 കൊവിഡ് രോ​ഗികളിൽ ബ്ലാക്ക് ഫം​ഗസ് ബാധ റിപ്പോർട്ട് ചെയ്തു. കർണാടക, മഹാരാഷ്ട്ര, മധ്യപ്രദേശ് എന്നീ സംസ്ഥാനങ്ങളിലും ബ്ലാക്ക് ഫം​ഗസ് ബാധ റിപ്പോർട്ട് ചെയ്തിരുന്നു. ഇതിന് പിന്നാലെയാണ് ഉത്തർപ്രദേശിലും ഫം​ഗസ് ബാധ റിപ്പോർട്ട് ചെയ്തിരിക്കുന്നത്.

കാൺപൂരിൽ രണ്ട് പേരും മഥുരയിൽ ഒരാളും ബ്ലാക്ക് ഫം​ഗസ് ബാധയെ തുടർന്ന് മരിച്ചു. ലഖ്നൗവിൽ കൊവിഡ് രോ​ഗിക്ക് കാഴ്ച നഷ്ടമായതായും റിപ്പോർട്ടുകളുണ്ട്. വാരണാസിയിലാണ് കൂടുതൽ പേർക്ക് രോ​ഗം റിപ്പോർട്ട് ചെയ്തത്. ഇവിടെ 20 കൊവിഡ് രോ​ഗികളിൽ ഫം​ഗസ് ബാധ സ്ഥിരീകരിച്ചു. ​ഗോരഖ്പൂരിൽ 10 പേർക്കും പ്രയാ​ഗ് രാജിൽ ആറ് പേർക്കും ബ്ലാക്ക് ഫം​ഗസ് ബാധ സ്ഥിരീകരിച്ചിട്ടുണ്ട്. രോ​ഗബാധ സ്ഥിരീകരിച്ച സാഹചര്യത്തിൽ പ്രതിരോധ പ്രവർത്തനങ്ങൾക്കായി മുഖ്യമന്ത്രി യോ​ഗി ആദിത്യനാഥ് 14 അം​ഗ വിദ​ഗ്ധ സംഘത്തെ നിയോ​ഗിച്ചിട്ടുണ്ട്. സ്ഥിതി​ഗതികൾ വിലയിരുത്തി ആവശ്യമായ നടപടികൾ സ്വീകരിക്കാനാണ് ഇവർക്ക് നൽകിയിരിക്കുന്ന നിർദേശം.

അതേസമയം, മഹാരാഷ്ട്രയിൽ ബ്ലാക്ക് ഫം​ഗസ് അഥവാ മ്യൂക്കോർമൈക്കോസിസ് (Mucormycosis) രോ​ഗം ബാധിച്ച് 52 പേർ മരിച്ചതായാണ് റിപ്പോർട്ട്. മരിച്ചവർ എല്ലാവരും കൊവിഡ് രോ​ഗമുക്തി നേടിയവരാണെന്നും മഹാരാഷ്ട്ര ആരോ​ഗ്യവകുപ്പ് അറിയിച്ചു. കഴിഞ്ഞ വർഷം കൊവിഡ് വ്യാപനം ആരംഭിച്ചതിന് ശേഷം ഇതുവരെ 52 പേർ ബ്ലാക്ക് ഫം​ഗസ് ബാധിച്ച് മരിച്ചതായാണ് സർക്കാർ കണക്കുകൾ വ്യക്തമാക്കുന്നത്. എല്ലാവരും കൊവിഡ് (Covid) രോ​ഗം ഭേദമായവരാണ്. തലവേദന, പനി, കണ്ണുകളിൽ വേദന, മൂക്കൊലിപ്പ്, സൈനസൈറ്റിസ്, കവിൾ അസ്ഥി വേദന, തരിപ്പ്, വീക്കം, പല്ലിളകുക, കാഴ്ച മങ്ങുക, നെഞ്ചുവേദന തുടങ്ങിയവയാണ് രോ​ഗലക്ഷണങ്ങൾ.

ആദ്യമായാണ് ബ്ലാക്ക് ഫം​ഗസ് ബാധിച്ച് മരിച്ചവരുടെ കണക്കുകൾ സർക്കാർ പുറത്ത് വിടുന്നത്. കഴിഞ്ഞ ദിവസം സംസ്ഥാനത്ത് 1500 പേർക്ക് ബ്ലാക്ക് ഫം​ഗസ് ബാധിച്ചതായി ആരോ​ഗ്യമന്ത്രി രാജേഷ് ടോപ്പെ വ്യക്തമാക്കിയിരുന്നു. കൊവിഡ് അതിതീവ്ര വ്യാപനത്തിനിടെ ബ്ലാക്ക് ഫം​ഗസ് ബാധ പടരുന്നത് ആരോ​ഗ്യമേഖലയിൽ വലിയ ആശങ്ക പരത്തുന്നുണ്ട്. പ്രമേഹ രോ​ഗികളിലാണ് ഇത് കൂടുതലായി കണ്ടുവരുന്നത്. കൊവിഡാനന്തരം രക്തത്തിൽ പഞ്ചസാരയുടെ അളവ് വർധിക്കുന്നവരെയാണ് ബ്ലാക്ക് ഫം​ഗസ് ​ഗുരുതരമായി ബാധിക്കുന്നത്.

മധ്യപ്രദേശിൽ ഇതുവരെ ഏഴ് മ്യൂക്കോർമൈക്കോസിസ് കേസുകൾ റിപ്പോർട്ട് ചെയ്തു. കൊവിഡ് രോ​ഗികളിൽ ഉയർന്ന അളവിൽ നൽകുന്ന മരുന്നിന്റെ പാർശ്വഫലമായാണ് ബ്ലാക്ക് ഫം​ഗസ് വ്യാപിക്കുന്നതെന്ന് ആരോ​ഗ്യവിദ​ഗ്ധർ വ്യക്തമാക്കുന്നു. ഭോപ്പാലിൽ ബ്ലാക്ക് ഫം​ഗസ്  രോ​ഗികൾക്കായി 20 കിടക്കകളുള്ള വാർഡ് രൂപീകരിച്ചിരുന്നു. ആന്റിഫം​ഗലുകൾ ഉപയോ​ഗിച്ചാണ് മ്യൂക്കോർമൈക്കോസിസിന് പൊതുവെ ചികിത്സ നൽകുന്നത്. ​ഗുരുതരാവസ്ഥയാണെങ്കിൽ ശസ്ത്രക്രിയ വേണ്ടിവരുമെന്ന് ഡോക്ടർമാർ പറയുന്നു. പ്രമേഹ രോ​ഗമുള്ളവർ കൊവിഡ് മുക്തി നേടിയ ശേഷം രക്തത്തിലെ പഞ്ചസാരയുടെ അളവ് നിരന്തരം പരിശോധിക്കണം. സ്റ്റിറോയിഡുകളുടെ അമിത ഉപയോ​ഗം നിയന്ത്രിക്കണം. പ്രധാനമായും വേണ്ടത് വ്യക്തിശുചിത്വം തന്നെയാണ്. മാസ്ക് കൃത്യമായി ധരിക്കുക, മണ്ണിലേക്ക് ഇറങ്ങുമ്പോൾ ഷൂസ് ധരിക്കുക, കാൽ മുഴുവനായി മറയുന്ന പാന്റ്സ് ധരിക്കുക, കൈമൂടിയ ഷർട്ട് ധരിക്കുക, ​ഗ്ലൗസ് ഉപയോ​ഗിക്കുക തുടങ്ങിയവയാണ് പ്രതിരോധ മാർ​ഗങ്ങൾ.

ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്...  മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEEHindustanApp ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...

android Link - https://bit.ly/3b0IeqA

ios Link - https://apple.co/3hEw2hy