Guruvayoor Ambalanadayil leaked: ഒടിടിയിൽ എത്തിയതിന് പിന്നാലെ 'ഗുരുവായൂരമ്പല നടയിൽ' ചോർന്നു

Guruvayoor Ambalanadayil movie leaked online: ജൂൺ 27ന് ഒടിടിയിൽ എത്തിയ ചിത്രത്തിൽ പൃഥ്വിരാജ്, ബേസിൽ ജോസഫ് എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്.

തിയേറ്ററുകളിൽ വൻ വിജയമായി മാറിയ ​ഗുരുവായൂരമ്പല നടയിൽ ഓൺലൈനിൽ ചോ‍ർന്നു. ഒടിടിയിൽ സ്ട്രീമിം​ഗ് ആരംഭിച്ചതിന് പിന്നാലെയാണ് ചിത്രം പൈറസിയ്ക്ക് ഇരയായത്. ടെലഗ്രാം, ടോറന്റ് തുടങ്ങിയ ആപ്പുകളിൽ സിനിമ ഇപ്പോൾ സൗജന്യമായി ഡൗൺലോഡ് ചെയ്ത് കാണാവുന്ന രീതിയിൽ വ്യാപകമായി പ്രചരിക്കുകയാണ്. ഒടിടിയിൽ എത്തി മണിക്കൂറുകൾക്കുള്ളിലാണ് ചിത്രത്തിന്റെ വ്യാജ പതിപ്പ് ഓൺലൈൻ പ്ലാറ്റ്‌ഫോമുകളിൽ എത്തിയത്. 

മെയ് 16ന് തിയേറ്ററുകളിൽ എത്തിയ ചിത്രത്തിൽ പൃഥ്വിരാജ്, ബേസിൽ ജോസഫ് എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്. ചിത്രത്തിൽ ആനന്ദ് എന്ന കഥാപാത്രത്തെയാണ് പൃഥ്വിരാജ് അവതരിപ്പിക്കുന്നത്. വിനു എന്ന കഥാപാത്രമായാണ് ബേസിൽ ജോസഫ് എത്തുന്നത്. ഇവർക്ക് പുറമെ നിഖില വിമൽ, അനശ്വര രാജൻ, യോഗി ബാബു, ജഗദീഷ്, ബൈജു സന്തോഷ്, രേഖ, ഇർഷാദ്, സിജു സണ്ണി, സഫ്‌വാൻ, കുഞ്ഞികൃഷ്ണൻ മാസ്റ്റർ, മനോജ്‌ കെ യു തുടങ്ങി വൻ താരനിര തന്നെ ചിത്രത്തിൽ അണിനിരക്കുന്നുണ്ട്. യോഗി ബാബുവിൻ്റെ മലയാള സിനിമയിലേയ്ക്കുള്ള അരങ്ങേറ്റ ചിത്രം കൂടിയാണിത് എന്നത് മറ്റൊരു സവിശേഷതയാണ്. 

ദീപു പ്രദീപിൻ്റെ തിരക്കഥയിൽ വിപിൻ ദാസ് സംവിധാനം ചെയ്ത ഒരു കോമഡി-ഡ്രാമ ചിത്രമാണ് "ഗുരുവായൂരമ്പല നടയിൽ". ജൂൺ 27നാണ് ചിത്രം ഒടിടി പ്ലാറ്റ്ഫോമായ ഡിസ്നി + ഹോട്ട്‌സ്റ്റാറിൽ സ്ട്രീമിം​ഗ് ആരംഭിച്ചത്. തിയേറ്ററുകളിൽ കുടുംബ പ്രേക്ഷകരും യുവാക്കളും ഒരുപോലെ ഏറ്റെടുത്ത ചിത്രത്തിന്റെ ഒടിടി റിലീസിനായി സിനിമാ പ്രേമികൾ ആവേശത്തോടെയാണ് കാത്തിരുന്നത്. പൃഥ്വിരാജ് പ്രൊഡക്ഷൻസിന്റെ ബാനറിൽ സുപ്രിയ മേനോൻ, ഇഫോർ എന്റർടൈൻമെന്റ് ബാനറിൽ മുകേഷ് ആർ മേത്ത, സി വി സാരഥി എന്നിവർ ചേർന്നാണ് ​ഗുരുവായൂരമ്പല നടയിൽ എന്ന ചിത്രം നിർമ്മിച്ചിരിക്കുന്നത്.