Pooppara: പൂപ്പാറ ടൗണിലെ അനധികൃത കൈയ്യേറ്റങ്ങൾ ഒഴുപ്പിച്ചു; സംഘർഷം, 6 പേർ അറസ്റ്റിൽ

Pooppara illegal encroachments: ആറാഴ്ചയ്ക്കുള്ളിൽ പൂപ്പാറയിലെ കൈയ്യേറ്റങ്ങൾ ഒഴുപ്പിക്കണമെന്ന് ഹൈക്കോടതി ഉത്തരവിട്ടിരുന്നു.

ഇടുക്കി: പൂപ്പാറ ടൗണിലെ അനധികൃത കൈയേറ്റങ്ങൾ റവന്യൂ വകുപ്പ് ഒഴുപ്പിച്ചു. പന്നിയാർ പുഴയും റോഡ്‌ പുറമ്പോക്കും കൈയ്യേറി നടത്തിയ 56 നിർമ്മാണങ്ങൾക്ക് എതിരെയാണ് നടപടി. ഒഴിയാൻ സാവകാശം നൽകാത്തതിൽ നാട്ടുകാർ പ്രതിഷേധിച്ചതിനെ തുടർന്ന് നേരിയ സംഘർഷം ഉണ്ടായി. ആറ് പേരെ അറസ്റ്റ് ചെയ്ത് നീക്കി. 

ആറാഴ്ചയ്ക്കുള്ളിൽ പൂപ്പാറയിലെ കൈയ്യേറ്റങ്ങൾ ഒഴുപ്പിയ്ക്കണമെന്ന ഹൈക്കോടതി ഉത്തരവിനെ തുടർന്നാണ് റവന്യൂ സംഘം നടപടി സ്വീകരിച്ചത്. സബ് കളക്ടർ അരുൺ എസ് നായരുടെ നേതൃത്വത്തിൽ വൻ പോലീസ് സംഘത്തിന്റെ സാനിധ്യത്തിലായിരുന്നു നടപടികൾ. സംഘർഷ സാധ്യത കണക്കിലെടുത്ത് പൂപ്പാറയിൽ നിരോധനാജ്ഞ പുറപ്പെടുവിച്ചിരുന്നു. 

രണ്ട് ആരാധനാലയങ്ങളും 13 വീടുകളും കടകളും ഉൾപ്പടെ ആകെ 56 അനധികൃത നിർമ്മാണങ്ങൾക്കെതിരെയാണ് നടപടി. വീടുകളിൽ താമസക്കാർക്ക് തുടരാൻ അനുമതി നൽകിയിട്ടുണ്ട്. ആരാധനാലയങ്ങളിൽ നോട്ടീസ് പതിപ്പിച്ചെങ്കിലും സീൽ ചെയ്തില്ല. വ്യാപാര സ്ഥാപനങ്ങൾ പൂട്ടി സീൽ ചെയ്തു. നിർബന്ധിതമായി വേഗത്തിൽ ഒഴുപ്പിയ്ക്കുകയാണെന്ന് ആരോപിച്ച് വ്യാപാരികളുടെ പ്രതിഷേധവുമുണ്ടായി. ഇതാണ് നേരിയ സംഘർഷത്തിന് ഇടയ്ക്കിയത്. 

പതിറ്റാണ്ടുകളായി കൈവശം വെച്ചിരിയ്ക്കുന്ന ഭൂമിയാണെന്നും ഹൈക്കോടതിയെ സമീപിയ്ക്കുമെന്നും ആക്ഷൻ കൗൺസിൽ അറിയിച്ചു. നടപടികൾ സംബന്ധിച്ച് റവന്യൂ വകുപ്പ് കോടതിയിൽ റിപ്പോർട്ട് സമർപ്പിക്കും. ആരാധനാലയങ്ങളും വീടുകളും സംബന്ധിച്ച് സർക്കാർ തീരുമാനപ്രകാരമാകും തുടർ നടപടി.