Asif Ali: ആസിഫ് അലി ചിത്രവുമായി നവാഗത സംവിധായകൻ ഫർഹാൻ; ഡാർക്ക്‌ ഹ്യൂമർ എന്റർടെയ്നർ ഒരുങ്ങുന്നു

Dark Humor Film: റിയൽ ലൈഫ് എന്റർടൈൻമെന്റ്സിന്റെ ബാനറിൽ എഡിറ്റർ നൗഫൽ അബ്ദുള്ള, നിസാർ ബാബു, പടയോട്ടം എന്ന ബിജു മേനോൻ ചിത്രം സംവിധാനം ചെയ്ത റഫീഖ് എന്നിവരാണ് ചിത്രം നിർമിക്കുന്നത്.

ആസിഫ് അലി നായകനായി നവാഗതനായ ഫർഹാൻ പി ഫൈസൽ സംവിധാനം ചെയ്യുന്ന ചിത്രം ഒരുങ്ങുന്നു. ജിസ് ജോയ്, ഖാലിദ് റഹ്‌മാൻ തുടങ്ങിയ സംവിധായകർക്കൊപ്പം അസോസിയേറ്റായി പ്രവർത്തിച്ച സംവിധായകനാണ് ഫർഹാൻ. റിയൽ ലൈഫ് എന്റർടൈൻമെന്റ്സിന്റെ ബാനറിൽ എഡിറ്റർ നൗഫൽ അബ്ദുള്ള, നിസാർ ബാബു, പടയോട്ടം എന്ന ബിജു മേനോൻ ചിത്രം സംവിധാനം ചെയ്ത റഫീഖ് എന്നിവരാണ് ചിത്രം നിർമിക്കുന്നത്.

ആസിഫ് അലി നിലവിൽ ചിത്രീകരണം നടക്കുന്ന ചിത്രങ്ങൾ പൂർത്തിയാക്കിയ ശേഷം നവംബർ അവസാന വാരം ഈ സിനിമയുടെ ചിത്രീകരണം ആരംഭിക്കും. ഡാർക്ക്‌ ഹ്യൂമർ ജോണറിലാണ് ചിത്രം ഒരുക്കുന്നത്. പേരിടാത്ത ഈ ചിത്രത്തിന്റെ മറ്റ് വിവരങ്ങൾ വരും ദിവസങ്ങളിൽ പുറത്ത് വിടും. ജഗദീഷ്, ചന്ദു സലിം കുമാർ, കോട്ടയം നസീർ, സജിൻ ഗോപു തുടങ്ങി വലിയ താരനിര ചിത്രത്തിന്റെ ഭാഗമാകുന്നുണ്ട്.

പീസ് എന്ന ജോജു ജോർജ് ചിത്രത്തിന് തിരക്കഥ ഒരുക്കിയ സഫർ സനൽ, രമേശ്‌ ഗിരിജ എന്നിവർ ചേർന്നാണ് ചിത്രത്തിന്റെ രചന നിർവഹിക്കുന്നത്. നിലവിൽ ജോഫിൻ ടി ചാക്കോ സംവിധാനം ചെയ്യുന്ന ചിത്രത്തിൽ അഭിനയിക്കുകയാണ് ആസിഫ് അലി.

അഡിയോസ് ആമിഗോസ് എന്ന ചിത്രമാണ് ആസിഫ് അലിയുടേതായി അടുത്തതായി പുറത്തിറങ്ങാനുള്ള ചിത്രം. ആസിഫ് അലിയുടെ പുതിയതായി തിയേറ്ററുകളിൽ എത്തിയ തലവൻ സൂപ്പർ ഹിറ്റായിരുന്നു. തലവനിൽ ആസിഫ് അലിയും ബിജു മേനോനുമാണ് പ്രധാന കഥാപാത്രങ്ങളെ അവതരിപ്പിച്ചത്.