Jammu & Kashmir, Haryana Assembly Election Results 2024: ഹരിയാനയിലും ജമ്മുകശ്മീരിലും ആര് ഭരിക്കുമെന്നകാര്യത്തിൽ തീരുമാനം കുറച്ചു മണിക്കൂറുകൾക്കുള്ളിൽ അറിയാം. രണ്ട് നിയമസഭകളിലേയും വോട്ടെണ്ണൽ ഇന്ന് രാവിലെ ആരംഭിക്കും.
ഹരിയാനയില്‍ കോണ്‍ഗ്രസ് തൂത്തുവാരുമെന്നും, ജമ്മുകശ്മീരില്‍ തൂക്ക് സഭക്കുള്ള സാധ്യത പോലും തളളാനാവില്ലെന്നുമുള്ള എക്സിറ്റ് പോള്‍ ഫലങ്ങള്‍ക്കിടെയാണ് ഇന്ന് ഫലം വരുന്നത് എന്നത് ശ്രദ്ധേയം. രണ്ട് സംസ്ഥാനങ്ങളിലും വലിയ പ്രതീക്ഷയിലാണ് ബിജെപിയും ഇന്ത്യ സഖ്യവും.
ലോക്സഭ തിരഞ്ഞെടുപ്പിന് തൊട്ടു പിന്നാലെ നടന്ന ഹരിയാന, കശ്മീര്‍ നിയമസഭാ തിരഞ്ഞെടുപ്പുകളുടെ ഫലം ഭരണപക്ഷത്തിനും പ്രതിപക്ഷത്തിനും ഏറെ നിർണായകമായിരിക്കും. അവസാന മണിക്കൂറുകളിലും എൻഡിഎയും ഇന്ത്യ സഖ്യവും വിജയ പ്രതീക്ഷയിലാണ്. രണ്ട് സംസ്ഥാനങ്ങളിലും 90 വീതം നിയമസഭ സീറ്റുകളാണുള്ളത്. ഒറ്റഘട്ടമായി നടന്ന ഹരിയാന തിരഞ്ഞെടുപ്പില്‍ 67.90 ശതമാനം പോളിംഗും, മൂന്ന് ഘട്ടമായി നടന്ന ജമ്മുകശ്മീര്‍ തിരഞ്ഞെടുപ്പില്‍ 63.45 ശതമാനവും പോളിംഗുമാണ് രേഖപ്പെടുത്തിയിരുന്നത്.
വോട്ടെണ്ണൽ രാവിലെ 8 മണിയോടെ ആരംഭിക്കും. എട്ടരയോടെ ആദ്യ ഫല സൂചനകള്‍ പുറത്തുവരുമെന്നാണ് റിപ്പോർട്ട്. പത്ത് മണിയോടെ രണ്ടിടങ്ങളിലും ഏതാണ്ട് ഒരു ചിത്രം തെളിയുമെന്നാണ് റിപ്പോർട്ട്. പത്ത് വർഷങ്ങൾക്ക് ശേഷമാണ് കശ്മീരിൽ തിരഞ്ഞെടുപ്പ് നടന്നിരിക്കുന്നത്. ഇവിടെ നാഷണല്‍ കോണ്‍ഫറന്‍സ്-കോണ്‍ഗ്രസ് മുന്നേറ്റമാണ് പ്രതീക്ഷിക്കുന്നത്. ഭൂരിപക്ഷം എക്സിറ്റ് പോളുകളും ആ സാധ്യതയിലേക്കാണ് വിരല്‍ ചൂണ്ടിയതും. എന്തായാലും ഏട്ടനും മണിക്കൂറുകൾക്കുള്ളിൽ രണ്ടു സംസ്ഥാനങ്ങളിലും ആർക്കായിരിക്കും വിജയം എന്നത് നമുക്ക് കാത്തിരുന്നു കാണാം...
